Қымбатты ақтөбеліктер!
Ардақты ағайын!
Баршаңызды бүгінгі Ұлыстың ұлы күні — Наурыз мейрамымен шын жүректен құттықтаймын!
Мемлекет басшысы Қасым-Жомарт Тоқаев: «Қазір Әз Наурыз күллі халыққа ортақ жалпыұлттық мерекеге айналды. Оны ұлтына, дініне қарамастан, барша жұртымыз ерекше күтеді, бірге атап өтеді», — деген болатын. Сондай-ақ күні кеше Бурабайда өткен төртінші құрылтайда ұлттық бірегейлігімізді нығайту жолында төл мәдениетіміздегі Әз Наурыз мейрамының орны бөлек екеніне ерекше тоқталып өтті.
Шығыс халықтарының жыл басы болып саналатын бұл мезгіл бірлік пен ынтымақтастықты, татулық пен бауырмалдықты, еңбекқорлық пен іскерлікті одан әрі нығайтады.
Осыған орай, өткен жылдан бастап дәстүрлер мен әдет-ғұрыптар тамыр жайған ұлттық мерекені атап өтуге арналған «Наурызнама» тұжырымдамасы қабылданды. Наурызнама онкүндігі Көрісу күнінен бастау алып, Наурыз мейрамының мән-мағынасы мен мазмұнын байытып, түрлі іс-шараларды қамтиды.
Өңір тұрғындары Әз Наурызды он күн бойы көтеріңкі көңіл күймен тойлап, мәдени мұрамызды, ұлттық құндылығымызды қадірлеуіміздің жарқын үлгісін көрсетті.
Құрметті жерлестер!
Өңіріміздің наурыздан наурызға дейін қол жеткізген табыстары аз емес. Жылдан- жылға облысымыз гүлденіп, заманауи инфрақұрылым дамып, жаңа кәсіпорындар ашылып, халықтың әл-ауқаты жақсарып келеді.
2025 жылы облысқа 1 трлн теңгеге жуық инвестиция тартып, 1 мыңнан астам жұмыс орнын құрумен 10 инвестициялық жобаны іске қосу жоспары тұр. Инженерлік инфрақұрылым бойынша биыл 5,5 мыңнан астам халқы бар 11 ауылға ауызсу жүргізіп, таза сумен жабдықтау мәселесін толықтай шешетін боламыз.
Сондай-ақ 9,8 мың халқы бар 24 ауылды газдандыру арқылы газбен қамту деңгейін 96,8 пайызға дейін жеткіземіз.
Бұдан басқа 2025 жылы барлық қаржыландыру көздерінен 975,0 мың шаршы метр тұрғын үйді пайдалануға беру жоспарланып отыр.
Әлеуметтік сала бойынша «Ауылдық денсаулық сақтауды жаңғырту» ұлттық жобасына сәйкес 11 нысан салынады. Сондай-ақ 7 денсаулық сақтау нысанының құрылысы жоспарланған.
Білім нысандары бойынша 3 ауысымды, 2 апатты мектеп мәселесін шешу мақсатында 2025 жылы 16,4 мың оқушыға арналған 27 жаңа мектеп бой көтереді.
Осындай жетістіктеріміздің түп-тамыры — халқымыздың ауызбіршілігі мен еңбекқорлығында. Бірлігіміздің арқасында талай асуларды да бағындыратынымызға сенемін. Наурыз мерекесі отбасыларыңызға амандық, шаңырақтарыңызға молшылық, береке мен бірлік әкелсін!
Ұлыс оң болсын, ақ мол болсын!
Еліміз аман, жұртымыз тыныш болсын!
Құрметпен,
Ақтөбе облысының әкімі
Асхат ШАХАРОВ.
