Оқырманды асыға күтеміз
Экскурсия
М.Ломоносов атындағы қалалық орталық кітапхана жуырда жаңа ғимаратқа қоныс аударды.
Кітапхана бұрын апаттық ғимаратта орналасқан болатын. Енді оған облыстық тарихи-өлкетану музейінің бұрынғы ғимараты беріліп отыр. Жөндеуден өткен тарихи ғимаратта залдар жарық, кең, бұрынғыға қарағанда жұмыс жасауға ыңғайлы. Оқырманның кітап оқып қана қоймай, демалуына да жағдай жасалған, шеберлік сабақтарын, семинар-тренингтер өткізуге арналған коворкинг орталық бар.
Жақында кішкентай оқырмандар үшін «Мен бақытты баламын» атты шара ұйымдастырылып,оған М.Құсайынов атындағы облыстық дарынды балаларға арналған мамандандырылған мектеп-интернатының тәрбиеленушілері қатысты,кітапханаға экскурсия жасалды.
Қала тұрғындары мен қонақтары үшін кітапхананың есігі әрдайым ашық. Әсіресе жазғы демалыс кезінде жас оқырмандарды асыға күтеміз.
Гүлзайда ТАМАБАЙ,
Ақтөбе қалалық орталықтандырылған кітапхана
жүйесінің әдіскері.