Экологиялық мәселелерді кешенді шешудің жол картасы жасалады
Экология министрлігі Ақтөбе облысында экологиялық тұрақтандырудың кешенді шараларын іске асыруды жоспарлауда. Ақтөбеліктер министрлікке өңірдің экологиялық проблемаларын шешу жоспарын құруға көмектеседі.
Ақтөбе облысының эко-белсенділері мен Экология, геология және табиғи ресурстар министрлігі мамандары облыстың экологиялық проблемаларын кешенді шешудің жол картасын әзірлейді. Бұл туралы министр Мағзұм Мырзағалиев өзініңTwitter-дегі парақшасында хабарлады.
— Ақтөбе облысы жұртшылығы өңірдегі экологиялық ахуал туралы әлеуметтік желіде бірқатар мәселелер көтеруде. Бүгін эко-белсенділермен, жұртшылықпен осы себеппен онлайн-кездесу өткіздік. Қатысушылар атмосфералық ауаны мониторингілеу, ластаушы көздер туралы толғандырған мәселелерді, сондай-ақ проблемаларды шешудегі өз көзқарастарын білдірді. Кездесу қорытындысында эко-белсенділермен бірге жақын аралықта эмиссияларды қысқарту, жасыл белдеуді дамыту, өндіріс қалдықтарын басқару шараларын қарастыратын облыстың экологиялық проблемаларын кешенді шешудің жол картасын жасап, бекіту келісілді, — деп хабарлады М.Мырзағалиев.
Ол өз сөзінде бұл шаралардың барлығы кейін Ақтөбе облысы әкімдігімен бірге іске асырылатынын айтып: «Осы жұмыстарға үн қосқан ақтөбеліктерге алғыс білдіремін. Барлығымыз бірге айтарлықтай нәтижеге қол жеткізе аламыз», — деп ризашылық білдірді.
Оның айтуынша, министрлік еліміздің басқа өңірлерінде де осындай кездесулер ұйымдастыруды жоспарлап отыр.
Облыс әкімінің баспасөз қызметі.
