Әдемі әзіл. ыстық ықылас  

Ақтөбе қаласындағы Ғ.Жұбанова атындағы облыстық филармония ғимаратында облыстық жастар саясаты мәселелері басқармасы мен «Қазақстан КВН одағы» республикалық жастар қоғамдық бірлестігіне қарасты «Ақтөбе КВН» филиалының ұйымдастыруымен премьер-лига ойындарының 1/4 финалы өтті. Оған 12 команда қатысты.

Екі күнге созылған шарада аудандар мен жоғары және орта оқу орындарының жастары бақ сынап, «Сәлемдесу» мен «Жамбы ату», сондай-ақ, «Үй тапсырмасы» кезеңдері бойынша өзара өнерлерін ортаға салды. Ал оларды сала мамандары, облыстық жастармен жұмыс жөніндегі ресурстық орталық өкілдері бағалап, сайыста қазылық етті.

— Екі ойын қорытындысы бойынша жартылай финалға бас-аяғы 8 команда өтті. Атап айтсам, келесі ойында енді «Алтын құрама», «Сөз жоқ», «Филландия», «Алтықарасу», «Бәйішев жастары», «Асыл арман», «Қандыағаш құрамасы», «Байланыс жастары» өз ішінде ең мықтыны анықтайтын болады. Бір қуантатыны, қыз-жігіттердің қазақша КВН ойындарына қызығушылығы зор, көрермендердің ықыласы да ерекше, — дейді «Ақтөбе КВН» филиалының қызметкері Алина Нұрланқызы.

Айбек СЕРІКҰЛЫ.