Қазақстан даму жолына түсті
Өткен аптаның аяғында Мемлекет басшысы Нұрсұлтан Назарбаевтың төрағалығымен Ақордада еліміздің үдемелі индустриялық-инновациялық даму бағдарламасы талқыланды. Оған Премьер-Министр Кәрім Мәсімов, Президент Әкімшілігінің Басшысы Аслан Мусин, Мемлекеттік хатшы – Сыртқы істер министрі Қанат Саудабаев, Үкімет мүшелері, орталық мемлекеттік атқару органдарының басшылары мен еліміздің барлық өңірлерінің әкімдері қатысты.
Ақордада Қазақстанның индустриялық даму мәселесі талқыланды. Мемлекет басшысы Үкіметтің беріп отырған ақпараты бойынша 191 ірі жобаны іске қосу қажеттігін, ол жобалардың ауқымы 4,7 триллион теңгені құрайтындығын, бұл жобалардың 144-і биыл пайдалануға берілетіндігін, соның 141-і әкімдіктердің жауапкершілігінде екендігін айтты. Қалған үш жобаны “ҚазАгро” холдингі жүзеге асыруы керек.
Осы арада Елбасы былтырғы жылы “Жол картасын” жүзеге асыру арқылы әкімдердің халықтан жақсы пікірлер естіп, ұпай алғандығын, биылғы қатаң қыстың елімізге, әсіресе, Шығыс Қазақстан, Павлодар облыстарына ауыр тигенін, бұл қиындықтан да шығып келе жатқандығымызды тілге тиек етіп, осы атқарылған шаруаларда әкімдердің үлесі көп екендігін еске алды.
Индустрия және сауда министрі Әсет Исекешевтің айтуынша, 144 жобаның жалпы құны — 854 миллиард теңге. Осы жұмыс биыл жүзеге асқан жағдайда елімізде 20 мыңға тарта тұрақты жұмыс орны ашылады. 44 жоба бойынша үлкен құрылыс жұмыстары жүреді. Оған 100 мыңға тарта адам қатыстырылады. Бұл шаруаның барлығы Елбасының тікелей тапсырмасымен құрылған республикалық және өңірлік басқарушы орталықтардың бақылауында тұр.
Елбасы Жолдауынан туындайтын басқа да жобалар қарастырылып жатыр. Қазір Үкімет қарауында 238 жоба бар. Олардың жалпы сомасы — 7,5 триллион теңге. Осы жобалардың барлығы республикалық және өңірлік индустрияландыру картасына енгізілуі әбден мүмкін. Жүзеге асырылуы қолға алынған әрбір жоба бойынша нақты жауапты тұлғалар мен ол жобалардың іске қосылу уақыты белгіленген.
Биыл пайдалануға берілетін жобаларда Ақтөбе облысының еншісі мол. Ақтөбеде құны 95 миллиард теңге болатын 24 жоба іске асырылмақ. Инвестицияның неғұрлым ірі көлемі Шығыс Қазақстан (148 миллиард теңгенің 11 жобасы), Павлодар (145 миллиард теңгенің 13 жобасы) облыстарының үлесіне тиеді. Ең көп жұмыс орны Жамбыл облысында (9 жоба бойынша 3668 жұмыс орны) құрылады. Осы жылдың бірінші жартыжылдығында іске қосылатын жобалар бойынша 1 наурыздағы мәлімет бойынша Ақмола (97 пайыз), Маңғыстау (96 пайыз) облыстары алда келеді. Екінші жартыжылдықта іске қосылатын жобалар бойынша инвестицияларды игеру деңгейі Солтүстік Қазақстан (81 пайыз), Оңтүстік Қазақстан (71 пайыз) облыстарында жақсы жағдайда.
Әсет Исекешев әр облыс бойынша жүзеге асатын ірі инвестициялық жобаларға тоқталып өтті. Жалпы, үстіміздегі жылдың бірінші жартысының өзінде 367 миллиард теңгенің 71 жобасы жүзеге аспақ. Ал жыл соңына дейін тағы да 70 жоба іске қосылады. Олардың көпшілігі серпінді жобалар болып есептеледі.
Кеңесте Павлодар, Шығыс Қазақстан, Ақмола, Ақтөбе, Қарағанды, Батыс Қазақстан облыстарының әкімдері және Қаржы министрі Болат Жәмішев сөз алып, жүзеге асатын жобалар жайын баяндады.
Елеусін Сағындықов 2010 жылы жобаларды жүзеге асыру нәтижесінде ел өңіріне келетін инвестиция көлемі 1,3 есе артатындығын айтты. 2015 жылға таман Ақтөбе облысында осындай іргелі істердің нәтижесінде жұмыссыздық деңгейі 4 пайыздан аспайтын болады. Барлық шағын қалалар мен ауылдық елді мекендер таза ауызсумен қамтамасыз етіледі. Осы кезеңде шағын және орта кәсіпорындарда жұмыс істейтін адамдардың үлесі барлық экономикалық белсенді халықтың 50 пайызынан асып түсетін болады. Облыс әкімі Елбасының Жолдауын облыс жастарының қызу қолдап отырғандығын, олар «Ауылдың гүлденуі — Қазақстанның гүлденуі» деген ұранмен елді мекендерді абаттандыру ісіне кіріскендігін, оған 70 мыңнан астам қыздар мен жігіттер қатысып, 360-қа тарта жұмыс отрядтары құрылатындығын айтты.
Елбасы Ақтөбе облысындағы жастардың бұл бастамасына жақсы баға берді.
— Бұл Қазақстанның Тәуелсіздігінің 20 жылдығы қарсаңындағы жақсы акция, — деп атап өтті Президент.
Кеңесте кадр саясаты жөнінде кең әңгіме болды. Президент Әкімшілігінің Басшысы Аслан Мусиннің айтуынша, 60 вице-министр мен жауапты хатшының 18-інің өңірлерде жұмыс істеу тәжірибесі жоқ. Ал 329 өңірлік деңгейдегі басшылар зейнеткерлік және зейнеталды жасқа жетіп тұр. «Осыған орай орталық органдардан өңірлерге және өңірлерден орталыққа 100-ден астам саяси және әкімшіліктік мемлекеттік қызметкерді ротациялау туралы ұсыныс енгіземіз», — деді А.Мусин.
Бірінші кезекте 100 саяси және әкімшілік саласындағы мемлекеттік қызметкерді орталық органдардан өңірлерге ауыстыру көзделуде. Бұл шара өңірлерді біліктілігі жеткілікті басшылармен қамтамасыз етуге мүмкіндік берсе, екіншіден, жергілікті мемлекеттік атқару органдарынан бай тәжірибелі және жергілікті жердің жағдайын жақсы білетін жауапты қызметкерлерін орталық органдарда сынап көруге қолайлы жағдай туғызатын болады.
Кеңесті Мемлекет басшысы Нұрсұлтан Назарбаев қорытындылады. Елбасы өз сөзінде үдемелі индустриялық-инновациялық бағдарламаны тиімді жүзеге асыру үшін бірқатар орталық мемлекеттік органдардың қызметі қайта құрылымдалатындығын айтып, осы өзгерістермен жиналғандарды таныстырды. Бұл өзгерістер еліміздің экономикалық қызмет саласындағы бірқатар министрліктер мен агенттіктерін қамтитын болады.
Бүгінгі күні Қазақстанда индустрияландыруды табысты жүргізудің барлық мүмкіндіктері бар деп есептеуге болады. Айқын стратегия бар, қаржыландыру көздері анықталған, әрбір жоба дербес жауапкершілікке тапсырылған. Бизнеске қолайлы жағдайлар туғызылуда. Тиімді басқару жүйесі мен нәтижелерді бағалау өлшемдері қалыптастырылуда. Енді беріле отырып жұмыс істеу керек.
Елбасы шағын және орта бизнеске қолайлы жағдай туғызу мәселесіне ерекше тоқталып, өңір басшыларының шағын және орта бизнеске жағымды ықпал ете отырып, өзіндік салық базасын арттыруы керектігін айтты.
Өкінішке қарай, бизнеспен нақты жұмыс істеудің орнына кейбір әкімдіктер көптеген тиімсіз комиссиялар мен кеңестер құрудан аса алмай отыр. Мұндай комиссиялардың саны кейбір жерлерде 60-қа дейін жеткен. Орталық органдарда да осындай жағдай орын алуда. Аталған мәселеге байланысты Мемлекет басшысы Үкіметке комиссиялардың санын күрт қысқартуды, ал Президент Әкімшілігіне осы мәселені бақылауға алуды тапсырды. Сондай-ақ барлық өңірлер басшыларына кәсіпкерлермен тоқсанына кем дегенде бір рет кездесіп, олардың проблемаларына үңілу міндеті жүктелді. Мұндай жұмыстарды банктермен де жүргізіп отыру қажеттігі ескертілді. Өз кезегінде банктер несиелік қаржыларды өз мерзімінде қайтарып алуға барынша көңіл бөлгені орынды.
Елбасы іске қосылған кәсіпорындарындағы жұмыс барысы бұдан былай үнемі назарда болуы керек дегенді айтты. Өндірілген өнімді өткізудің жаңа рыноктарын іздестіру – маңызды міндеттердің бірі. Осыған орай құрылып отырған Кедендік одақтың мүмкіндіктерін пайдалану, қазақстандық тауар өндірушінің осы үлкен рынокқа шығуына тиісті алғышарттардың бәрін қалыптастыру керек.
Индустрияландыру халықтың тұрмыс сапасы мен өмір сүру деңгейін арттыруға бағытталады. Елімізде бұл бағдарламаның қолға алынуы көші-қон мәселесіне де қозғау салатыны түсінікті. Демек, тиімді көші-қон саясатын қалыптастырып, жүзеге асыру, қуат үнемдегіш технологияларды енгізу қажет.
Елбасы өз сөзін аяқтай келе биылғы жылдың ел өмірінде із қалдырар оқиғаларға толы екендігін жеткізді. Қазақстан ЕҚЫҰ-ға төрағалық етуде. Биылғы жылы Ұлы Отан соғысындағы Жеңістің 65 жылдығын, еліміздің Ата Заңы — Конституцияның 15 жылдығын атап өтеміз. Осы оқиғаларды ұйымдасқан түрде өз деңгейінде, бекітілген жоспарға сәйкес өткізу — Үкімет пен барлық деңгейдегі әкімдердің міндеті.
Кеңесте биыл Елбасының 70 жылдығын бүкілхалықтық мереке ретінде атап өту жөнінде ұсыныс айтылған болатын. Елбасы бұл ұсыныстан бас тартты. Мұндай мәселені қайта көтермеуді ескертті. Негізгі міндет, ойға алып отырған асқаралы жұмыстарды жүзеге асыру және халыққа қатысты мерекелерді лайықты атап өту екендігін жеткізді.
www.egemen.kz — материалдары бойынша әзірленді.