Кітап — біздің досымыз

Оқуға құштар мектеп

№30 қазақ орта мектебінде «Оқуға құштар мектеп» жобасы аясында Н.Байғанин атындағы облыстық балалар кітапханасының ұйымдастыруымен қазақтың бас ақыны Абай Құнанбайұлының 180 жылдығына орай «Абай даналығы — халық мұрасы» атты челлендж өтті. Аталған челленджге мектебіміздің 1 «Ә» сынып оқушылары София Темірболат, Әнел Марат қатысып, Абайдың  «Күз», «Ғылым таппай мақтанба» өлеңдерін нақышына келтіре оқыды. Ал мектеп оқушылары Әмір Көмекбай, Айлин Симағамбет, Асхат Мүслим «Кітап — ғұмырлық қазына» атты акциясына белсенді қатысып, кітапхана оқырмандарына түрлі жанрдағы бірнеше кітап тарту етті. Аталған іс-шара оқушылардың шығармашылық қабілеттерін дамытып қана қоймай, олардың қазақ әдебиетіне деген сүйіспеншілігін арттыруға ықпал етеді.

Бастауыш сынып оқушылары үшін бұл — үлкен тәжірибе. Оқушылар «Оқуға құштар мектеп» жобасы аясында кітапханаға саяхат жасап, түрлі жанрдағы кітаптармен танысты. Балалар кітапхана қорын пайдалануды үйреніп, кітап әлеміне жақындай түсті. Бүгінде балалардың кітап оқуға деген қызығушылығының жоқтығы — түйткілді мәселенің бірі. Кітап оқу —  сауаттылықтың көзі. Рухани кемелдену заманында әр адам үнемі ізденісте болып, кітап оқуға тиіс. Алдағы уақытта да кітапханалармен бірлескен іс-шаралар жалғасын таба бермек.

 Айгүл ИСЛАМОВА,

№30 қазақ орта мектебінің

бастауыш сынып мұғалімі.

Ақтөбе қаласы.