Гүлмира — келіндер сайысының жеңімпазы
Сайыс
Өткен аптада «Арай» мәдениет үйінде «Пай-пай, қазақтың келіндері-ай!» атты аудандық келіндер сайысы өтті.
Ұлттық салт-дәстүрді, тіліміз бен дінімізді өскелең ұрпаққа насихаттау, неке мен отбасы құндылықтарын алға тарту мақсатында өткен сайысқа аудандағы ауылдық округтерден 8 келін қатысты. Олар сайыстың ережесіне сәйкес 4 кезең бойынша сынға түсті.
Бірінші кезеңде қатысушылар өздерін таныстырса, екінші кезең — «Бәйгеде» ұлттық салт-дәстүр, әдет-ғұрыпқа байланысты сұрақтарға жауап берді. Ал «Өнерлі келін — өнегелі келін» атты бөлімде келіндер өз өнерлерін көрсетіп, әннен шашу шашты. «Шебердің қолы ортақ» атты 4-кезеңде келіндер өздерінің тоқыған, тіккен қолөнер бұйымдары мен әзірлеген ас мәзірлерін қазылар алқасына ұсынды.
Сайыстың қорытындысы бойынша келіндер арасында Ырғыз ауылынан қатысқан Гүлмира Ахметова бас жүлдені жеңіп алса, 1-орынды Ырғыз ауылының тұрғыны Дана Орысбай иеленді. Ал 2-орын мен 3-орын осы ауылдың атынан қатысқан Гүлжайнар Балтабаева мен Гүлімай Жақсылыққа бұйырды.
Шара соңында жеңімпаздар арнайы дипломдар мен ақшалай сыйлықтармен
марапатталып, қатысушыларға Алғыс хаттар табысталды.
Д.ҚАЗИХАН,
Ырғыз ауданы.