Жаңа Coworking-орталығының хромтаулық жастарға берер мүмкіндігі мол

Ералы Тоғжанов Хромтау аудандық жастар ресурстық орталығында жастардың бастамасымен және аудан әкімдігінің қолдауымен ашылған жаңа Coworking-орталығын аралады. 

Хромтау ауданында 14-35 жас аралығындағы он екі мыңнан астам жас бар. Коворкинг орталығы жастарды біріктіру мақсатында ашылды. Мұнда әртүрлі тақырыптық аймақтар құрылды, сонымен қатар мобилография, сурет салу, дрондарды басқару, шешендік өнердің тегін курстары бар.

Алдағы уақытта ағылшын, би, қолөнер, актерлік шеберлік курстарын ашу жоспарлануда.

Жеке инвестицияларды тартудың арқасында Хромтаудағы ескі «Балдәурен» балалар ойын кешені қайта жасалып, атауы Avеnue деп өзгертілді. Естеріңізге сала кетейік, «Балдәурен» Дөң тау-кен байыту комбинатына тиесілі болған. Кешен көптеген жылдар бойы жұмыс істемей тұрды және осы жылдың көктемінде аудан әкімдігінің балансына берілді. Кейінірек «Техгазмонтаж» ЖШС қаржыландырып, саябақты сенімгерлік басқаруға алды.

Саябақтың аумағы толығымен абаттандырылды, асфальт төсеу, көгалдандыру, жарықтандыру жұмыстары жүргізілді. Кафе, автодром қалпына келтірілді және жаңа аттракциондар орнатылды: карусельдер, слайдтар, батуттар, қайықтар және т.б. Бүгінгі таңда тартылған инвестициялардың жалпы көлемі – 175 млн теңге. Саябақты жарақтандыру жұмыстары әлі де жалғасуда.

Д.АЙДАР