Күйшіге арналған кеш
Ш.Берсиев атындағы аудандық өнер және өлке тарихы музейінде ойылдық күйші Сәулебай Ерубайұлының 160 жылдығына арналған тарихи-танымдық кеш ұйымдастырылды.
Іс-шара «Ойыл» мешітінде Сәулебай Ерубайұлына Құран бағыштаумен басталды. «Шұғыла» мәдени-демалыс орталығында өткен кешке дәулескер күйшінің ұрпақтары, еңбек ардагерлері, Ойыл аудандық балалар музыка мектебінің ұстаздары мен өнерпаз оқушылар, мәдениет қызметкерлері қатысты.
— Сәулебай Ерубайұлы өз заманындағы Ойылдың даңқын шығарған дәулескер күйші болған. Күйшінің туғанына 160 жыл толуына арналған іс-шараға өңірдің түкпір-түкпірінен ел азаматтары жиналды. Белгілі қаламгер Нұрлыбек Қалауов шығарған «Ақтөбе облысының күй өнері» антологиясына Сәулебай атамыз туралы мол мағлұмат енгізілген. Іс-шарада осы кітап та таныстырылды, — дейді Ш.Берсиев атындағы Ойыл аудандық өнер және өлке тарихы музейінің директоры Балқия Рысбаева.
Салтанатты іс-шара соңында Ойыл аудандық балалар музыка мектебінің оқушылары мен ұстаздары өз өнерін көрсетсе, ауыл азаматтары мен мәдениет қайраткерлері күйші туралы естеліктерімен бөлісті.
Ақмарал МҰҚАШЕВА.
Ойыл ауданы.