Шаңғышылар сынға түсті
Облыстық денешынықтыру және спорт басқармасының ұйымдастыруымен шаңғыдан облыс чемпионаты аяқталды. Ауқымды жарысқа Қобда, Мәртөк, Қарғалы және Ақтөбе қаласынан келген 4 команда қатысты.
Шаңғышылар жас ерекшеліктері бойынша іріктеліп, жеке, спринт және топтық эстафета түрлері бойынша сынға түсті.
Аталған чемпионатқа шаңғысын сайлап келген мәртөктік спортшылар жеңіс тұғырынан көрінді. Мәртөк балалар-жасөспірімдер спорт мектебі полиатлон секциясының жаттықтырушысы Әсет Сағынұлы жарыс қатысушыларының спорт додасына қызу дайындықпен келгендігін айтады.
— Шаңғы спорты адамды шапшаңдыққа, ептілікке, қырағылыққа үйретеді. Қуантарлығы, ауданымызда жас шаңғышыларымыздың қатары артып келеді. Қазіргі уақытта мектебімізде 40-қа жуық бала жаттығады. Олардың жеткен жетістіктері де баршылық. Мәселен, жуырда ғана өткен облыс чемпионатында спортшыларымыз оқ бойы озық шықты. Нәтижесінде осы жарыста 1-орынды Тамара Липперт, 2-орынды Александр Швачко, 3-орынды Влад Олейников пен Алина Плис иеленді. Ендігі мақсатымыз — Қазақстан чемпионатына жолдама алып, Олимп шыңын бағындыру, — дейді жаттықтырушы.
Ақмарал МҰҚАШЕВА.