Жаңа мүмкіндіктер және ұрпақтар сабақтастығы

Бизнес-форум

 Ақтөбе қаласында «Парасат» бесінші республикалық бизнес-форумы өтті.

Кәсіпкерлерге білім беру, елімізге белгілі бизнес өкілдері өз тәжірибесімен бөлісуді мақсат тұтқан бұл форумда өзекті проблемалар талқыланып қана қоймай, жаңа мүмкіндіктер мен серіктестестер табу алаңына айналды.

Форум спикерлері бизнес жүргізу тәжірибесімен бөлісіп, басқару ісінде пайдалы кеңес берді. Ұлттық бизнесті дамыту стратегиясы туралы айтылды.  Сонымен қатар форум жұмысында мәдениет майталмандары — Асанәлі Әшімов, Меруерт Өтекешова, Алтынбек Қоразбаев сияқты танымал тұлғалар сөз сөйлеп, өмір жолындағы жеткен жетістіктерімен бөлісті, алға қойған мақсатқа жету үшін аянбай еңбек ету керектігін айтты.

— Мұндай іс-шара өзекті тақырыптарды талқылап қана қоймай, тәжірибе алмасып және елдің дамуына оң әсер ететін білім мен бизнестің бағытын анықтайтын орта қалыптастыратыны сөзсіз, — деді форумды ұйымдастырушылардың бірі, модератор Ғалымжан Кеңшілік.

Форумда спикерлер арасында Forbes Қазақстан тізіміне енген «Tan Media Group» медиа холдингінің негізін қалаушы Арманжан Байтасов, іскер әйел, меценат, әлемдік киім және зергерлік бұйымдар брендтерінің ресми дистрибьюторы Жанна Кан, халықаралық сервистің негізін қалаушы және бас директоры Арсен Томский, облыстық мәслихат депутаты, кәсіпкер Күлшат Масалимовалар кәсіп бастағысы келетін жастарға бағыт-бағдар беріп, жұмыстың көзін тауып, табысты кәсіпкер атанудың қыр-сырымен бөлісті.

— Ақтөбеде алғаш рет ұйымдастырылған мұндай бизнес-форумның пайдасы зор. Бұл кәсіп бастаушылар үшін үлкен қолдау болады деп есептеймін. Бір-бірімізбен пікір алмасып, тәжірибемізбен бөлістік. Әсіресе бұл жиынның еркін форматта, сұрақ-жауап ретінде өткені жұртшылықтың қызығушылығын тудырды. Форум пікір алмасу мен тәжірибе бөлісу алаңы ғана емес, сонымен қатар жаңа ынтымақтастық пен серіктестіктердің бастауы болды. Алдағы уақытта да осындай мазмұнды кездесулерде жолығамыз деп үміттенеміз, — дейді форумға қатысқан «Алихан ойл-3» ЖШС басшысы Зұлқожа Қожаев.

Форум жұмысы кезінде руханияттың бизнеске әсері туралы тақырыптар қозғалды. Жиын барысында «Ұрпақтар сабақтастығы» панельдік сессиясы өтті. Мақсаты — өңірімізді инвесторлар мен болашақ серіктестер үшін тартымды етіп көрсету.

Форум барысында талқыланған мәселелер мен ұсыныстар болашақта жаңа идеялардың жүзеге асуына ықпал ететіні айтылды.

 Талғат ТІЛЕУЛЕСОВ.