Өнертапқыштар жобаларын таныстырды

Наурызнама онкүндігінің алтыншы күні — Жаңару күні. Бұл күн өмірдің жаңаруын, еліміздің жаңару кезеңін, дамуы мен гүлденуін бейнелейді. Мерекеге орай облыстық білім басқармасы «Ғылым. Ізденіс. Жаңалық» тақырыбында көрме ұйымдастырды. 

«Құрмет Холл» мейрамханасында өткен көрмеге инновациялық және ғылыми жобалармен айналысатын жүзден астам оқушы қатысты. Сондай-ақ білім беру ұйымдарының педагогтері мен әдіскерлері, ардагер ұстаздар көрмені тамашалады.

Көрменің мақсаты — түрлі ғылыми жаңалықтар, тәжірибелік жұмыстар арқылы оқушылардың білімге деген қызығушылығын арттыру және оқушылар арасында өзара тәжірибе алмасу. Сонымен қатар оқушылардың алған білімін өмірлік тәжірибеде қолдана білу дағдыларын қалыптастыру арқылы креативтілікті дамыту, ғылыми-шығармашылық қабілеттерін жетілдіру. Көрме барысында оқушылар өздерінің ғылыми-зерттеулерін, экологиялық жобаларын, инженерлік және техникалық шығармашылықтарын көрсетті.

Облыс әкімінің орынбасары Жолдас Батырхан көрмені аралап, балалардың жобаларын көрді. Оқушылармен тілдесіп, оларға жарқын болашақ тіледі.

Оқушылар  математика, физика, химия, биология, экология,  ақпараттық технологиялар, ауылшаруашылығы, робототехника және тағы басқа салалар бойынша жобаларын көрсетті. Робототехника үйірмесіне қатысатын Мәжит Омаров қымыз таситын робот ойлап тауыпты.

— Қазір жетінші сыныпта оқимын. Робот құрастыруды жақсы көремін. Қымыз таситын робот адамдардың жұмысын жеңілдетеді. Алдыңғы тетігін бассаңыз, қымыз құйып береді. Әзірге жоба күйінде тұр. Болашақта жетілдіріп қолданысқа енгізу ойымда бар, — дейді өнертапқыш бала. Ал қаладағы «KidStar»шығармашылық орталығына баратын Санжар Мұхтаров малдың сүйегінен түрлі кәдесыйлар жасайды. Сөреге қойған қыран құс, балық, ертегі мүсіндері келушілердің қызығушылығын тудырды.

— Жаздың күні малдың сүйегін жинап, оны станокпен тазартамыз. Арнайы аппарат арқылы өңдеп, түрлі бұйым жасаймыз. Мәселен, қыран құсты жасауға бір ай уақыт кетті, — дейді Санжар.

Ал «Bilim» мектеп-гимназиясында оқитын Мақсұт Абдурахман жабық арық ойлап тауыпты. Оқушы мұндай арық суды сүзгіден өткізеді. Ал тазартылған суды ауылшаруашылығына пайдалануға болатынын айтты. Өнертапқыш бала жобаны өндірісте қолдануүшін «Ақтөбе-Дарын» өңірлік ғылыми тәжірибелік орталығына ұсынған.

Дарынды, өнертапқыш балалардың көрмесі есте қаларлық болып өтті. Іс-шара барлық келушілер үшін үлкен мерекеге айналды.

Кәмшат ҚОПАЕВА.