Тәуелсіздік мерейтойына 160-тан астам шара жоспарланып отыр

Тәуелсіздіктің 25 жылдығына орай Ақтөбеде 37 өндірістік және әлеуметтік нысан пайдалануға беріледі. Сондай-ақ, қала аумағында 83 көшеге жаңа атау беріледі деп күтіліп отыр.

Олардың ішінде, «Ақтөбе Сити» шағын ауданында Тәуелсіздік даңғылы пайда болмақ. Осы ауданда «Тәуелсіздіктің 25 жылдығы» атындағы көше де болады.

Бұл туралы кеше облыстық әкімдікте ҚР Тәуелсіздігінің 25 жылдығын мерекелеуге Ақтөбе қаласының әзірлігі барысын талқылауға арналған жиында айтылды. Жиынға облыс әкімі Бердібек Сапарбаев, қала әкімі Ілияс Испанов пен оның орынбасарлары, атқарушы органдар басшылары қатысты.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                         Тәуелсіздіктің 25 жылдық мерейтойын мерекелеу мақсатында жоспарланып отырған шаралар және оларға әзірлік барысы жөнінде қала әкімі Ілияс Испанов баяндады. Оның айтуынша, негізгі салтанатты шаралар 21 қарашадан басталады. Осы күні ҚР Тәуелсіздігінің 25 жылдығына арналған шаралардың ашылуына орай салтанатты жиын ұйымдастырылады.

1 желтоқсан — ҚР Тұңғыш Президенті күнінде қалада бірнеше маңызды нысан — Батыс-2 ауданында 320 орындық балабақша; денсаулық сақтау саласы қызметкерлеріне арналған тұрғын үй, т.б. пайдалануға берілмек. Сонымен бірге, осы күні Студенттер сарайында «Арда туған ардақты ер» атты салтанатты шара өтеді.

13 желтоқсанға белгіленген мерекелік шаралар аясында да қалада бірқатар нысандардың салтанатты ашылуы жоспарланған: Кірпішті ауданында мүмкіндігі шектеулі балалар үйі түлектеріне арналған әлеуметтік үй; жастар шығармашылығы сарайы, т.б. Осы күні «Қоныс» спорт сарайында «Тәуелсіздік — елімнің ерлік жолы» атты мерекелік шара ұйымдастырылады.

Тәуелсіздік күні, яғни 16 желтоқсанда да Ақтөбеде жаңа Бизнес орталығы; Батыс-2 ауданында 120 орындық балабақша, басқа да маңызды нысандар іске қосылатын болады.

Мерейтой аясында қаланың 25 көшесіне Әлихан Бөкейханұлы, Мұстафа Шоқай, Шәкәрім бабамыз, өзге де халқымыздың аяулы перзенттерінің есімдері беріліп отырғанынан жуырда жұртшылық хабардар болды. Қала әкімінің айтуынша, тағы да 83 көшеге жаңа атау беру жоспарланған. Әр ұсынысқа орай қоғамдық тыңдау өткізіліп, құжаттар қалалық мәслихатқа жолданған.

Облыс әкімі Бердібек Сапарбаев мерейтой аясындағы шаралардан облыстың әр тұрғыны, әр отбасы тыс қалмауы керектігін ескертті:

— Әр тұрғын, әр отбасы мерекелік көңіл күйді сезінуі тиіс, — деді ол.

Жалпы, облыс орталығында Тәуелсіздік мерейтойы тойланатын 25 күн ішінде 160-тан астам шара өткізілмек. Ал облысымызда Тәуелсіздік мерейтойына арнап жыл бойы 5 мыңнан астам шара өткізу жоспарланған.

 Индира ӨТЕМІС.