Әскери шеру — ел айбыны
7 мамыр күні Астанада елімізде бұрын-соңды болмаған әскери шеру өтеді. Шеруде бес мыңнан астам сарбаз сап түзеп, қарым-қабілеті күшті 200 әскери техника көрсетіледі. Ал 80-ге жуық ұшақ пен тіқұшақтар авиашоуға қатысады.
ҚР Қарулы Күштері Бас штабының хабарлауынша, мазмұндық идеясына қарай парад тарихи және заманауи бағыттағы екі бөлімнен тұрады. Тарқатып айтсақ, тарихи бөлімде 1941-1945 жылдардағы соғыс техникасының 36 түрі қатысады. Оның ішінде 27 әскери техника мен қару-жарақ, Т-34 танкі, ЗиЛ-157, ЗИС-2 зеңбірегі және М-30 гаубицасы, танымал БМ-13 РС-30 «Катюша» және «Максим» пулеметі бар. Сондай-ақ, АН-2 және ТL-2000 сынды 9 ұшу аппараты Астананың аспанында қалықтайды. Ал заманауи бөлімде бүгінгі қазақстандық армия қару-жарағын құрайтын қарулар мен әскери техниканың үлгілері көрсетіледі. Әскери қызметшілер ең соңғы үлгідегі әскери киімдерді киеді.
Шеруге қатысу үшін жалпы саны 186 қыз-келіншек іріктеліп алынды. Олардың ішінде 32 әскери қызметші санитарлық нұсқаушы үлгісінде киініп, шерудің ҰОС кезеңіндегі тарихи бөліміндегі рота құрамында болса, ал қалған 154 әскери қызметші шерудің қазіргі заманғы бөлімінде алаңда қазақстандық әскери жоғары оқу орындарының курсанттарынан кейін жеке жаяу саппен адымдайды. Шерудің сәнін келтіретін ән-жыр жағы да ұмыт қалмақ емес. Жеңістің 70 жылдығы құрметіне арналған әскерлер парадын музыкалық сүйемелдеуді Қорғаныс министрлігі құрама оркестрінің 250-ден астам әскери музыканты қамтамасыз етпекші.
Жалпы шеруге Әуе қорғанысы күштерінен 1000-ға жуық адам, С-300, С-200 зениттік-зымыран кешендері келеді. Елордадағы Қазақ елі алаңының үстінен Су-27, Су-25, МиГ-31, МиГ-29 жауынгерлік ұшақтары, Ми-17, Ми-171, Ми-26, Еurocopter тікұшақтары, Ту-134, Ту-154, АН-26, АН-72, С-295 әскери ұшақтары ұшып өтеді деп жоспарланып отыр. Сонымен бірге, әуеге тұңғыш рет Су-30СМ жаңа жауынгерлік ұшақтары көтеріледі.
Бұл мерекелік шеруге Ақтөбе облысынан 14 ардагер қатысады. Ардагерлерді Астанаға төрт адам бастап барады.Оның екеуі Ақтөбе облыстық қорғаныс істері департаментінің қызметкері, ал екеуі жедел медициналық жәрдем ауруханасының дәрігері. Делегация 6 мамыр күні ұшаққа отырады. Ардагерлер мамырдың 7-і күнгі шеруге қатысып, 8-і күні мәдени бағдарламаны тамашалайды. 9 мамырда ескерткішке гүл қойып, мамырдың 10-ы күні Ақтөбеге оралмақ.
Интернет материалдары бойынша әзірленді.
