«ҚАЖсервис» ЖШС-нде аудит жүргізу барысында анықталған бұзушылықтар

Ақтөбе облысы бойынша Ішкі мемлекеттік аудит департаментімен «ҚАЖсервис» жауапкершілігі шектеулі серіктестігі Ақтөбе облыстық филиалында аудиторлық тексеру жүргізілді. Аудит нәтижесінде келесілер анықталды:
ҚАЖсервис ЖШС Ақтөбе ОФ мен «САУЫТ КОМПАНИ» ЖШС арасында «Мемлекеттік сатып алу туралы» Қазақстан Республикасы Заңының және 2024 жылдың 24 қазанындағы №13187271-1 «Мұз басуға қарсы реагент» тендер тәсілімен сатып алудың қорытындылары негізінде тауарды мемлекеттік сатып алу туралы 2024 жылдың 07 қарашасында 7 308,0 мың теңгеге келісім-шарты жасалған. Келісім-шарттың нысаны мұз басуға қарсы реагент болып табылады, тауардың саны – 30 тонна, тауар данасының бағасы 243,6 мың теңгені құрайды. Келісім-шарттың техникалық ерекшелігіне сәйкес мұз басуға қарсы реагент өндірушісі ООО «ОПТ6» болып табылады.
Мемлекеттік сатып алулардың веб-порталындағы ақпаратқа сәйкес, Тапсырыс беруші 2024 жылдың 19 қарашасында Өнім берушіден техникалық ерекшелікке сәйкес тауарды жеткізуге, тауарды толық жеткізгенге дейін үлгісін ұсынуды сұратқан. Одан кейін 2024 жылдың 12 және 17 желтоқсанында тауарды толық жеткізуге өтінім жіберген, яғни тауарды жеткізу мерзімі 12.12.2024 жылдан бастап есептегенде 28.12.2024 жыл болуы тиіс.
Өнім беруші «САУЫТ КОМПАНИ» ЖШС мемлекеттік сатып алу веб-порталында 7 308,0 мың теңгеге электрондық актіні 26.12.2024 жылы Тапсырыс берушіге жолдаған, Тапсырыс беруші электрондық актіні 27.12.2024 жылы бекіткен, электрондық актіге сәйкес тауар толық көлемде жеткізілген және Тапсырыс беруші тарапынан қабылданған.
Тауарды нақты жеткізілуін растау мақсатында Тапсырыс берушінің қоймасында 2025 жылдың 30 қаңтарында «Мұз басуға қарсы реагент» бойынша 2024 жылдың 27 желтоқсанында қабылданған тауарға бақылау өлшеу (тексеру) жүргізіліп, нәтижесінде 5 602,8 мың теңгеге бұзушылықтар, яғни техникалық ерекшелікте көрсетілген өндірушісі ООО «ОПТ6» болуы тиіс тауар тек 7 тонна (қапшық), ал қалған 23 тонна тауар өндіруші «Алтын орда» ЖШС-нен 9 тонна (қапшық), Тыретский солерудник өндірушісінен 14 тонна (қапшық) тауары жеткізілгені анықталды. Яғни аудит барысында Тапсырыс беруші қоймасынан келісім-шарттың ажырамас бөлігі болып табылатын техникалық ерекшелікте көрсетілген тауардан басқа тауарлар жеткізілгендігі, демек Қазақстан Республикасы Қаржы министрінің 2021 жылғы 30 қарашадағы №1253 бұйрығымен бекітілген «Ұлттық әл-ауқат қоры мен Ұлттық әл-ауқат қорының ұйымдарын қоспағанда, квазимемлекеттік сектордың жекелеген субъектілерінің сатып алуын жүзеге асыру қағидаларының» 3-параграфы 345-тармағының және 2024 жылдың 07 қарашасында №001140000590/243511/00 келісім-шартының 4.1. және 4.2. тармақтарының талаптары бұзылып, Тапсырыс беруші тарапынан келісім-шарттың ажырамас бөлігі болып табылатын техникалық ерекшелігінде көрсетілген өндірушісі ООО «ОПТ6» болуы тиіс мұз басуға қарсы реагенттің орнына 23 тонна көлемінде басқа тауар қабылдағандығы, яғни 5 602,8 мың теңгеге бұзушылықтар анықталды.
Қазақстан Республикасы Қаржы министрінің 2021 жылғы 30 қарашадағы №1253 бұйрығымен бекітілген «Ұлттық әл-ауқат қоры мен Ұлттық әл-ауқат қорының ұйымдарын қоспағанда, квазимемлекеттік сектордың жекелеген субъектілерінің сатып алуын жүзеге асыру қағидаларының» 3-параграфы 341-тармағының және 2024 жылдың 07 қарашасындағы №001140000590/243511/00 келісім-шартының 7.3. тармағының талаптары бұзылып, Тапсырыс беруші «САУЫТ КОМПАНИ» ЖШС-нен 29.12.2024 жылдан бастап 06.02.2025 жылға дейінгі аралықта 0,1% мөлшерінде 23 тонна тауарды жеткізбегені үшін әрбір күнге 0,1% мөлшерінде 218,5 мың теңге көлемінде тұрақсыздық айыбын өндірмегендігі анықталды.
Аудит нәтижесінде Департамент тарапынан «ҚАЖсервис» жауапкершілігі шектеулі серіктестігі Ақтөбе облыстық филиалына анықталған бұзушылықтарды жою және оларға жол берген тұлғалардың жауапкершілігін қарау туралы нұсқама жолданып, нұсқаманың жауабына сәйкес 5 602,8 мың теңгеге тауарлар техникалық ерекшелікке сәйкестендірілді, бұзушылыққа жол берген тұлға тәртіптік жауапкершілікке тартылды, өнім берушіден тұрақсыздық айыбын өндіруге және келісім-шарт бойынша міндеттемелерін тиісінше орындамағны үшін өнім беруші «САУЫТ КОМПАНИ» ЖШС мемлекеттік сатып алудың жосықсыз қатысушысы ретінде тануға сотқа талап-арыз берген.

Қият ЖҰМАБАЕВ,
Ақтөбе облысы бойынша ішкі мемлекеттік
аудит департаменті басшысының орынбасары.