Ертең Лондон Олимпиадасы басталады!

Ертең — төрткүл дүниенің назары Лондонға ауатын күн. Жерлесіміз, Балуан шолақтың ұрпағы Нұрмахан Тінәлиев «Тұманды Альбионда» дүйім қазақтың үмітіндей желбіретіп, Көк Байрақты көтеріп шығатын Олимпиадаға Алаш жұрты 116 үмітін аттандырды.

Спортшыларымыздың саны бойынша Қазақстан тек бірнеше елді ғана алдына шығарып алып отыр. Олар — дода қожайыны  Ұлыбритания (26 спорт түрі, 542 спортшы), АҚШ (25/530), Ресей (27/436), Қытай (22/330) және Еу­ро­паның алдыңғы қатарлы Германия (23/391), Франция (23/332) елдері.

Аlasharena.kz сайтында жарияланған дерек бойынша, спортшылардың саны жөнінен ТМД бойын­ша Ресей, Ук­раина және Бе­ло­рус­­сия­дан кейінгі төртінші орында тұрмыз. «Ук­раина Лондон Олимпиа­дасына 245 спортшысын жі­бермек. Бір ғана жеңіл атлети­ка­сының өзінде 78 жел­ая­ғы бар. Ал Бе­лоруссия спорт­тың 25 түрінен 166 жол­даманы жеңіп алып­ты. Бізден кейінгі орында – Өзбекстан құра­масы. Спортшыларының саны жөнінен ТМД-ның үздік бестігіне енген ала шапандылар 65 жол­дамаға ие. Әзірбайжан «Тұманды Аль­бион­ға» 50-ден астам спорт­шыларын жібермек. Ал Қырғызстан небәрі 14 спортшысын додаға қосады», — делінген сайтта.

Лондон Олимпиадасына қатысушылардың ішінде елімізден Ал­маты қаласының өкілдері көп — 28 алматылық спорттың 10 түрінен бақ­тарын сынап көретін болады. Екінші орында 17 спортшысын аттандырған Астана қаласы тұр. Жолдамалардың саны жө­нінен елордалықтар алда — 17 адам спорт­тың 19 түрінен сынға түседі. Үздік үштікте — 12 жолдамамен Оңтүстік Қазақстан облысының мықтылары.

***

Жанкүйерлердің болжамы бойынша, Лондоннан біздің спортшылар ең кемі үш алтын алып келуі керек.

Шілде айының басында спортшыларды қабылдаған Елбасы Н.Назарбаев қазақ атлеттеріне спорты дамыған 30 елдің қатарына енуді тапсырды. ҚР Спорт  және дене шынықтыру ісі жөніндегі агенттіктің төрағасы Талғат Ермегияевтің пікірінше, спортшыларымыз кемінде 13 медаль алып келеді. Соның ішінде үшеуі алтын болатынынына бек сенімді төраға: «Олай болмаған жағдайда жұмыстан кетуге дайынмын!» — деді. Егер 13 медаль алсақ, жалпыкомандалық есепте үздік 30 мемлекеттің қатарына кірер едік.

Дегенмен, жанкүйерлердің біздің спортшылар үш емес, алты алтын алып келеді деген жақсы дәмесі бар. Әсіресе, Илья Ильин, Зүлфия Чиншанло, Светлана Подобедова, Мая Манеза секілді ауыр атлеттерден, боксшылар Серік Сәпиев пен Данияр Елеусіновтен, балуандар Максим Раков пен Алмат Кебіспаев, Нұрмахан Тінәлиевтерден көпшілік үміт күтіп отыр.

Үлкен додалар алдында болжам жасайтын АҚШ-тың «USA Today» басылымының жорамалы бойынша, Қазақстан бұл додадан алты алтын еншілейді. Басылымның болжамынша, Лондонда ауыр атлеттеріміз Мая Манеза мен Светлана Подобедова, боксшы Серік Сәпиев, дзюдошы Максим Раков және грек-рим күресінен Алмат Кебіспаев пен үш қарғып секіру жаттығуынан Ольга Рыпаковалар алтын алуы мүмкін. Америкалық басылымда айтылғандай, Қазақстан командасы 24-орынға табан тіреуі мүмкін.

Жанкүйерлер, әсіресе, барлық Олимпиадалардан бір де бір рет құр қол келіп көрмеген боксшылардың бұл жолы да жүлдемен оралатынынан үмітті. Бокстан ұлттық құраманың бас бапкері Мырзағали Айтжанов 1 алтын, 1 күміс, 1 қола алып келеміз деп отыр. Жанкүйерлер үшін бұл — аз, боксшылар бұдан да жақсы жетістікке қол жеткізуге тиіс деседі. Лондонда бокстан 9 ер азамат және 2 әйел адам ел намысын қорғайды. Солардың ішінде әлем чемпионаттарында 4 мәрте үздіктер қатарынан көрінген, 2 дүркін әлем чемпионы атанған Серік Сәпиевтен (69 кг) үмітіміз мол.

Лондон Олимпиадасына жалпы есебі 286 боксшы қатысады екен. Оның ішінде 250 ер жігіт пен 36 әйел бар. АІВА  басшысы Чинг Куо Вудың айтуынша, ерлер арасында Қазақстан, Ресей, Украина, Ұлыбритания боксшылары қарымды. Ал, қыздар боксында Қытай, Ирландия, Солтүстік Корея сынды мемлекеттердің шоқтығы биік.

Еркін күрестен ұлттық құраманың бас бапкері Алтай Танабаев та Лондоннан құр қол қайтпаймыз деп уәде беріп отыр. Бас бапкердің негізгі үміті —  жеңіл сал­мақтағы Дәулет Ниязбеков пен Дәурен Жұмағазиев.

Грек-рим күресінен Қазақстанның намысын бес балуан қорғайды. Осы балуандардың бас бапкері Мұратбек Қасымхановтың айтуынша, олардың қай-қайсысы болмасын, алтын ала алады. Еліміздегі саусақпен санарлық ауыр сал­мақты балуандардың бірегейі үмітіміз Нұрмаханға дайындық барысында Қазақстаннан спарринг-серіктес таба ал­май, Грузия және Қырғызстаннан арнайы балуандар шақыртқан. Айла-амалдары көп балуан Алмат Кебіспаевтың та қоржыны майланып қайтады деген үміт зор. Басқалары да қарсыласына есе жібермеуге бекініп отыр.

***

Лондоннан жүлдемен оралғандар жерлестерімізді мынадай сыйақылар күтеді:
1-орын – баламалы мөлшерде 250 000 АҚШ доллары;
2-орын – баламалы мөлшерде 150 000 АҚШ доллары;
3-орын – баламалы мөлшерде 75 000 АҚШ доллары;
4-орын – баламалы мөлшерде 30 000 АҚШ доллары;
5-орын – баламалы мөлшерде 10 000 АҚШ доллары;
6-орын – баламалы мөлшерде 5000 АҚШ доллары.

***

Қазақстан бокс федерациясы мен «ҚазМұнайГаз» ұлттық компаниясы» АҚ

«Ұлт қуаты» ақпараттық іс-шарасы аясында ХХХ жазғы Олимпиада ойындарына арналған olympic.kfb.kz. сайтын ашты.
Сайтқа Лондонда өнер көрсететін былғары қолғап шеберлері мен ұлттық құраманың бапкерлері туралы толық мәліметтер орналастырылған. Ғаламтордағы бұл сайттан олардың жекпе-жектерінің қорытындысы,  талдамалық шолу және қазақстандық боксшылардың қарсыластары туралы мағлұматтарды, спортшылар мен жаттықтырушылар берген  сұхбаттарды да алуға болады.

***

21 шілде күні Олимпиада алауы Лондонға Корольдік теңіз әскерінің Sea King тікұшағымен жеткізілді.

Теңіз жаяу әскері Мартин Уильямс Тауэрдің үстінде қалықтап тұрған тікұшақтан темір арқанмен түсіп, 2004 жылы Афина Олимпиадасында алтын медаль иеленген, танымал жеңіл атлет Келли Холмске алауды табыстады. Холмс Ұлыбритания астанасында алауды алған бірінші адам болды, Тауэрден бұл алау эстафета бойынша Уимблдонға жіберілді.

Өткен сенбі күні таңертең Олимпиада алауының эстафетасы Лондонның көшелері бойымен өтті, оны миллиондаған адам тамашалады.

***

Ертең, Олимпиаданың бірінші күні құрметіне сағат 8:12-де бүкіл Ұлыбритания бойынша үш минут бойы мыңдаған қоңырау соғылады.

Осылайша акцияның ұйымдастырушылары әлемдік рекорд орнатпақшы. Бұл тарихи оқиға болмақ: 1952 жылдың 15 ақпанында VI Георг королін жерлеу рәсімінен кейін бірінші рет Биг Бен сағаты өзінің жұмыс кестесін бұзады.

Жобаға кез келген адам қатыса алады екен. Ол үшін жұма күні сағат 8:12-де 3 минут қоңырау шалу керек. Қоңырау қандай затпен соғылатыны бәрібір, бұл велосипедтің, есіктің құлпы немесе ұялы телефондағы арнайы қосымша болуы мүмкін.

***

Әлемдік допингтік агенттік (WADA) Лондонда өтетін Олимпиада қарсаңында іріктеу жарысында спорттың әр түрінен кем дегенде 107 спортшыны шығарып тастады.

Допингтік тест туралы мәліметтерді МОК отырысы кезінде агенттіктің басшысы Джон Фейхи келтірді. Әлемдік допингтік агенттіктегі (WADA) бұзушылықтарды спорттың әр түрінен халықаралық федерация мен лондондық Ойындардың ұйымдастырушылары анықтауға көмектесті. Допинг-бақылаудан сытылып кету  мүмкін болмапты.

***

Лондон Олимпиада қарсаңында қауіпсіздік шарасын барынша күшейтті.

Тіпті, Ұлыбританияның Қорғаныс министрлігі үйлердің шатырына зениттік ракеткаларды орналастырғысы келді. Алайда, тұрғындар наразылығынан соң, зымырандар кешені көшелерге қойылды. Мақсат — әуеден жасалатын террорлық әрекеттерден Англия астанасын сақтау. Әсіресе, 30-шы Ойындарды қабылдайтын спорттық нысандар әскерилердің жіті назарында болмақ. Ол үшін ел қазынасынан 2 миллиардтан астам АҚШ доллары жұмсалған.

Қауіпсіздік жұмыстарына бұған дейін 13 мыңнан астам сарбаз жұмылдырылады делінген еді. Енді қосымша тағы да 3,5 мың әскер бөлінді. Осылайша биыл 17 мың әскери жазғы демалысқа шықпайтын болды.

Сонымен бірге Олимпиада ойындарында қауіпсіздікті қамтамасыз етуге армия бөлімшелері, мыңдаған полицей, реактивті жойғыш ұшақтар, тікұшақтар, екі әскери кеме және жарылғыш заттарды залалсыздандыратын мамандар да жұмыс жасамақ.

Материалдар alaman.kz, alasharena.kz, inform.kz, kaztrk.kz, т.б. сайттардан алынды.

Әзірлеген М.РАХАТҚЫЗЫ.

Лондон Олимпиадасына баратын Қазақстан спортшылары кімдер?

Лондонда өтетін ХХХ жазғы Олимпиада ойындарына Қазақстан атынан 25 спорт түрінен 116 спортшы барады.

Ұтқан лицензиялар саны