104 жастағы әженің батасы

Байғанин ауданының халқы да референдумға белсенді қатысты. Бәрінің көңіл күйлері шат. Олар халыққа жақын, ел-жұрттің сұранысы негізінде әзірленген Конституциялық реформаның саяси жүйені түбегейлі өзгертетініне сенеді.   Сол себепті де таңертең ертемен өз таңдауларын жасауға ықыласты халық легі көп болды.
Жалпы аудан бойынша ​ 14​ 006 сайлаушы бар.
Аудан әкімі аппаратының басшысы Нұржан Жаниннің мәліметінше, жалпы саны 24 референдум учаскесі жұмыс жасап жатыр. Аудан орталығы Қарауылкелдіде 5 учаске бар. 18  жасқа толып, бірінші рет сайлауда таңдауын жасайтын жастардың үлесі – 115 адам.
– Аудан бойынша ең үлкен тұрғын  Тұраш Құдайқұлова – 104 жаста. Ол Жаңажол ауылдық округі Оймауыт ауылында тұрады.  Комиссия мүшелері кейуананың үйіне арнайы барып, үлкен кісінің  өз таңдауын жасауына мүмкіндік жасады. Әже «Ел аман, жұрт тыныш, бейбіт заман болсын»,-  деп ақ батасын берді, – дейді Нұржан Жанин.

Г.БАЗЫЛҚЫЗЫ.