Ақтөбеде басталды, Байқоңырда жалғасады

10 Қараша 2011

757

Олимпиада

Сейсенбіде Достық үйінде ел Тәуелсіздігіне 20 жыл және тұңғыш ғарышкер Юрий Гагариннің ғарышқа ұшқанына 50 жыл толуына орай VII Азия-Тынықмұхиттық астрономия олимпиадасының ашылу салтанаты өтті.

Облыстық планетарий ұжымы ұйымдастырған ауқымды олимпиаданы ең әуелі облыстық әкімшілік қолдады. Астанадан «ҚазҒарыш» агенттігінің өкілі, ғарышкер-сынақшы Айдын Айымбетов, Алматыдан жазушы-фантаст Жүніс Сахиев келді.

Олимпиаданың Орталық комитетінің төрағасы Михаил Гаврилов Азия-Тынық мұхит елдері арасында кеңінен танымал олимпиаданың тарихына қысқаша тоқталып, қатысушыларға сәттілік тіледі.

Ашылу салтанатынан соң олимпиадаға қатысушылар «ҚазҒарыш» агенттігінің өкілі, ғарышкер-сынақшы Айдын Айымбетовпен кездесті. Бұйырса, алдағы уақытта ғарышқа ұшатын үшінші қазақ оқушыларға «ҚазҒарыштың» тыныс-тіршілігі жайында дәріс оқыды.

Облыстық планетарийдің директоры Қорлан Бөлековтің айтуынша, 8 қарашада басталған білім сайысына қатысқан 65 жас астроном екі топ бойынша сынға түсіп жатыр. Бірінші топта 7-8-9 сыныпта оқитын оқушылар, ересектер тобында 10-11 сынып оқушылары бар.

Кеше қатысушы оқушылар олимпиада бағдарламасына сәйкес Байқоңыр ғарыш айлағына саяхаттап кетті.

Айнұр ІЛИЯСҚЫЗЫ.