Жұртымның жусан жырымын

Әдеби кеш

С.Бәйішев атындағы облыстық әмбебап-ғылыми кітапханасының «Қаламгер» әдеби қонақжайында ақын Гүлімай Әбішқызымен кездесу өтті.

Әдеби кешті Ақтөбе облыстық мәдениет, архивтер және құжаттама басқармасының бөлім басшысы Назимат Демешова ашып,құттықтау сөзін сөйледі. Одан кейін сөз алған Қазақстан Жазушылар одағының мүшесі, ақын Нұрлыбек Қалау  ақынның шығармашылығына тоқталып, оның әдебиет әлеміндегі орнын жоғары бағалады. Әдеби ортада есімі ерекше аталатын Гүлімайдың оқырмандары да аз болмайтыны анық. Кітапхана қызметкерлері Әсел Еркінқызы, Қызғалдақ Алпысбаева, Аманжол Сламғали өлеңдерін жатқа айтып берді. Тамды ауылының мәдениет қызметкері Нұрсұлу Нұрболатова кеш иесінің сөзіне жазылған Асқар Әнуарұлының «Қызға тілек» әнін орындады. Кеш жүргізушісі ақын Балагүл Бакиева мен оқырман қойған сұрақтар әңгіменің тамызығы болды. Орамды ойлар мен парасатты пікірлер айтылды.

Шалқардың шеге құмында өскен қыздың анасының ақ сүтінен дарыған тігіншілік өнері бар екенін де аңғардық. Ұлттық киім жөнінде өз ойларымен бөлісті. Тамды ауылы мәдениет үйінің директоры  Кенжеахмет Жұбаниязов баласы  Әлиханмен  Гүлімай Әбішқызының  сөзіне жазылған Асқар Әнуарұлының «Әке мен бала» әнін орындап, көпшіліктің көңілін көтерді. Кеш соңында кітапхана директоры Сұлушаш Хакимова кеш қонағына ризашылығын білдіріп, құрмет көрсетті.

Т.БҰРХАНҰЛЫ.