Гиперреалистік эксклюзивті мүсіні таныстырылды

Елордада «Қазақконцерт» ұйымы Абайдың 175 жылдығына орай ұлы ақынның жаңа гиперреалистік эксклюзивті мүсінін таныстырды.

Мүсін балауыз бен силикон материалдарынан жасалған. Елімізде сирек кездесетін гиперреалистік бағыттағы мүсіннің авторы – талантты суретші әрі мүсінші Айдос Есмағамбетов. Ол бұған дейін Елбасы Нұрсұлтан Назарбаевтың, Барак Обаманың, Абылай ханның және генерал-полковник Сағадат Нұрмағамбетовтің гиперреалистік мүсіндерін жасаған.

«Биыл ұлы ойшыл, кемеңгер ақын Абайдың 175 жылдығы елімізде кеңінен атап өтілуде. Ақынның баға жетпес еңбектерін дәріптеу — біздің азаматтық парызымыз. Абайға деген құрметіміздің бір белгісі, ұлы ақынның тұлғасын дәріптеуге арналған іс-шараның бірі — Абай мүсінінің тұсаукесері. Қазақстанда баламасы жоқ жаңа туындының авторы — гиперреалист мүсінші, «Қазақконцерт» ұйымының суретшісі, «100 жаңа есім» жобасының жеңімпазы Айдос Есмағамбетов. Ол бұл мүсінді биыл 60 жылдық мерейтойын атап өткен «Қазақконцерт» ұйымына тарту етіп отыр. Бұл мүсін болашақта Ұлыбританиядағы мадам Тюссо музейіне қойылады деп сенеміз», — дейді «Қазақконцерт» мекемесінің  директоры, Қазақстанның еңбек сіңірген қайраткері Жеңіс Сейдоллаұлы.

Ал Айдос Есмағамбетовтің айтуынша, ұлы Абайдың осы мүсінін жасауға төрт ай уақыт кеткен. Мүсінге қажетті кейбір материал Қазақстанда сатылмайды, сондықтан оны шетелден сатып алуға тура келген.

«Бұл мүсінді жасау үшін Абайдың суретінің түпнұсқасы керек болды. Ғаламторда ақынның суреттері мен бейнесі көп. Бірақ ол суреттерді ұлғайтқан кезде бұлдырап кетеді де, оны анық қарау мүмкін болмайды. Сондықтан Абай мұражайына хабарласып, Абайдың түпнұсқа суретін сұрадым. Сондай-ақ сол кезеңмен сәйкес келуі үшін арнайы шапанға да тапсырыс бердім», — дейді ол

Данагүл ҚАЗИХАН