Ұлттық жобаның шарапаты: екі мектеп ашылды

Жайлы мектеп

Кеше Ақтөбе қаласында «Жайлы мектеп» ұлттық жобасы аясында салынған екі мектеп пайдалануға берілді. Оқушылардың қуанышына облыс әкімі Асхат Шахаров куә болды.

Ақжар-2 елді мекенінде жаңадан ашылған №79 жалпы білім беретін орта мектеп — Мемлекет басшысы Қасым-Жомарт Тоқаевтың елімізде білім алу үшін сапалы жағдай жасау туралы тапсырмасы аясында іске асырылды. Білім мекемесі ғимаратының құрылысын «Бабек-құрылыс» ЖШС жүргізді. Бұл мақсатта 3,2 миллиардтеңге жұмсалған.

— Мұнда 15 оқу кабинеті бар. Сондай-ақ балалардың ғылыми және шығармашылық әлеуетін дамытуға бағытталған робототехника, коворкинг аймақтары, заманауи кітапхана, шеберханалар, STEM-зертхана жасақталған. Ерекше білім беру қажеттіліктері бар балаларға да жағдай жасалды.

Қазірдің өзінде мектепке 325 оқушы қабылданды. Әзірге 16 мұғаліміміз бар, қатарымыз әлі де толығады, — дейді аталған мектептің директоры міндетін атқарушы Мәншүк Досжанова.

Салтанатты шарада сөз алған еңбек ардагері Марат Нұржанов барлық оқушы мен педагогтерге жылы лебізін арнады: «Ең бастысы, қазіргі заманға сай салынған білім мекемесінде өскелең ұрпаққа сапалы білім беру үшін толық жағдай жасалған. Немерелердің осындай жақсы жерде білім алатынына, олардың барлық бағытта дамитынына өте қуаныштымыз. Осы игі іске атсалысқан барлық азаматқа ризашылығымды білдіремін. Болашақта мектеп елді мекеннің спорттық және мәдени өмірінің де орталығына айналады деп үміттенеміз», — деді.

Оқушылар мен ата-аналармен кездескен облыс әкімі заманауи мектеп өңірдегі білім беру сапасын жақсартудағы маңызды қадам екенін атап өтті.

— Президент тапсырмасы аясында біз білім беру инфрақұрылымын белсенді дамытып жатырмыз. Жайлы мектептер — жаңа ғимараттар ғана емес, балаларымыздың дамуына барлық жағдай жасалған заманауи білім беру орталықтары. Оқушыларға сәттілік тілей отырып, осындай жайлы әрі заманауи орта ұсынған барлық мүмкіндікті тиімді пайдалануға кеңес беремін. Әрбір оқу орны жоғары стандарттарға сай болуы үшін біз осы бағыттағы жұмысымызды жалғастыра береміз, — деді Асхат Берлешұлы.

Түске жақын Есет батыр тұрғын үй алабында да «Жайлы мектеп» жобасының тағы бір жемісі — №82 жалпы білім беретін орта мектепесігін айқара ашты. Сыңғырлап тұрған зәулім ғимаратта55 оқу кабинеті, соның ішінде 28 бастауыш, 7 мектепалды даярлық тобы және 20 оқу кабинеті, 14 ағылшын кабинеті, STEM-зертхана, робототехника, тігін кабинеттері, т.б. бар. Ғимарат 2 мың шәкіртке шақталған.

— Бұл — Үкіметтің тапсырмасы бойынша тұрғызылған мектептердің бірі. Оқушылардың өз деңгейінде білім алуы үшін жайлы жағдай жасау, қажетті мамандарды тарту, оларды буллингтен қорғау — біздің басты мақсатымыз.

Жалпы,жыл соңына дейін облыс бойынша 11400 оқушыға арналған 14 мектепті пайдалануға беру жоспарланса, бүгін соның 2-ін ашып отырмыз. Ата-аналар мен оқушылар дән риза, мердігерлер де уақтылы құрылысты аяқтады, — деді облыс әкімі.

Құрылысқа жауапты «BI Global» компаниясының өкілі, жоба жетекшісі Мирлан Төлегеновтің айтуынша, мектеп 16 айда салынған. 400-ден астам құрылысшы жұмылдырылған іске барлығы 9,6 миллиард теңге бөлініпті.

Облыстық білім басқармасының басшысы Бұлбұл Күзембаевадан білгеніміздей, өңірде 405 мемлекеттік, 23 жекеменшік мектеп бар.

Айбек СЕРІКҰЛЫ.