Қоңырды сақта, көкешім…
Жанна Елеусіз
Жұлдызың жоғары болсыншы…
…мен неге –
Бұлтты аспанды ұнатамын?
Жұлдыздар көрінбейтін.
Ағызып,төмен қарай құлатады
Түн ылғи – киіп алып Өлім кейпін!..
Жалт – жұлт етіп.
Бірінен бірі – көркем:
жазғы, қысқы, көктемгі, күзгі Ойлар…
Жұлдызды қызықтама!
Күні ертең –
кететін жанұшырып,біз ғой – олар…
Бассын, мейлі, жер бетін тынық Тұман!
Өлмейтіні рас қой Шықтан – алап…
Ажал ұйықтап кеткендей – Күліп тұрам!
Аспанды жауып жатқан Бұлтқа қарап…
ххх
…біздегі Күн көөп жерлерден бөп-бөлек.
Жылыр ма еді – арқасынан қақсам Түн?
…Мен де
Ақтөбеме еркелейінші…Өкпелеп:
— Сәуір ыссы…Мамыр неге сап-салқын?..
Тәңір?..
Сізді аз ғой жерде — сүймеген.
Мен шыдаймын…
тумайды жай Күзде — өлең.
Арқасына Алақаныңыз тимеген
адам болса…
Тапсырайыншы Сізге мен?..
…Маған өзі ұнамайды — шу. Алаң.
Қала сырты — көгал…өзен…Тұнған Жыр!
Ылғи — осы…
Күн балқыса, қуанам !
Сәл жылынып қалатындай…бір Тағдыр…
ххх
…бір Адам болу керек жер бетінде
бәрінен — Жақын…Ыстық…
…мейлі!
— жан ең не деген бір тынымсыз!..
Кейде осылай келсе де – ұрсып Таңдар.
Көрінерін білсе де сырты құнсыз,
Жапырағын шешетін – қырсық Талдар,
сұрқын алып тұрса да, иілмей тым
ақ Қаланың.
Суық жел билеп тегін,
келесі Жаз келгенше киілмейтін
ілінсе де – әдемі көйлектерім,
сүйем – осы Мезгілді!
Тірі – гүлі.
Жатса да ұшып мен жаққа – бар Қорғасын!
Дүниеде СЕН дейтін Жылылығы –
Жүрегімді сақтайтын ЖАН болғасын…
ххх
…сүю деген — СҮЮ. Оны,сосын,әлемді,өмірді,бәрін,бәрін…
…мына Күн – қызық!
Тек сені –
Сағынтып барып,батады.
Сағынтып барып – шығады.
Түн де өзі – жынды секілді!
Мұңайтып барып, түседі.
Ойлантып барып – кетеді…
Таңның да есі ауған ба?
Жылатып барып – атады…
Жұлдыздардың да қатары
Жүдетіп барып – молаяр.
…барлығы Сені – түсініп!
Ал, мені бірі жоқ – аяр…
ххх
…менің сыйып жүргенім – Дүние емес,
Жаным екен, Тәңірі…Жаным екен…
…бір Гүл – солмапты.
Күз келсін…
Бұл салқын – көөп гүлді үзген шын!
Мен – нені күтемін?..
Білмеймін…
Сен кімді, соңғы Гүл, іздейсің?..
Жүрегің кімге, айтшы, сенеді?
Солмауға – бар ненің себебі?..
Адамдар ұнатса – мейірімді.
…ал, жек көрсе –
ГҮЛ болғым келеді!..
Гүл болсам – суық Жел өтінде!
Күзде де өлмеуге бекінген…
Көрмейтін – көздерді күншілдеу.
Сөздерді естімес – жекірген…
…Топырағы үшін тек – алаңдар!
ГҮЛ болып… кетейікші, адамдар?..
ххх
…Кету – керек пе? Түбі кетеміз ғой…
Қазір – бол. Ертең…
— Дүниенің ТӨРТ бұрышы бар, — дейді.
— қайда Олар?..
…сенің Мұңың бір түкпірде қаңғиды.
Мен тұратын Жайға – орал…
Білгесін бе – Жерұйығын таппасын?
Көру үшін берген Көз де — Дөңгелек.
…менің Жаным қағады Айдың қақпасын
түндер сайын… ЖЕР ме … деп.
Ештеңе де іздемеген – дұрысы.
Қай кезбеге қонды Бақ!..
СЕН және МЕН жүрген жүрек Бұрышы,
Сооол – ЖҰМАҚ…
ххх
…сосын… өмірде бір Сағынып баратын
Жолың болу керек екен…
…тағы – Жол.
Тағы – қысқа емес шақырымдары.
Алаңдауменен күн өтті бірнеше жүдеу…
«Сен жаққа емес!..»
деп біреу ақылымдағы
жымиды.
Жылап жіберді жүректе – біреу…
Солқ!..етіп іште Сағыныш.
Сол қалды. Әлі
Айыра алмай тұр Түсін Өңінен – қала.
…Әділдік болса, жердегі Жолдардың бә-әрі
Бітуі керек еді ғой — Сенімен ғана!..
…Күзде бір Шынар болатын.
Сол Шынар ма едім?..
Жел қағып, түсіре алмайтын нәзік бүрлерін…
Сен жаққа бастап, бармайтын ЖОЛ шығар менің –
ӨМІР… деп сүріп жүргенім!..
ххх
«Махаббатты Уақытпен есептейтін
мәңгүрт екен, расында, бір адамдар…»
…Жаңбыр жауған түні
мендік Мұңды ұғып.
Жүрегінің дірілімен Шын, Тірі!..
Маған – менен жүз жыл Кіші бір Жігіт:
— Ғашықпын!.. деп жыр жазады бір күні…
Жыр жазады – ең Ақиқат!
Ең адал…
Менің жерде Жоқ екенім… Болмасым
білсе де!
Бар түсінікке кереғар
Болмысымның дәлелдейді – Солмасын!..
Жыр жазады – ең Шынайы!
Ең құштар…
Таңды күтпей, күнді күтпей, кеш күтпей…
Өлең болып өтуі үшін өр Құстар
өз дауысын кететінін естіртпей…
Кім біледі, мүмкін сол бір заманда
біздің мынау болар, нәзік Мұң да — азық?..
Ақын дейтін Ауадай қат адамға
тұста шығар – Жарқ етіп, Ол, Жыр жазып!..
Мені сүйіп.
Күзде өлсе де бар үміт!
Достасады ол – Қарашаммен… Қазанмен…
Менен жасы жүз жыл Кіші сол Жігіт,
Өмір, СЕНІ СҮЮІ үшін – жазам мен…
ххх …және бір Үміт қалуы керек… Өмір жалғастығына деген…
…Жүз жылдық Мұң.
Жетеді бір басыма.
Кетем бір күн мен де үнсіз…
Баққа жайлы.
Күтсе болды адамдар — Күнді асыға!
Күтсе болды — аспаннан аппақ Айды.
Жалғыздығым Жүз жылдық…тербетуде.
Нені ойлайды екем мен – кетерімде?..
Жүрсе болды адамдар – Жер бетінде.
Жүрсе болды Балалар – жетегінде!
Бір ғасырды Шашымдай сілке тастап.
Бір ғасырды Жанымдай бауырына алып.
Келеді Ұрпақ, сенемін –
Үлкен,Асқақ!
Кеңсесі мен билігі…
Қаулы қалып.
Сонда осы — Жаныммен, Жүрегіммен!
Ғасырлардың бәрінде жүремін мен…
ххх
Өмірде көп болсаң да,өзім дейтін тұста – біреу-ақсың…
Тағы – ЖАЛҒЫЗ.
Түскен ЖАН – талапайға…
Тағы қарға шулады – орманында!
Жүрегімді орап ап қалақайға
келем.
Мұңның тастүнек жолдарында…
Тілсе, тілсін қылқаны!
Амал бар ма…
Тығып жаным Жарасын – аласұрам!..
Айналмайды адамдар – АДАМДАРҒА!
Мыстандардың өтпесем арасынан…
Үмітімді бір Мөлдір шыққа сүйреп.
Мұңдарымның Шыңына – жетіп өлем!
…жалмауызы Жаныңды жұтпасын, деп,
қалақайдан кетемін тоқып Өлең…
Күбірімнің бәрінен Көзім сөйлеп.
Туу биіктен қарармын жамандарға –
тікеніме қарамай,
«ӨЗІМ ҒОЙ!..» ДЕП!
Жүрегіне басатын Адам барда…
АВЕСТА
…ең қасиетті Кітаптай Дем болады, ол ақын үшін – ӨЛЕҢ..
…Сені көргенім – Түс.
Түс – әлі…
Біреу тойлады – мені өлді… деп.
…Гүлдер қурағанда –
дәндері ұшады.
Көрісіп қалуға – соңғы рет…
Дала махаббаты!
Неткен Жетім ең!..
Үзе алмай тағдырың шылбырын
тұрады – Сүйе алмай бетінен!
Құша алмай бір – бірін…
Күн, маған өзіңдей Төзім бер!
Түн – алдайды айтып.
Жаным шашылып қалатын Жол жайлы…
Қалада, көшеде өсетін сезімдер
дәл мендей Сағынбағасын да – солмайды…
Түсіне ешкім де, ештеңе кірмейтін
Гүлдер, сендерге бөтенмін…
Жел
қауызын мен жаққа үрлейтін
Тағдырды үнсіз күтумен – өліп кетермін…
Сені көргенім – түс.
Түс әлі…
Сенбе, айтса сол біреу – мені өлді!.. деп.
Гүлдер қурағанда – дәндері ұшады.
Көрісіп қалуға — соңғы рет…
ххх
…өзгелерден гөрі өзіңе шыдау – Қиынырақ екенін түсіндім.
Бір жол барын білгем –
өзге жолдардан.
Біреу барын – тым басқаша бәрінен…
Ол – биіктеу кісі салар қорғаннан.
Ол – бақытсыз Жүрегімен… Арымен…
Бір мұң барын білгем өзге бар мұңнан.
Біреу барын – Терең Өмір, Өлімнен…
Ол – бір Сәуле шыға бермес алдыңнан.
Ол – бір Тозақ түсе бермес көрінген…
Бұл соқпаққа көрінеді бөтен – шың.
Алла үнсіз.
Адам ділсіз.
ЖАН – қайда?..
…сен, Жүрегім, не істей алар екенсің!
Ол – жазылып қойғаннан соң маңдайға…
ххх
Тағдыр…
…Қар біледі – жүріп өткен жолымды.
Сұрашы?..
Сә-әл тоңдырып… тұрады да қолыңды!
Ол – егіліп… айтады бар Расын.
Оны күткен одан Суық бар – өлім.
Қалдырады бір күні –
Адам,
Жер,
Үйді…
Саған сіңіп кеткісі кеп Жаны оның
жаны қалмай… саусағыңда – ериді…
Менің ба-а-арлық мұңымды ішкі растап!
Сұұп – суық Қар болып кетті Жылы ақын…
…Қар деген ол – Тағдыр ғой бір АСҚАҚ!
Көрінбейтін көз жасынан тұратын…
ххх Өмір деген не? Сағыныш қана…
…Мен енді асықпаймын
Еш-те-ңе-ге!
Жанымды жаяу жүріп, аралаймын…
Көш… дей бер мына өмірден.
Көшпе, деме.
Бәрібір, бұрылмаймын.
Қарамаймын…
Баяғыдай Алысты армандамай.
Баяғыдай жүрмеймін Жанұшырып..
Маған қызық – бұтаққа қонғаны Арай.
Маған қызық – соққаны Қар ұшынып!..
Керегі жоқ, Дүние, дәнеңеңнің!
Жарығы үшін Өмірдің жаратылдым.
Маған қызық – Туғаны әр Өлеңнің!..
Маған қызық – Өскені әр ақынның…
Аяулысын жаныма Жақын етіп.
Адамдардың жаттаумен жүрмін кейпін…
Ажал келіп аларда – әлі жетіп!
Қоштасып та өзіммен үлгірмейтін…
…мен енді асықпаймын Ештеңеге…
ххх
Қайтем мұңын өзгенің –
дүниялық?
Жетер ғажап ғарыштан – Сезінерлік!
Жаманға да, жақсыға
жымия алып.
Жүргеніңнің өмірде өзі – Ерлік…
Қайтем Тылсым –
сырларын саған ашпай,
ұға алмасаң жырымнан әр Сыбырын?
Жерден тартып жатқанмен жағаласпай,
Көкке қарап өтеді – бар Ғұмырым…
ххх
Адалдық бар әлемде.
Сенгем…Тірі!
Ғұмырым аз — жылауға жәбірінен.
Бір жаманның батпайды менмендігі!
Тағдыры – өзі түзейді.
Тәңірімен…
Теңізде көбіктер де секіреді.
Мен – дағы бола алмаймын Мәңгілік ем.
Батпайды бір жаманның көкірегі!
Түзейді Тәңір өзі.
Тағдырымен…
ххх
…ҚОҢЫР-дан қасиетті Түс жоқ…
Қоңыр Мұң ғана — қолқасы мынау өмірдің.
Қоңырды сақта, Көкешім!..
Қоңыр Үн болып, қобыздан шерлі төгілдім.
Қоңыр Үй болып, тікейттім тағдыр шекесін.
Жанбыз ғой, тәні пенде де, бірақ, Жаны – құс!
Теңдесемін, деп, күніңді Күнге түсірме!..
Жапырақтарға жарасар — жалғыз сары түс.
Сарғайып жатсын Сағыныштарың – ішіңде…
Сарыға шашым бояман Жаным барында!
Қараяр.
Сосын ағарар.
Ол да – жеке сын.
Тәңірден ғана бұйырған Түсті — қабылда!
Қоңыр Еліңдей —
ҚОҢЫРДЫ сақта, Көкешім…
Гул» Жапырак… Майга пискен бауырсак…Бич пакет… картошка маркошка… Олен!!!.
*ЖЕК КӨРГЕНІ БІРЕУДІҢ ҚАНДАЙ ЖАҚСЫ.ЖАҚСЫ КӨРЕР ЖАН БАРЫН – БІЛМЕС ЕДІМ!..*ЖАННА ЕЛЕУСІЗ.
оте керемет олен))
Қандай әдемі жырлар!!!Лайым,тұнықтық болсыншы…
…Күзде бір Шынар болатын.
Сол Шынар ма едім?..
Жел қағып, түсіре алмайтын нәзік бүрлерін…
Сен жаққа бастап, бармайтын ЖОЛ шығар менің –
ӨМІР… деп сүріп жүргенім!..