«Ақтөбе» – суперкубок иегері
Бәрекелді!
Атырауда волейболдан ерлер ұлттық лига командалары арасында өткен ХХХІІІ Қазақстан чемпионатында «Ақтөбе» волейбол командасы тарихи жеңіспен оралды. Жеңімпаз команданы облыс әкімінің орынбасары, облыстық волейбол федерациясының президенті Ғалымжан Елеуовпен бірге жанкүйерлері де күтіп алды.
Өңір басшысының атынан чемпиондарды осы айтулы жеңісімен құттықтап, аймақ спортының дамуына қосқан үлестері үшін алғысын жеткізді. Бұл — ақтөбелік волейболшылар тарихында алғаш рет ұтып алған Суперкубок.
Қазақстан Суперкубогы сарапқа салынған матчта Әлімбек Мұқановтың басшылығымен команда Қазақстан чемпионы «Тараз» волейбол клубын 2:3 есебімен жеңді.
Бұл жеңіс тек маңызды жетістік қана емес, сонымен қатар 2025 жылдың мамыр айында өтетін Азия чемпионатына қатысуға жол ашады.
Ақмарал МҰҚАШЕВА.
