Мектептер жөнделіп жатыр

Жаңа оқу жылында Байғанин ауданындағы Бұлақтыкөл мектебі ел игілігі үшін пайдалануға берілмек. Аталған ауданда қазір «Жұмыспен қамту жол картасы — 2020» мемлекеттік бағдарламасы және  «Ауыл — ел бесігі» жобасы аясында күрделі жөндеу жүргізіліп жатқан мектептердің жұмыстары аяқталуға таяу.

— Біздің ауданда «Жұмыспен қамту жол картасы — 2020» мемлекеттік бағдарламасының арқасында 4 білім ордасы жаңартылып жатыр. Олар — аудан орталығындағы Қарауылкелді, №2 Қарауылкелді, №3 Қарауылкелді орта мектептері, сондай-ақ Жарқамыс ауылындағы мектеп ғимараттары. №2 Қарауылкелді мектебінің мердігері — «Техно С» жауапкершілігі шектеулі серіктестігі. Қалған үш мектептің жұмыстарына жауапты — «СтройМастерКласс» серіктестігі. Жөндеу жұмыстары мамыр айында басталды. Келісімшартта көрсетілгендей осы айда аяқталуы тиіс. Бұл 4 жоба бойынша жалпы 58 адамды жұмыспен қамту жоспарланған болатын. Оның 28-і — жұмыспен қамту орталығы арқылы келгендер, — дейді аудандық білім бөлімі басшысының міндетін атқарушы Жанаргүл Өсербаева.

Оның айтуынша, «Ауыл — ел бесігі» ауқымды жобасы аясында Қопа орта мектебі мен Т.Айбергенов атындағы орта мектептің ғимараттарына күрделі жөндеу жүргізілуде. Екі білім шаңырағын жаңартуға жалпы 32 адам жұмылдырылған. Оның бесеуі  жұмыспен қамту орталығы арқылы тартылыпты.

— Ауданда жалпы 23 мектеп бар. Мемлекет тарапынан көрсетілген қолдаудың арқасында білім шаңырақтарының 75 пайызы жаңартылды. Күрделі жөндеу жүргізуді қажет ететін 4 мектеп қалды. Бүгінде олардың жобалық-сметалық құжаттарын әзірлеп жатырмыз. Келесі жылы жаңарту жоспарланып отыр, — дейді Жанаргүл Өсербаева.

Гүлжан БАЗЫЛҚЫЗЫ.