«Е-қызмет»: Жылдам, қолайлы, ашық

Еңбек демалысына немесе материалдық көмек алуға өтініш жазуды, өз жетістіктері мен марапаттарын тіркеуді мемлекеттік қызметшілер тек қағаз түрінде ғана емес, сонымен қатар электрондық форматта да жасай алады. Оны жүзеге асыруға оларға елімізде белсенді енгізіліп жатқан «Е-қызмет» ақпараттық жүйесі көмектеседі.

Елбасы Нұрсұлтан Назарбаев «Нұрлы жол — болашаққа бастар жол» атты халыққа  арнаған Жолдауында экономиканы нығайтудың, халықтың әл-ауқатын арттыру міндеттерін белгілеп, жақын болашақта елді дамытудың бас векторы ретінде әлемнің дамыған 30 елінің қатарына кірудің жаһандық қадамы болып табылатын Жаңа экономикалық саясатты анықтады. Осыған байланысты мемлекеттің кадрлық әлеуетін дамыту мен арттыру бойынша жұмыстың негізгі тәсілдері, принциптері мен бағыттарын анықтайтын тиімді кадр саясаты Қазақстанның бәсекеге қатысты қабілеттілігін, экономикасы мен азаматтардың әл-ауқатын арттыруда шешуші фактор болып табылады.

Мемлекеттік қызмет жүйесін кәсіби жағынан жетілдіру меритократия, тиімділік, нәтижелілік пен қоғамға есеп беру қағидаларына негізделген болса, ол мемлекеттік басқару жүйесінің бәсекеге қабілеттілігін және халыққа сапалы қызмет көрсетуді қамтамасыз етуге себеп болады.

Мемлекеттік қызметтің жаңа моделінің бағыттарының бірі — мемлекеттік қызмет персоналын басқару процесін жетілдіру және мемлекеттік органдарда кадрлық қызмет іс-әрекетінде «Электрондық үкімет» жүйесінің мүмкіндіктерін кеңінен қолдануды көздейді.

Персоналды басқаруда тиімді жұмыс жүргізу үшін барлық бағыт бойынша жүйелі тәсіл қажет. Бұл — қызметкерлерді іріктеу, бейімдеу, оқыту, бағалау, дамыту және ынталандыру. Осы жағдайдың барлығында кадрлық қызметтің нақты есепке алу деректері қажет. Персоналды басқару жұмысын автоматтандыру ғана мемлекеттік қызметшілер мен лауазымдарға үміткерлер туралы үлкен көлемдегі ақпаратты сақтауға және өңдеуге, кадр қызметіне жүктелген міндеттерді сапалы орындауға мүмкіндік береді.

Қазақстан адам ресурстарын басқарудың халықаралық тәжірибелерін үнемі зерттеп отырады. Біз Корея, Австрия, Ұлыбритания және Голландия мемлекеттерінің тәжірибелерін терең зерттедік. Біз үшін басты міндет — мемлекет қызметшілерінің ресурстарымен басқаруда ақпараттық технологияларды қолдануы. Мұнда Нидерланды мемлекетінің тәжірибесі алдыңғы орында болып отыр. Біздің мамандар Нидерландыға барды, оқып тәжірибе алмасты.

Голландияда мемлекеттік қызмет персоналын басқару саласында озық тәжірибенің мысалы ретінде қарастырылатын P-Direct моделі енгізілген. P-Direct — Нидерланды Корольдігінің үкіметтік ұйымы  және 10 министрліктің адам ресурстарын басқаруда кадр процестерін орталықтандыру және стандарттау үшін арналған. Барлық қызметтер орталықтандырылған және азаматтар әкімшілік процестердің шығындарын бақылап, Үкіметтің жұмыс тиімділігін тұтастай қадағалай алады. Персоналды басқару процесін орталықтандыру арқасында Нидерландыда жылына 50 млн евро үнемделді, сондай-ақ мемлекеттік қызметшілер жұмысының үлкен өнімділігі мен нәтижелілігіне қол жеткізілді.

Қазақстанда 2011 жылы «Е-қызмет» тұжырымдамасы қабылданды. Жүйені әзірлеу 2013 жылы OR3 технологиясын қолдана отырып басталды және бұл оған 100 пайыз қазақстандық қамтуды қамтамасыз етті. Жүйе архитектурасы пайдаланушылардың орталық сервермен жұмысын бірыңғай ережелер бойынша қарастырады. Жүйені жүзеге асыру негізіне ашықтық қағидасы қойылған. Кез келген мемлекеттік қызметші жүйе ресурстарына лауазымының рөлдік өкілеттігіне байланысты қолжетімді болады.

Облыстағы мемлекеттік органдарда «Е-қызмет» жүйесі 2015 жылы енгізілді. Қазіргі уақытта «Е-қызмет» барлық жергілікті атқарушы және орталық мемлекеттік органдардың аумақтық бөлімшелерінде жұмыс істейді.

Кадрларды іріктеумен және жылжытумен байланысты барлық процестердің барынша ашық және объективті болуына мүмкіндік беретін «Е-қызмет» ықпалдастырылған ақпараттық жүйесі ағымдағы жылы толық пайдалануға берілді. «Е-қызмет» жүйесі азаматтармен egov.kz электрондық үкімет порталы арқылы өзара әрекет жасаса, мемлекеттік органдармен мемлекеттік органдардың интернет  порталы арқылы байланысады.

Бүгінгі күні облыстың 422 мемлекеттік мекемесі «Е-қызмет» жүйесінің штаттық режимінде жұмыс жасайды. Бұл жүйе енгізілгеннен кейін ҚР Мемлекеттік қызмет істері министрлігінің

Ақтөбе облысы бойынша департаменті «Е-қызмет» жүйесінің жұмысы бойынша орталық мемлекеттік органдардың аумақтық бөлімшелері, облыстық және аудандық деңгейдегі жергілікті атқарушы мемлекеттік органдардың персоналын басқару қызметкерлеріне оқыту ұйымдастырды. Жаңа жүйені таныстыру кіші жүйелердің жұмыс істеуін көрсету және әдістемелік материалдарды тарату арқылы жүзеге асырылды.

«Е-қызмет» мәселесі мемлекеттік қызмет, сыбайлас жемқорлыққа қарсы іс-қимыл бойынша жаңа заңнаманы түсіндіру және мемлекеттік қызметті өткеруде ағымдағы мәселелер бойынша ұйымдастырылатын семинар-кеңестердің барысында көтеріледі. Аудандарда әдістемелік көмек көрсету аясында ұйымдастырылған департаменттің «Ашық есік күндері» барысында аудандық атқарушы қызметкерлер үшін «Е-қызмет» жүйесінің жұмысы бойынша оқыту семинарлары жүргізіледі.

Өз кезегінде «Е-қызмет» жүйесін пайдалану — мемлекеттік органдарда кадр қызметтерінің жұмыс өнімділігін арттыруға және ақпаратты алу мен жаңарту  кезіндегі уақытты,  еңбек шығындарын азайтуға мүмкіндік береді. Жүйе мемлекеттік қызметкерлерге қатысты толық кадрлық ақпаратты қамтиды.

Алмас ИЛЮБАЕВ,

ҚР Мемлекеттік қызмет істері министрлігінің

Ақтөбе облысы бойынша

департаментінің мемлекеттік

қызмет басқармасының бас маманы.