Ұлттық бірлік – біздің стратегиялық таңдауымыз
Дүйсенбі күні Астанадағы Бейбітшілік және келісім сарайында Қазақстан халқы Ассамблеясының ХV сессиясы болды. Онда Мемлекет басшысы, Қазақстан халқы Ассамблеясының Төрағасы Нұрсұлтан Назарбаев “Ұлттық бірлік – біздің стратегиялық таңдауымыз” деген тақырыпта баяндама жасады.
Нұрсұлтан НАЗАРБАЕВ:
Құрметті Ассамблея мүшелері!
Қымбатты сессия меймандары!
Сіздерді Қазақстан халқы Ассамблеясы 15-ші сессиясының ашылуымен шын жүректен құттықтаймын!
Ассамблея – еліміздегі бірлік пен келісімнің киелі бесігі, тұтастық пен тұрақтылықтың құтты шаңырағы. Оның әрбір сессиясында мемлекет өміріндегі өзекті мәселелер талқыланып, келелі шешімдер қабылданып келеді.
Бұл саяси құрылым халқымыздың жүрек қалауымен, қоғамның ізгі тілегімен құрылған. Сондықтан көпшіліктің көкейінде жүрген маңызды мәселелер осы мінберде айтылуда.
Ассамблея осы жылдар ішінде байсалды жолдан өтіп, байыпты тәжірибе жинақтады. Ол еліміздегі этносаралық қарым-қатынасты дамытудың іргелі институтына, татулық пен сыйластықтың берекелі бекетіне айналды.
Мәртебелі органның сессияларында қоғамдық өмірдің сан саласын қамтитын, оның келбетіне ықпал жасайтын әлеуметтік мәні зор мәселелер де талқыланды.
Біздің үлгімізді шетелдік мәртебелі меймандар да өнеге тұтуда. Олар сессия жұмысына арнайы қатысып, Ассамблея қызметінің жаңа қырларын үйренуде, бағыт-бағдарынан тәлім алуда.
Ең бастысы, Ассамблеяның әрбір сессиясын қарапайым халық тағатсыздана күтеді. Өйткені барлық этносты бауырына басып, құшағына алған бұл құрылымның әрбір жиынында ортақ Отанымыздың келешегіне қатысты аса маңызды ой-пікірлер, ұсыныстар ортаға салынады. Сессияның бүгінгі мәжілісінде де осындай өзекті мәселелер талқыланып, шешім қабылданады деп сенемін.
Құрметті Ассамблея мүшелері!
Қымбатты сессияға қатысушылар!
Бүгін біз өте маңызды мәселені – Қазақстанның Ұлт бірлігі доктринасы туралы мәселені талқылауға жиналдық.
Ассамблеяның осы сессиясы күрделі кезеңде өтіп отыр.
Жаһандық экономиканың күйреп түсуі әлемдегі этносаралық және дінаралық қатынастар проблемасын ушықтырып жіберді. Мысалдар көп-ақ – Кавказ, Таяу және Орта Шығыс, Орталық және Шығыс Африка елдері. Дәл осындай кезеңде ұлттың топтасқандығы мен бірлігін сақтаған елдер дағдарысқа қарсы табыстырақ әрекет етуде, тұрақты дамып, жаңа биіктерге қол жеткізуде. Ешқандай қысылып-қымтырылмастан біздің Қазақстанды осындай мемлекеттер қатарына жатқызуға болады.
Жаһандық дағдарыс бізге аңдаусызда келген жоқ. Біз оған әзір едік. Мемлекеттің дағдарысқа қарсы ауқымды шараларының мәні мынада еді, дағдарыстың әлеуметтік құны қазақстандықтар үшін барынша төмен болуы тиіс. Біз үшін Ұлттық қор, сондай-ақ теңдестірілген бюджет саясаты қауіпсіздік жастығына айналды.
Мемлекет банк жүйесіне, шағын және орта бизнеске, аграрлық секторға қолдау білдірді. Көмек әр ауылға дейін жетті, мұны сіздер білесіздер.
Ел өңірлерінде болып, мен халық мемлекеттің шараларын қолдайтынына, біздің бірлігіміз бен келісіміміз қай кездегіден де күшті екеніне тағы да көз жеткіздім.
Сондықтан да мен өз үзеңгілестеріме – Қазақстан халқы Ассамблеясының барлық мүшелеріне осынау күрделі кезеңдегі сіздердің қолдауларыңыз үшін шынайы ризашылық сөздерін айтқым келеді!
Сіздердің 1995 жылы Ассамблеяның бірінші сессиясы жұмысына қатысқандарыңыз сол тарихи форумда өркен жайған көңіл күйді еске түсірулеріңізге болады.
Ол кезде біз елдің барлық патриоттық күштері біріккен жаңа тұрпатты институтты қалыптастырдық. Біз эволюциялық даму мен саламатты прагматизмнің пайдасына, қарапайым адамдардың берекеттілігі мен өркендеуі үшін тоталитарлық өткеннен, сілкіністер мен жұмылдырушылық жолынан біржолата бас тарттық. Нақ осыны біз ҚХА-ның басты мақсаты етіп қойдық.
Ассамблея әрдайым сауатты да нақты әрекет еткенін атап өткім келеді. Сондықтан да біздің еліміздің сенімді өрлеуі авторларының бірі болды.
Бүгінде Ассамблея арнаулы Заңмен айқындалған жаңа құқықтық мәртебенің аясында жұмыс істейді. Ол ұйымдық тұрғыда әлдеқайда күшейтілді.
Ассамблея Парламент Мәжілісінің 9 депутатын сайлайды, осылайша, жас қазақстандық демократияның іс-қимыл үстіндегі күшіне айналды.
Қазақстан халқы Ассамблеясының жұмыс тәжірибесі шетелде кеңінен белгілі. Бұл тәжірибені АҚШ-та, Қытайда, Ресейде, Францияда, Ұлыбританияда және басқа елдерде зерттеу үстінде.
Тұтастай алғанда Қазақстан халқы Ассамблеясы – таза қазақстандық саяси жаңашылдықтың нәтижесінде қалыптасқан өзіндік те бірегей институт. Ол этносаралық және конфессияаралық келісімнің басты тетігі ретінде ел тарихында маңызды рөл атқарды және атқарып келеді.
Бүгінде біздің Ассамблея кәмелеттік кезеңге аяқ басты. Біз оның қызметі жаңа жүйелік қасиеттер дарытуға тиіс шепке келіп жеттік.
Біріншіден, бүгінде Ассамблея елдің барлық мемлекеттік және қоғамдық институттары секілді жаһандық дағдарыс айқындап берген күрделі жағдайда жұмыс істеуде.
Бұл, мен бірнеше рет айтқанымдай, біздің бәріміз үшін жаңа сапалық жағдайға көшуді білдіретін жаңа есеп нүктесі.
Екіншіден, ҚХА жұмысы жиырма бірінші ғасырдың – ақпарат, инноватика және осы заманғы технологиялар ғасырының, соның ішінде адамдық коммуникациялар саласының да талаптарына сай болуы тиіс. Ассамблеяның саяси партиялармен, ҮЕҰ-мен және азаматтық қоғаммен басқа институттармен әріптестіктің жаңа формуласын әзірлеп, олармен жұмысты жаңа жағдайларда түзуі керек.
Үшіншіден, Ассамблеяның жұмысын біздің еліміз дамуының жаңа міндеттері тұрғысынан түзету маңызды. Ең алдымен, патриоттық тәрбие, азаматтықты және мемлекеттік тілді нығайту, этносаралық және конфессияаралық келісім секілді бағыттар бойынша.
Тұтастай Қазақстан халқы Ассамблеясы жаңа идеялар туындатушы және, сонымен бір уақытта, мемлекеттің ұлттық бірлік саясатының сенімді тірегі болуға тиіс.
Нақ сондықтан өткен сессияда мен Қазақстанның Ұлттық бірлік доктринасының жобасын әзірлеуді тапсырғанмын. Ол сіздерге таратылып берілді. Оның жобасы бойынша мамандар, сарапшылар, ғалымдар көп жұмыс істеді. Оны саяси партиялардың, этномәдени орталықтардың, ҮЕҰ-лардың қатысуымен мұқият талқылау, толымды қоғамдық сараптамадан өткізу қажет.
Бүгін Доктринаны жетілдіріп, менің Жарлығымның жобасын әзірлейтін арнаулы жұмыс комиссиясын құру керек.
Өз тарапымнан осы құжат қандай болуы керек деген ойларыммен бөліскім келеді. Доктрина, бір жағынан, біздің тіпті де аз емес тәжірибеміздің қорытындылануы, ал екінші жағынан – алға ілгерілеудің, ұлт саясатын жүргізудің ұзақ мерзімді және орта мерзімді стратегияларының, елдегі саяси тұрақтылықты, бірлік пен келісімді одан әрі нығайтудың берік негізі болуы тиіс.
Осынау стратегиялық құжатты әзірлеу барысында секілді Ассамблеяның практикалық жұмысында да жіті назар аударуды қажет ететін бірқатар маңызды жәйттер бар.
Ұлттық бірлік доктринасы басты үш сұраққа нақты да ұғынықты жауаптар беруі тиіс.
Бірінші сұрақ – ұлттық бірлік дегенде біз нені түсінеміз.
Бұл демек біздің елімізде тұратын топтасқан этностық, діни және басқа әлеуметтік-мәдени топтардың қоғамдастығы болу.
Айталық, ең көпұлтты ел – бұл АҚШ, онда жүздеген этностар бар, бірақ та олардың бәрі – америкалықтар. Бразилияда ресми сапармен болғанда мен өзім үшін мынаны атап өттім, бұл ел де көпұлтты, бірақ та барлық тұрғындар – бразилиялықтар. Осы заманғы француздар ұлтына оның бұрынғы отарларындағы азаматтар өздерін Француз республикасына жатқызады. Осыған ұқсас үдерістер Австралияда, Малайзияда, Сингапурда, Үндістанда және басқа елдерде жүріп жатыр.
Осы заманғы әлемде ұлттық бірлік ортақ мемлекетті бірлесіп құру, толеранттылық, азаматтық және осы елдің мемлекеттік тілін міндетті түрде білу секілді шарттармен анықталады.
Біз осы жолмен жүруге тиіспіз. Бірақ бұл үшін уақыт керек. Бізге асығуға болмайды.
Бүкіл әлем африкалық-америкалық Барак Обаманың АҚШ Президенті болып сайлануына таңғалысты. Ал табыстың құпиясы жай ғана. Ол АҚШ-та “қара немесе ақ Американың” жоқ екенін, “азиялық немесе латын Америкасы” жоқ екенін нақты да табанды түрде айтты. Америка Құрама Штаттары – бұл біртұтас халық. Ондағы әркім жұлдызды-жолақ жалауға берілген және Отанын қорғауға тұруға әзір. Барак Обама нақ осылай дейді. Ол ядролық қарусыз әлем үшін күресуді ұсынады, әлемді бөлуге емес, оны біріктіруге уәде берді. Және оған әлі көп іс атқаруға тура келеді. Нақ осылар үшін оны Президент етіп сайлады.
Ал бұл дегеніміз осынау жылдардың барлығында мен сіздерге айтып келе жатқан нәрселер, біз сіздермен бірге жылдан-жылға жүргізіп келе жатқан сол саясат!
Нақ осының арқасында біздің елімізде қазіргі кездегі тұрақтылық және болашаққа деген сенімділік бар.
Екінші маңызды сұрақ – неге бізге ұлттық бірлікті нығайту маңызды? Мұнда біздің бәріміз біртұтас пікірдеміз.
Оны бір түсінікпен білдіруге болады – бұл ел ішіндегі қауіпсіздік. Оған сыртқы қауіпсіздік байланысты. Бастысы – бұл елдің өркенді дамуы, ал осыдан барып біздің бәріміздің берекеттілігіміз шығады.
Осы мінберден өзімнің барша бауырларыма – қазақтарға айрықша сөз арнағым келеді.
Ұлыстың ұйытқысы болған қымбатты қандастарым, құрметті қазақ бауырларым!
Бүгінде дүние жүзінде 200-ге таяу мемлекет бар. Ал 3 мыңға жуық этностың өзіндік ұлттық мемлекеті жоқ. Біз ата-бабаларымыздың аңсар-арманына қол жеткізіп, мыңжылдықтың түйіскен тоғысында тәуелсіз мемлекет құрдық.
Біз, қазақтар, араға ғасырлар салып өз жерімізде алғаш рет еркін тыныстап, еңсе тіктедік. Қазақ тілі өркен жайып, балаларымыз ана тілінде тәрбие алып келеді.
Тағдырдың жазуымен, тарихтың талқысымен қазақ жерін паналаған түрлі этнос өкілдерімен бірге ортақ Отанымызды көркейту жолында аянбай тер төгудеміз. Олар біздің қиын кезеңде, сын сағатта көрсеткен қамқорлығымызға риясыз алғысын айтып келеді.
Дәуір алмасып, заман өзгерді. Қазір байырғы қазақ жерінде жаңа азаматтық қоғам қалыптасуда. ХХІ ғасырда қазақтар мемлекетқұраушы ұлт ретінде жаңа белеске көтеріліп, Қазақстан халқының берік өзегіне, сенімді діңгегіне айналуда.
Бұл ретте тағы бір айта кететінім – Қазақстанның тәуелсіздігінің болашағы үшін, өсіп-өркендеу үшін, нығаюы үшін қазақтың – өзіміздің ұлттың бірлігі керек. Егер бәріміз жармасайық билікке деп жан-жаққа кететін болсақ, осы тәуелсіздіктен, еркіндіктен айрылатын боламыз. Мен мұны әдейілеп айтып отырмын.
Қазақ халқы өзіне жүктелген аса маңызды жауапкершілікті сезіне отырып, бұл тарихи миссияны абыроймен атқарып шығады деп сенемін.
Үшінші сұрақ – ұлттық бірліктің негізі не болып табылады? Қазақстан халқының бірлігі басты үш тұғырға негізделген.
Біріншіден, ол біздің ортақ тарихымыз. Оның қасіретті беттерінен қажетті сабақ ала білу маңызды.
Түрлі этностардың бұрын орын алған азаптары мен ащы тағдыры болашақта қайталанбас үшін оларды әркез ескере білу керек.
Иә, аштық та, қуғын-сүргін де, соғыс та, жер аударулар да болды.
Бірақ бұл деректерді біз өткен уақыт пен бүгінде жоқ адамдарды бостан-босқа сынау үшін пайдаланбаймыз. Оның үстіне бұрынғы Кеңес Одағының барлық халықтары да зардап шекті.
Бір кезде бізге жамандық істелгені үшін жайдан-жай біреулерге жамандық жасауға болмайды. Өткен өтіп кетті. А.С.Пушкин айтқандай, шляпамызды шешіп, өткенге тағзым етейік те, болашаққа бет бұрайық, білек сыбана еңбекке кірісейік.
Қазақстанда жыл сайын Саяси қуғын-сүргін құрбандарын еске алу күні, өз еріктерінен тыс қазақ жеріне келген халықтардың, бүгінде бізбен бірге жүргендердің ата-бабаларының жер аударылған жылдықтары аталып өтеді.
Бұл іс-шараларға халық Ассамблеясы, барлық этномәдени орталықтар белсене қатысады. Осынау қайғылы оқиғалар туралы жадымыз біздің этностарымызды бір-бірінен алшақтатпайды, керісінше, достығымызды нығайта түседі. Сол уақыттың тоталитарлық мәшинесінен біздің бәріміз де зардап шектік.
Менің атыма осыдан 15 жыл бұрын Көкшетаудан кетіп, қазірде Германияда тұрып жатқан Людвиг Лейхнерден хат келді.
Ол өз үйінде шағын музей ашып, оған қазіргі заманғы Қазақстанның тарихы мен өмірі туралы материалдар жинайтынын, сөйтіп оларды көршілеріне, қонақтарға көрсететінін жазады.
Хатта мынадай сөздер бар: “Волга бойынан қоныс аударған немістерді қонақжайлылықпен қарсы алып, бәрін де – тамағын да, тұрғын үйін де, жылуын да бөліскен қазақ халқы туралы жадымыз өшпеуге тиіс”.
Біздің еліміздегі өзге этностардың өкілдері де қазақтарға дәл осындай жылы алғыс сезімдерін білдіреді.
Германия, Грекия, Израиль сияқты шетелдерде бола жүріп мен қазақ халқына және біздің жерімізге шынайы ризашылықтарын білдіретін бұрынғы қазақстандықтарды кездестіремін. Маған алғыс айта отырып, олар қазақтардың бұрынғы буынына, яғни өздерін қарсы алған біздің әкелеріміз бен аналарымызға өз ниеттерін жеткізеді деп білемін. Менің ойымша, біздің ата-бабаларымызды алдауға құқымыз жоқ. Біз оларға лайық болып, осы жұмыстарды жалғастыруымыз керек.
Екіншіден, ол барлық қазақстандық этностар үшін ортақ құндылықтар. Біз ұлан-ғайыр және қойнауы байлыққа толы жерде бірге өмір сүріп жатырмыз.
Біз ол жерде қалалар мен ауылдарды, зауыттарды, электр стансалары мен жолдарды бірге салып жатырмыз. Біз бөлшектеу мүмкін емес зор мәдени құндылықтарды да бірлесе жасап жатырмыз.
Тәуелсіздік жылдары ішінде бізде өзімізге тән тамаша дәстүрлер қалыптасты. Біз жыл сайын Рухани келісім күнін, Құрбан айтты, Пасханы, Рождествоны бірлесіп атап өтеміз. Бұлар барлық қазақстандықтардың, ойлары ізгі және ниеттері жарқын барлық адамдардың мерекелері.
Бұл халық пен елдің шынайы қуатының неде екені неғұрлым айқын көрініс беретін күндер.
Осының арқасында біздің қоғамда үлкенді сыйлау, отбасына құрмет, балаларға қамқорлық, жайма-шуақ қонақжайлылық, тату көршілік тәрізді ізгі ортақ құндылықтар берік орнықты.
Адамдар арасындағы мұндай қарым-қатынастар барлық елдерде бірдей байқала бермейді.
Және ең соңғы, үшінші тұғыр – ол біздің ортақ болашағымыз. Тәуелсіздік алғаннан кейін қазақстандықтар бірлесе отырып өз тағдырларына еркін таңдау жасады. Біздер болашақты бірігіп орнатып жатырмыз. Елді дамытып, өзіміздің балаларымыз бен немерелеріміз үшін университеттер, мектептер, ауруханалар салудамыз.
Егер біз оларға достық пен бауырластық, сенім мен толеранттылық сезімдерін дарыта алсақ, оларда бәрі де болады.
Тұтастай алғанда, Ұлттық бірлік доктринасының мазмұнына қатысты көзқарастар осындай.
Бұл этносаралық және конфессияаралық қарым-қатынастардың бүкіл кешені бойынша біртұтас іс-қимыл бағдарламасы болмақ. Ол әрбір қазақстандық саясаткердің “үстелдік кітабы”, әрбір депутаттың, басқарушының, ғалым мен журналистің іс-қимылдары үшін нұсқаулық болуды көздейді.
Кез келген саяси құжаттар мен заңдар онымен салыстырылуға тиіс, елдің 2020 жылға дейінгі даму стратегиясында оның қағидаларын ескеру қажет. Біздің аталмыш құжатты бірге және мұқият әзірлеуге тиіс екендігіміздің себебі де, міне, осында.
Енді болашаққа арналған кейбір нақты міндеттер туралы. Этносаралық келісімнің әлеуетін нығайта түсу үшін төмендегідей бағыттарда бірқатар шараларды жүзеге асыру керек.
Бірінші. Ең алдымен білім мен тәрбие беру жүйесі арқылы, БАҚ-тарда этносаралық қарым-қатынастар тақырыбын әдепті жазу арқылы, қазақстандықтардың құқықтық мәдениетін арттыру арқылы азаматтық біртектілікті, қазақстандық қоғамдағы толеранттылықты дамыту қажет.
Білім және ғылым министрлігі қазақстандық қоғамның ерекшеліктерін ескере отырып, этно- және полимәдени білім беруді дамыту жөнінен тұжырымдамалық ұсыныстар дайындауы керек. “Толеранттылық негіздері” атты факультативтік курс әзірлеп, оны мектептер мен жоо-ларға енгізу қажет.
БАҚ-тарда этносаралық және конфессияаралық қарым-қатынастарды әдептілікпен жазу – маңызды мәселе.
Бұл бағытта көп жұмыстар істелді, тиісті заңдар қабылданды. БАҚ-тарда этносаралық тақырыпты жазу кодексі жұмыс істеп тұр.
Осы тәжірибені дамытып, қазақстандық патриотизм тақырыбын белсенді насихаттап, адамдардың бойына барлық этностық топтардың мәдениеті мен дәстүрлеріне деген құрмет сезімін дарыту керек.
Ассамблея жанынан этносаралық қарым-қатынастар мәселесі бойынша Жетекші журналистер мен сарапшылар клубын құрған жөн.
Екінші бағыт – мемлекеттік тілді одан әрі дамыту.
Мемлекет барша қазақстандықтардың қазақ тілін біртіндеп үйренуі үшін барлық жағдайларды жасап отыр.
Енді ҚХА ел халқының мемлекеттік тілді меңгеруінің жалпыұлттық үдерісіне басшылық жасауы керек. Ол үшін ешкімге қысым жасамай және ешкімді төмендетпей, қажетті шаралар кешенін жүйелі де табанды жүзеге асыру қажет.
Демек бұл – мемлекеттік тілді үйрету орталықтарының желілерін кеңейтіп, оларды әрбір қалада және аудан орталығында, жоо-лар мен өзге де мекемелерде құру керек деген сөз. Оларға көмектесіп әрі ынталандырып отыру қажет. Мемлекет жеткілікті қаржы бөліп отыр, оларды тек дұрыс пайдалану керек.
Оқытудың инновациялық формаларын батыл және кеңірек енгізу қажет.
Субтитрлері бар мемлекеттік тілдегі телерадио хабарларының үлесін арттырудың, қазақ тілді интернет-кеңістіктерді дамытудың маңызы зор, іскерлік, көркем және басқа да әдебиеттерді қазақ тіліне көптеп аудару қажет.
Кеңестерде қазақ тілінде сөйлей берсін, бірақ ілеспе аударма арқылы сөйлейтін болсын. Ол қиын емес қой.
Бұл істің табыстылығы тек мемлекетке ғана емес, сонымен бірге бүкіл қоғамның белсенділігіне де байланысты.
Өзге этностардың өкілдерін қазақ тіліне оқытуда этномәдени бірлестіктердің бастамашылық танытуларына болады.
Мемлекеттік тіл – ол халық бірлігінің негізгі факторы. Біздің қоғам, интеллигенция мемлекеттің қазақ тілін дамытуға көңіл бөлмеуі жөніндегі ұсақ, ызалы және популистік пікірлерден жоғары тұруы тиіс. Оларды мен естіп жүрмін. Әсіресе, егер олар артында ешқандай нақтылы іс жоқ, барлық жауапкершілік тек мемлекетке ғана жүктеле салған, әншейін бос сөздер болса одан бетер орынсыз.
Сонымен бірге мемлекеттік тілді дамыту оны әлі де білмейтіндерді кемсітуге апарып соқтырмауға тиіс. Біздің азаматтарымыздың конституциялық құқықтарын бұзуға жол берілмейді, құқық қорғау органдары оларды шұғыл тыйып отыруы керек.
Бүгінде біз қазақстандықтардың өскелең ұрпағының бойында мемлекеттік тілді білуге деген қандай қызығушылықтың оянып жатқанын көріп жүрміз. Мұны барынша ынталандыру қажет. Біздің бірлігіміздің осынау бағытына деген адалдығы үшін олардың ата-аналарына рахмет те айту керек.
Қазақ тілін орыс тіліне қарсы қою қате.
Орыс тілі біздің мәдениет байлығының ажырамас бөлігі, әлемдік білімдердің қалың қатпарларын танудың, ұлтаралық қарым-қатынастың тілі болған және болып қала береді.
Айтыңыздаршы, бүгінде Қазақстанның этностары өзара қай тілде сөйлеседі? Орыс тілінде. Біз игерген кезде, болашақта ол тіл қазақ тілі болуы мүмкін. Бірақ бүгінде бұл рөлді орыс тілі атқарып отыр.
Жұмысты тілдердің үштұғырлығы бағдарламасы бойынша белсенді жүргізу маңызды деп есептеймін.
Жалпы, тілді меңгеру үшін оған өзіңнің жүрегіңді ашуың керек. Тосқауыл қоюлармен және дөрекі мәжбүрлеумен бұл істе еш нәрсеге қол жеткізе алмайсың.
Және біз қазақ тілінде сөйлеу қалауы әрбір қазақстандыққа табиғи нәрсе болуы үшін бәрін істеуге тиіспіз.
Сонымен бір мезгілде біз Қазақстанда тұратын барлық этностардың ана тілдерін, мәдени мұралары мен дәстүрлерін еркін дамыту үшін бұдан әрі қарай да барлық жағдайды жасайтын боламыз.
Сондықтан Тілдердің қызметі мен дамуының 2011-2020 жылдарға арналған мемлекеттік бағдарламасын әзірлеп, қабылдау қажет.
Үшінші. Біздің қоғамдағы конфессияаралық келісім ұлттық бірліктің маңызды құрамдасы болып әрекет етеді.
Қазақстанда діндердің заңнамалық теңдігі мен үнқатысуы қағидаттары мызғымайды. Сонымен қатар мемлекет жалған-діни бірлестіктердің қызметіне қарсы тұратын болады. Мұнда еліміздегі барлық діни бірлестіктердің белсенді ұстанымы қажет етіледі.
Бұл арада еліміздегі ең көпсанды конфессия – Қазақстан мұсылмандары діни басқармасына ерекше рөл беріледі. Өз діндарлары арасында осындай адамгершілік-тәрбиелік жұмысты біз Орыс православие шіркеуі мен Қазақстандағы өзге де конфессиялардан күтеміз.
Діни сала – әркімнің жеке өз ісі, бұл мәселені адам өзі шешеді. Соңғы кездері біз қандай да бір діннің тереңіне бойламай, діндердің ізгілігіне, шынайылығы мен жалпыға ортақ басқа да қырларына дендеп енбей жатып діндарлықтың сәнге айналғанын көріп отырмыз.
Адамдарды қандай да бір дінді қабылдауға мәжбүрлеуге болмайды. Бұған діндердің өзі тыйым салады.
Сондықтан жастарға ерекше назар аудару қажет. Бүгін кейбір жас қазақстандықтар діни білімді шет елдерден алады. Олардың нақты дінмен үш қайнаса сорпасы қосылмайтын экстремистік идеялардың ықпалына түсіп қалатын оқиғалары да бар.
Біздің шешуші конфессиялар мемлекеттік органдармен ынтымақтаса отырып, дінге сенуші жастармен белсендірек жұмыс жүргізіп, олардың шынайы діни білім алуларына көмектесе алар еді.
Мүмкін бізге Дін істері жөніндегі арнайы агенттік құру керек шығар. Президент Әкімшілігіне Үкіметпен бірлесіп келісілген ұсыныс беруді тапсырамын.
Бізге қазіргі дүниені жанжалдар шырмап жатқанын ұмытуға болмайды. Және де олардың көпшілігі діни факторды пайдалану әрекетімен байланысты болып келеді. Солай болса-дағы дінаралық жанжалдар қазір де, болашақта да құтыла алмайтын үдеріс болып табылмайтыны тағы анық.
Бұл жанжалдардың себебі жаһандану мен ақпараттық ашықтық үдерістеріне тікелей байланысты. Аталған мәселелер жалған-дін делініп жүргендердің ішке енуіне жағдай туғызады. Біз зайырлы елміз, бірақ мемлекет бір шетте тұрмауы тиіс. Бұл – мемлекеттік органдар үшін ғана емес, бүкіл қоғам үшін маңызды жұмыс.
Төртінші. Ұлттық бірліктің беріктігі Қазақстан халқы Ассамблеясы мен барлық этномәдени бірлестіктер жұмысының тиімділігін арттыруға тікелей байланысты.
Бірінші кезекте ҚХА Хатшылығының үйлестіруші рөлін күшейтіп, Ассамблея жанынан “Ақсақалдар алқасын” құру керек. ҚХА жанындағы Ғылыми-сараптамалық кеңес белсендірек жұмыс істеуі тиіс. Этносаралық қарым-қатынас мәселелеріне қолданбалы зерттеулер жүргізетін ғалымдар үшін грант тағайындау қажет.
Халық Ассамблеясына Жастар конгресімен көбірек жұмыс істеу, мысалы, “Жастар Қазақстан халқының бірлігі үшін” жалпыұлттық форумын бірлесіп өткізу керек.
Үкімет және облыс әкімдері деңгейінде этномәдени бірлестіктерге, оның ішінде әлеуметтік тапсырыс тетігі арқылы, мемлекеттік қолдауды кеңейту туралы мәселелерді тереңірек қарастырған жөн.
Қазақстан халқы Ассамблеясы желісі бойынша елімізде бейбітшілік пен келісімге үлкен үлес қосып жүргендерді салмақты ынталандыру туралы мәселені ойластыру маңызды. Еліміздегі мұндай адамдарды бәрі білулері тиіс.
Мысалы, “Қазақстан халқы Ассамблеясының қоғамдық “Бірлік” алтын медалі қоғамдық наградасын неге тағайындамасқа. Мұның Ассамблеяның беделін көтеруге жұмыс істейтіні сөзсіз.
Бесінші. Этносаралық және конфессияаралық қарым-қатынастың қазақстандық моделінің әлемдік танымалдылығын кеңірек тарату керек.
Осы мақсатта Қазақстанның алдағы ЕҚЫҰ-ға төрағалығын пайдалану маңызды, мұнда шешуші басымдық ретінде этносаралық және конфессияаралық толеранттылық тақырыбы таңдап алынғаны белгілі.
Бұл “Еуропаға жол” мемлекеттік бағдарламасында да көрініс тапқан.
Ассамблея Хатшылығына ұлтаралық келісімнің қазақстандық тәжірибесін жинақтап, негізгі еуропалық тілдерде “Қазақстан: бірлік пен келісімнің интегралдық матрицасы” атауымен арнайы басылым шығару керек.
Біз Астанада ЕҚЫҰ-ға мүше елдер Мемлекет басшыларының саммитін өткізіп, онда жұмыс тәртібінің жеке пункті ретінде қатысушы елдер қауіпсіздігін қамтамасыз етуге бағытталған этносаралық және конфессияаралық келісімді қамтамасыз ету жөніндегі Іс-қимыл бағдарламасын қарау бастамасын көтердік. Бұл идея Ұйымдағы біздің көптеген әріптестерімізден қолдау табуда.
Алдағы жылы Қазақстанның бастамасымен БҰҰ жариялаған Мәдениеттерді жақындастырудың халықаралық жылына арналған конференция өткізу жоспарланып отыр. Бұл мәселелердің бәріне де Қазақстан халқы Ассамблеясы белсене қатысуы тиіс.
Құрметті сессияға қатысушылар!
Қымбатты қазақстандықтар!
Өздеріңіз білетіндей, бұдан он жыл бұрын мен жиырма бірінші ғасырдың алғашқы онжылдығы сыни болатынын ескерткен едім. Осылай болды да шықты.
Жуырда өзімнің “Дағдарыстан шығу кілті” және “Бесінші жол” мақалаларымда мен бүгінгі жаһандық дағдарыс – бұл жүйелік дағдарыс екенін атап өткен болатынмын.
Қазіргі кезде әлемдік деңгейдегі ғалымдар, жетекші сарапшылар мен саясаткерлер жаһандық дағдарыстың, және әрине, әлемдік қоғамдастықтың одан әрі дамуының негізгі үш нұсқасын талқылауда.
Бірінші нұсқа – дағдарыстың өз негізінде бір реттік сипат бар, ол түбіне жетті және қазір рецессиядан шығу басталуда. Яғни, бәрі де бұрынғы қалпына қайтып оралады.
Екінші нұсқа – біз түпке құладық, бірақ та қалпына келу кезеңі 10-15 жылға созылады.
Үшінші нұсқа – бүгінгі дағдарыс – жүйелік, жаһандық, созылмалы. Оның әлемдік әлеуметтік-экономикалық формацияның ауысуына әкелуі ықтимал.
Бүгінде сарапшылардың екінші, және тіпті үшінші нұсқаларға ыңғай білдіретіндері барған сайын көбейе түсіп келеді.
Мен өзімнің соңғы мақалаларымда көрсеткенімдей, біз оқиғалардың кез келген бағытына дайын болуға тиіспіз.
Біз әлемдік дағдарыстың алғашқы қыспағына төтеп бердік. Енді бүгін болашақтағы кез келген күрделі қауіп-қатерлерді лайықты еңсеру үшін қоғамды біріктіру маңызды.
Сондықтан, ұлттық бірлігімізді нығайтып, біз мемлекетімізді күшейте түсеміз. Нақ сондықтан бірлік біздің стратегиялық таңдауымыз болып табылады.
Алда зор да жауапты жұмыстар тұр.
Оның табысты болатынына және еліміздің дамуында маңызды кезеңге айналатынына сенімдімін.
Бәріңізге жемісті жұмыс тілеймін.
Құрметті қауым!
Халқымыздың татулығы мен бірлігі – еліміздің өркендеп, алға басуының басты шарты.
Осы байлығымызды қадірлей білу, оны жас ұрпақтың жүрегіне ұялату – Отанымыздың жарқын болашағының кепілі болмақ.
Бүкіл Қазақстан халқы мен оның әрбір этносының тағдыры үшін ең алдымен Ассамблея мүшелері, мына сіздер, жауап беруге тиіссіздер дер едім. Сіздер бірлігі жарасқан Қазақстанның абыройы мен беделінің, ғасырлар бойы қалыптасқан жарасымды салт-дәстүрлерінің жанды айғағысыздар.
“Береке басы – бірлік”, дейді қазақ. Ал береке-бірлігі жарасқан елдің туы биік, болашағы жарқын болатынын тарихтың өзі дәлелдеп отыр.
Біз дүние жүзі бір-бірімен етене араласып, біте қайнасқан кезеңде өмір сүрудеміз. Әлемді шарпыған дағдарыс әлі аяқталған жоқ. Жаһандық сипатқа ие болған қиындықтар қайта айналып соғуы мүмкін. Сондықтан, ең қастерлі қазынамызды – тәуелсіздігімізді көздің қарашығындай сақтап, мемлекеттігімізді нығайта беру үшін бізге ең әуелі бірлік қажет!
Олай болса, қашанда еңселеріңіз биік, татулығымыз баянды болып, ел келешегі жолындағы еңбектеріңіз еселене берсін.
Рахмет!
Қазақстан халқы Ассамблеясының
ҮНДЕУІ
Қазақстанда тәуелсіздік жылдарында дүние жүзі мойындаған этносаралық және конфессияаралық төзімділіктің қазақстандық ерекше үлгісі қалыптасты.
Барлық қазақстандықтар, өзінің этностық немесе діни ерекшелігіне қарамастан, Конституцияда көрсетілген азаматтық құқықтар мен бостандықтарға ие болып табылады. Мемлекет әрбір қазақстандық этностың өзіндік ғұрпын, тілі мен мәдениетін жаңғырту және сақтауға ықпал етеді.
Мемлекет басшысының бастамасымен құрылған Қазақстан халқы Ассамблеясы мәдениетаралық және этносаралық үнқатысудың ерекше тетігіне, халықтық дипломатияның, мемлекет пен азаматтық қоғамның өзара іс-әрекетінің нақты құралына айналды.
Аталған бағытта жүргізілген шаралардың арқасында Қазақстанда сенім мен төзімділіктің, ниеттестік және өзара түсіністіктің ерекше үлгісі қалыптасты. Сонымен қатар қазіргі таңда, бүкіләлемдік экономикалық дағдарыстың әсеріне байланысты Қазақстанның алдына жаңа міндеттер қойылып отыр. Дағдарыс салдарын еңсеру үшін, дағдарыстан кейінгі кезеңде жүйелі, сәтті дамуды жүзеге асыру үшін қоғамдық бірлік пен ұйымшылдық қажет.
Қазақстан Президенті стратегиялық маңызды бастама – Ұлттық бірлік доктринасын қабылдауды ұсынып отыр. Қоғам бірлігін қамтамасыз ету мемлекет қауіпсіздігі мен тәуелсіздігін сақтаудың, әлеуметтік-экономикалық және саяси дамудағы стратегиялық басымдықтарды жүзеге асырудың басты шарты болып табылады. Бұл – біздің болашағымыздың негізі, өрлеу мен тұрақты дамудың басты факторы.
Біз Мемлекет басшысының ұсыныстарын толықтай қолдаймыз. Этномәдени орталықтар мен қоғамдық бірлестік өкілдерін, ғылыми қауымдастық және ел болашағына алаңдаушылық білдіретін барлық азаматтарды Доктринаны талқылау және қабылдау жұмысына қатысуға шақырамыз.
Аталған бағдарламалық құжаттың ережелерін жүзеге асыру этносаралық төзімділіктің қазақстандық үлгісін әрі қарай нығайтып, қазақстандық тәжірибені өзге елдерге үлгі ретінде ұсынуға мүмкіндік береді.
Біздің еліміз жоғары халықаралық міндет – Еуропадағы қауіпсіздік және ынтымақтастық ұйымына төрағалық етуге қызу дайындалу үстінде. Еліміздің бұл ұйымға төрағалыққа сайлануы қазақстандық даму үлгісінің халықаралық қауымдастық тарапынан мойындалуына дәлел болып отыр.
Біз, Қазақстанда тұратын барлық этнос өкілдері, Елбасы Нұрсұлтан Назарбаевтың күшті және өркендеген Қазақстанды құруға, қазақстандық қоғамды ұйыстыруға бағытталған саясатын толықтай қолдаймыз.
Біз бірлік пен ұйымшылдықсыз ұлы міндеттер мен жеңістерге жету мүмкін емес деп санаймыз. Міне, сондықтан, ұлттық бірлік – біздің стратегиялық таңдауымыз!
Біз ортақ үйіміз Қазақстан Республикасында бейбітшілік пен келісімнің сақталуына барлық күш-жігерімізді жұмсауға әзірміз!
Астана қаласы, 2009 жылғы 26 қазан.