Өңір басшысы Асхат Шахаров БАҚ қызметкерлерін кәсіби мерекелерімен құттықтады
28 маусым – елімізде бұқаралық ақпарат құралдары қызметкерлері күні атап өтіледі. Осы мерекеге орай салтанатты шара өтіп, осы мамандықтың өкілдері құрметке ие болды.
Облыс әкімі Асхат Шахаров БАҚ қызметкерлерін кәсіби мерекемен құттықтады.
«Сіздердің жұмыстарыңыз күрделі әрі өте жауапты. Журналистердің ақпаратын қоғам қалай қабылдайтыны көбінесе бір сөзге, бір сөйлемге, тіпті бір санға байланысты. Сондықтан біз еңбектеріңізді әрдайым бағалаймыз және бағалай береміз. Өйткені, БАҚ өкілдері билік пен бұқараның арасындағы көпір, қабылданған шешімдер мен атқарылып жатқан жұмыстарды хабардар етуде айырықша миссияға ие», – деп атап өтті әкім.
Асхат Шахаров өзінің құттықтау сөзінде жақында Мемлекет басшысы қол қойған «Масс-медиа туралы» жаңа заңға да назар аударды.
«Бүгінде облысымызда 42 бұқаралық ақпарат құралдары жұмыс істейді. Оның ішінде іргелі, өзіндік тарихы бар бұқаралық ақпарат құралдары да баршылық. Олар да басқа отандық БАҚ секілді әлеуметтік желілер қарқын алып, ақпарат берудің көздері пайда болған кезде жаңа жағдайда дамып келеді.
Осыған байланысты жақында Қазақстан Республикасының Президенті қол қойған «Масс-медиа туралы» жаңа заңының қажеттілігі туындады. Бұл заң бұқаралық ақпарат құралдары қызметкерлері үшін үлкен мүмкіндікке жол ашады, мемлекет, қоғам және БАҚ арасындағы қарым-қатынастарды жаңа деңгейге көтереді», – деді әкім.
Салтанатты жағдайда Асхат Шахаров БАҚ қызметкерлеріне ел Президентінің Жарлығымен бекіген мемлекеттік наградаларды табыс етті. Журналистика мен телевизияның дамуына қосқан үлесі үшін «Құрмет» орденімен облыстық «Ақтөбе» газетінің ардагері Аманқос Орынғалиев, «Ерен еңбегі үшін»медалімен «Диапазон» газетінің тілшісі Альмира Алишбаева марапатталды. Мемлекет басшысының Алғыс хаты «Астана» телеарнасының операторы Нұркен Жалмұхановқа берілді.
Сонымен қатар, бірқатар БАҚ қызметкерлеріне Қазақстан Республикасы Мәдениет және ақпарат министрлігінің «Еңбек ардагері» медальдары, «Ақпарат саласының үздігі» төсбелгісі, ҚР Мәдениет және ақпарат министрінің «Құрмет грамоталары», сондай-ақ облыс және қала әкімдерінің Алғыс хаттары табыс етілді.
«Ақтөбеге – 155 жыл» мерейтойлық медальдары журналистика ардагерлері, жергілікті телеарналар мен газеттердің директорларына табыс етілді.
Д.АЙДАР.
