Бір үй — бір бірлестік — бір есепшот
Бұрын көппәтерлі тұрғын үйді басқарудың төрт формасы болатын. Олар — пәтер иелері кооперативі, кондоминиум нысандары, басқарушы компаниялар мен басқа да формалар. Ал қазіргі қолданысқа енген Заңға сәйкес мұндай үйлерді басқарудың екі формасы енгізілді. Олар — мүліктің меншік иелері бірлестіктері мен қарапайым серіктестік құру. «Қазақстан Республикасының Тұрғын үй қатынастары туралы» Заңына осындай өзгерістер енгізіліп, бұл құжат былтыр 7 қаңтарда күшіне енді.
Енді Ақтөбе қаласындағы 1820 көппәтерлі тұрғын үйді басқарудың формасы өзгереді. Бұл жұмыстарды жүргізу үшін үш жыл мерзім берілген. 2022 жылдың 1 шілдесінен бастап қаладағы пәтер иелері кооперативтері, кондоминиум нысандары өз жұмысын тоқтатады.
Азаматтардың шағымдары мен наразылығынан туындаған реформа
Жақында осы тақырыпқа байланысты Орталық коммуникациялар қызметінде баспасөз мәслихаты өтті. ҚР Индустрия және инфрақұрылымдық даму министрлігінің Құрылыс және тұрғын үй-коммуналдық шаруашылық істері комитеті төрағасының орынбасары Еркебұлан Дауылбаев, «Тұрғын үй-коммуналдық шаруашылығын жаңғырту мен дамытудың қазақстандық орталығы» акционерлік қоғамының басқарма төрағасының орынбасары Нұрбек Серіков және аталған орталықтың өңірлік даму және әдіснама департаментінің басшысы Марғұлан Әбдікәрімовтер көппәтерлі тұрғын үйді басқарудың жаңа нысандарына көшу тәртібін түсіндірген болатын.
Белгілі болғандай, 2020 жылы 7 қаңтарда «Қазақстан Республикасының Тұрғын үй қатынастары туралы» Заңына өзгерістер енгізіліп, күшіне енді. Заң негізгі мәселелерді шешуге бағытталған. Оның бірі — «Бір үй — бір бірлестік — бір есепшот» қағидаты бойынша «Мүлік иелерінің бірлестігі» коммерциялық емес ұйымының жаңа нысанын құру жолымен басқару органдарының қызметін реттеу. Заңды іске асыру мақсатында 2 қаулы және 16 нормативтік-құқықтық акті қабылданған. «Өздеріңіз білетіндей, тұрғын үй қатынастары саласындағы қарқынды өзгерістерге көппәтерлі тұрғын үйлерді басқару саласындағы азаматтардың шағымдары түрткі болды. Сондықтан пәтерлердің, тұрғын емес үй-жайлар иелерінің қаражаттың түсуі мен жұмсалуының ашықтығын қамтамасыз ету үшін өз үйінде мүлік иелерінің бірлестігін немесе жай серіктестік құру қажет екенін түсінуі маңызды», — деді Е.Дауылбаев.
Мамандардың айтуынша, тұрғын үй қатынастары саласындағы реформалар азаматтардың шағымдары мен наразылығынан туындаған.
Пәтер иелері меншік иелері бірлестігі немесе жай серіктестік құру үшін бір жылға төрағаны немесе сенімді тұлғаны, үй кеңесін, 3 жылға аудитор сайлау үшін дауыс береді. «2022 жылдың 1 шілдесіне дейін басқарудың барлық ескі нысандары техникалық, қаржылық және басқа құжаттарды жаңадан құрылған меншік иелері бірлестігі мен жай серіктестікке беріп, жойылуға тиіс», — деді брифингте Н.Серіков.
Мүлік иелері бірлестігін тіркеу үшін 4 құжат керек: өтініш, хаттаманың түпнұсқасы, типтік жарғы және бюджетке төленген мемлекеттік баждың түбіртегі.
Жаңа Заң: көппәтерлі үйлерді басқарудың формасы өзгерді
Ақнұр Қазбаева, Ақтөбе қалалық тұрғын үй инспекциясы бөлімінің сектор меңгерушісі:
— Қазіргі таңда Ақтөбе қаласы бойынша 1820 көппәтерлі үй бар. Осындай үйлерді 96 пәтер иелері кооперативі, 585 кондоминиум нысаны, 16 басқарушы компания басқарып отыр.
«Қазақстан Республикасының Тұрғын үй қатынастары туралы» Заңына өзгерістер енгізіліп, бұл құжат былтыр 7 қаңтарда күшіне енген болатын.
Бұрын көппәтерлі тұрғын үйді басқарудың төрт формасы болды. Олар — пәтер иелері кооперативі, кондоминиум нысандары, басқарушы компаниялар мен басқа да формалар. Ал қазіргі қолданысқа енген Заңға сәйкес мұндай үйлерді басқарудың екі формасы енгізілді. Олар — мүліктің меншік иелері бірлестіктері мен қарапайым серіктестік. Енді жаңа үйлер пайдалануға берілетін болса, ондағы тұрғындар тек осы екі форманы ғана таңдай алады.
Қазір пәтер иелері кооперативтері мен кондоминиумға өткен үйлер 2022 жылдың 1 шілдесіне дейін басқарудың жаңа формасына көшуге тиіс. Яғни, олар осы мерзімге дейін өздерінің жұмысын тоқтатуы керек. Заңға сәйкес үш жылдың ішінде қаладағы барлық үйлер басқарудың екі формасына өтуі қажет.
— Көппәтерлі тұрғын үйлерде меншік иелері бірлестігіне өтудің артықшылығы қандай?
— Заң бойынша әрбір көппәтерлі үйде бірлестік құрылып, арнайы есепшоттары болады. Бірлестікті басқаратын жетекші жұмысты сервистік компаниялар арқылы келісімшарт жасаса отырып атқарады. Бұрынғыдай, яғни пәтер иелері кооперативінің жұмысы сияқты он үйге бір есепшот болмайды. Мұның барлығы — жұмыстың барынша ашықтығын қамтамасыз ету мақсатында қолға алынған шара. Себебі бізге келетін тұрғындардың 90 пайызы «бізде ашықтық жоқ» деп шағымданады. Міне, басқарудың жаңа формасы сол үшін жасалып жатыр. Ең бастысы — меншік иелері өздері тұратын көппәтерлі үйлердің жағдайын бұдан әрі өздері реттеп, бақылайтын болады. Үйдегі мәселені өздері шешуі керек. Яғни әр үй өздерінің есепшотын ашып, өз қаражаттарын мақсатты пайдалана білуі қажет. Барлық жұмысты тұрғындар өздері ұйымдастырады.
— Меншік иелері бірлестігі қалай құрылады?
— Мүліктің меншік иелері бірлестігі — заңды тұлға. Ол үшін әділет басқармасынан тіркеуден өтеді. Содан кейін салық басқармасынан бизнес сәйкестендіру нөмірі (БИН — авт.) беріледі. Меншік иелері бірлестігі ашылғаннан кейін банктен болмаса Қазпошта мекемесінен тұрғындар ағымдағы және жинақтаушы есепшоттарын ашады. Егер сол үйде уақыт өте қандай да бір мәселе туындаса, мүмкін ол құбыр алмастыру болмаса ауланы абаттандыру сияқты жұмыс жасалуы қажет болса, жинақтаушы есепшоттағы қаражат пайдаланылады. Ол үшін жиналыс хаттамасы жасалып, тұрғындардың 70 пайызы қол қойғаннан кейін, есепшоттан қаражатты шешіп алу мүмкіндігі бар. Жинақтаушы есепшотқа аударылатын қаражаттың нақты сомасы белгілі. Ол — айлық есептік көрсеткіштің 0,005 пайызы. Қазіргі есеп бойынша, бұл шамамен — 14,25 теңге. Ал ағымдағы есепшотқа қаражат аудару мәселесі тұрғындардың қатысуымен өтетін жалпы жиналыста бекітіледі.
Тағы бір айта кететін мәселе, мүліктің меншік иелері бірлестігі құрылғанда, оның штаты болады. Мәселен, жетекші мен кассир болса, олар үшін әлеуметтік пакетті де тұрғындар төлеуге тиіс. Яғни табыс салығы, жеке салық, медициналық-әлеуметтік сақтандыру сияқты өзге де әлеуметтік төлемдерге тұрғындар атсалысуы керек. Штаттағы адамдарды тұрғындар өздері таңдағаннан кейін олардың тиісті әлеуметтік пакетін төлеуі қажет. Өйткені олар сол үйдің ортақ мүлкін күтіп ұстау бағытында жұмыстанатын болады.
— Меншік иелері бірлестігіне сол үйден емес, сырттан жетекші сайлауға бола ма?
— Олай да болады. Бұл жағы Заңда қарастырылған. «Басқарушы адам немесе басқарушы компаниялар» деген Заңда түсінік бар.
— Қарапайым серіктестіктердің жұмысындағы өзгешелік қандай?
— Көппәтерлі тұрғын үй басқарудың қарапайым серіктестік түріне өтсе, сол үйге жеке адам басшылық жасайды. Бұл орайда қарапайым серіктестік құру тәртібі тұрғын үй инспекциясы арқылы жүзеге асырылады. Егер құжаттары дұрыс болса, онда біз басқарушы органды мекеменің ресми сайтында тіркейміз. Қарапайым серіктестікке өткен үйлердің тұрғындары арасында ұжымдық келісімшарт болады. Сол келісімшартқа қол қою арқылы жұмыс жүргізіледі. Ол үшін үй тұрғындары жетекшіге 100 пайыз сенім білдіруі керек. Бұл — міндетті түрде талап етілетін құжат. Бұл жерде жетекші тұрғындар арасынан сайланады. Айта кететін бір жайт, басқарудың қарапайым серіктестік әдісіне көшу 8-12 пәтерлі екі қабатты шағын үйлерге ыңғайлы келеді. Ал 120-190 пәтерлі үйлердің тұрғындары бір адамға 100 пайыз сенім танытуы мүмкін емес. Оның үстіне қазіргі таңда бізде ешбір үй қарапайым серіктестік құра алмай отыр.
— Неге?
— Өйткені тұрғындар басқарудың мұндай әдісіне әлі сенбейді. «Мен неге жазбаша сенімхат беруім керек» деген сияқты іштей қорқыныштары бар. Алайда біз мүмкіндігінше тұрғындарға жаңа жүйенің тиімділігін түсіндіріп жатырмыз. Бұл жерде тұрғындар қарапайым серіктестік жетекшісіне ортақ мүлікті күтіп ұстау үшін ғана сенімхат береді.
Ақтөбеде 17 үйде меншік иелері бірлестігі құрылды
— Қазір қалада қанша үй меншік иелері бірлестігіне өтті?
— Бүгінгі таңда Ақтөбе қаласы бойынша 17 үй мүліктің меншік иелері бірлестігіне өтті. Соның бірі — Әбілқайыр хан даңғылы, 43/1 корпус мекенжайындағы үй. Бұл бағытта осы үйді үлгі ретінде айтуға болады. Кезінде бұл үй жеке кәсіпкердің басқаруында болған. Содан үйдің жағдайы нашарлап кеткен. Тұрғындар заңға енгізілген өзгерістерді бақылап, толық танысып, өз беттерінше меншік иелері бірлестігін құруға бекінген. Осының негізінде олар үйдің төменгі қабатын жөндеп, қазіргі таңда лифт орнатып жатыр. Бұл үйдің бірлестік жетекшісі жұмысты үйлестіріп отыр. Сонымен қатар қаладағы Бәйішев көшесі, 7 а,2 корпус және Бөкенбай батыр көшесі, 155, 6-корпус мекенжайларындағы үйлерде де меншік иелері бірлестігі құрылды. Сондай-ақ қаланың Батыс-2 ауданында да басқарудың жаңа әдісіне көшіп жатқан көппәтерлі үйлер бар. Соның бірі — Тәуелсіздік көшесі, 13 мекенжайындағы үй. Жаңадан пайдалануға берілетін үйлер бірден меншік иелері бірлестігіне немесе қарапайым серіктестік ретінде басқару формасын таңдайтын болады.
— Бұл орайда қалада иесіз тұрған үйлердің жағдайы қалай шешілмек?
— Иесіз тұрған үйлерге жергілікті атқарушы орган тарапынан басқарушы компаниялар белгіленеді. Қазіргі таңда қалада 300-ге тарта иесіз үй бар. Олардың көпшілігі — бұрын салынған екі қабатты тұрғын үйлер. Бұрынғы Заң бойынша, 26 пәтерге дейінгі көп қабатты тұрғын үйлер басқарудың ешқандай формасын құрмай-ақ, тұрғындар өздері басқаратын еді. Енді мұндай үйлер тек қарапайым серіктестік қана құрады.
— Көппәтерлі тұрғын үйлер меншік иелері бірлестігіне өткеннен соң, сол үйлердің аумағын абаттандыру, аула жолдарын жөндеу, ойын алаңдарын салу сияқты осы күнге дейін жергілікті билік тарапынан жүргізіліп келген жұмыстар тоқтатыла ма?
— Әрине, жоқ. Тұрғын үй-коммуналдық шаруашылығы саласына қатысты бағдарламалар шеңберінде мұндай жұмыстар жүргізілетін болады. Бұл орайда біздің тарапымыздан да ұсыныстар айтылып, бұл бағыттағы шаруалар ретіне қарай шешіле береді. Конкурстық негізде де жүзеге асырылатын жұмыстар болады. Бір сөзбен айтқанда, үй меншік иелері бірлестігіне өткен кезде де жергілікті биліктің назарынан тыс қалмайды.
— Болашақта меншік иелері бірлестігіне өтуге үзілді-кесілді қарсылық танытатын үйлерде бұл шаруа қалай шешілмек?
— Бұл — бірінші кезекте тұрғындардың өз жауапкершілігіне байланысты атқарылатын шара. Егер басқарудың бұл формасына өтпеген жағдайда жергілікті атқарушы орган тарапынан мұндай үйлерге бір компания бекітілетін болады.
— Тұрғын үй инспекциясы тарапынан бұл бағытта тұрғындарға түсіндіру жұмыстары жүргізіле ме?
— Иә, бұл жайында бұқаралық ақпарат құралдарында ақпараттар кеңінен беріліп, инспекцияның инстаграм парақшасында мүліктік басқарудың жаңа жүйесін түсіндіру үшін жиі-жиі тікелей эфирлер ұйымдастырылуда. Осы мақсатта қаланың Астана, Алматы аудандары әкімдіктерінде пәтер иелері кооперативтері мен кондоминиум жетекшілерінің басын қосып, жиындар өткіздік. Арнайы чаттарда да кеңінен түсінік беріліп жатыр. Егер тұрғындар бұл туралы нақты ақпарат алғысы келсе, Алтынсарин көшесі, 2 мекенжайындағы 2-кабинетке жолығуларына болады. Меншік иелері бірлестігін құруға ниетті жандарға барлық құқықтық-нормативтік құжаттардың электронды нұсқасын ұсынуға, істі жүргізудің жолдарын түсіндіруге біз дайынбыз.
Бірлестік құру үшін тиісті құжаттарымыз жоқ
Райса Куканова, Ақтөбе қаласындағы «Асылым» кондоминиумының жетекшісі:
— Кондоминиум ретінде 2017 жылдың 1 маусымынан бастап жұмыс жасаймыз. Бүгінгі таңда Ақтөбе қаласындағы «Асылым» кондоминиумы 2 үйге қызмет көрсетеді. Олар — Бөкенбай батыр көшесі, 129/е және 129/г. Бұған дейін аталған үйлерге «Ботажан» пәтер иелері кооперативі қызмет көрсетті. Меншік иелері бірлестігіне өту үшін әуелі әділет басқармасында тіркелу керек. Сосын екі есепшот ашу қажет. Біреуі — үйді күрделі жөндеуге, ал екіншісі — техникалық қызмет көрсету мақсатында жиналатын қаражатқа арналған есепшот. Есепшотты меншік иелері бірлестігінің жетекшісі ашу керек. Дегенмен бұл үйлерді мұндай формада басқарудың мүмкіндігі болмай тұр. Себебі бұл үйлердің жер актісі жоқ. Сол себепті мемлекеттік тікреуден өте алмай отырмыз. Бұл жерде қосымша тағы екі үй бар. Олар — Бөкенбай батыр көшесі, 129 в және 129 д. Бұл үйлердің жер актісі 2009 жылы «АТФ» банкке кепілдікке өткен. Содан бері бұл үйлердің құжаттары банкте арестте тұр. Үйді салушы компания — сол кездегі «Ақтөбе центр» фирмасы, қазір атауын өзгертсе де осы күнге дейін банк алдындағы берешегін (шамамен 2 миллиард теңге) өтемей, соның салдарынан құжат банктен қайтарылмай отыр. Бұл үйлер 2011 жылы қолданысқа берілгенмен, арада он жыл өтсе де, әлі де мемлекеттік тіркеуден өткен жоқ. Әрине, біз бұл мәселе бойынша сотқа шағым түсірдік. Іс екінші қалалық, кейін облыстық соттарда қаралды. Бірақ, сот шешімі менің құзыретіме емес, «АТФ» банктің құзыретіне шешілді. Қазір бұл мәселемен сот орындаушысы жұмыстанып жатыр. Сондықтан біз бұл құжаттарға қол жеткізбейінше, меншік иелері бірлестігін құра алмаймыз.
Жоғарыда айтып өткенімдей, егер меншік иелері бірлестігін құратын болсақ, онда көппәтерлі үйдің тұрғындары екі есепшоттың біріне күрделі жөндеу жұмыстарын жүргізу үшін шаршы метріне шамамен 13 теңгеден төлеуге тиіс. Бұл есепшоттағы қаражат жинала береді. Ал техникалық қызмет көрсету мақсатына ашылатын есепшотқа тұрғындар пәтерінің жалпы ауданына байланысты әр шаршы метр үшін 20 теңгеден артық төлейді. Халықтың үйді басқару формасының мұндай әдісінен қашқақтап отырғаны — осы. Меншік иелері бірлестігіне өткен кездегі екінші бір қиын жағдай — сервистік компаниялардың бірімен келісім жасалады. Өздеріңізге мәлім, үйлерде апатты жағдайлар болып жатады. Жарық өшіп, су ағып, жылу тоқтап қалатын жағдайлар жиі кездеседі. Меншік иелері бірлестігіне өткен үйде диспетчер болады. Мұндай кезде тұрғындар диспетчерге хабарласады, ал ол бірлестік жетекшісіне хабарлайды. Жетекші сервистік компанияға тапсырыс жолдайды. Алайда олардың қашан келіп, апат болған жерді жөндейтіні өздеріне мәлім.
Меншік иелері бірлестігін құрудағы халықтың көңілінен шықпайтын тұстардың бірі — осы. Себебі екі есепшоттағы қаражатқа да сервистік компаниялар басшылық етеді. Қазір тұрғындардың басқарудың мұндай әдісіне көшпей, айқай туғызып жатқандары да сондықтан. Үйдің барлық құжаттары да, есепшоттағы қаражат та халықтың қолында, бақылауында болуы керек.
Мәселен, мен қызмет көрсететін үйлерге әзір күрделі жөндеу қажет емес. Себебі былтыр біз тұрғындардан қаражат жинап, үйдің төменгі қабатындағы құбырларды жаңарттық.
Өз басым, тұрғындарға меншік иелері бірлестігін құру турасында әзірге айта қойған жоқпын. Өйткені қазір тұрғындар барлық ақпаратты интернет желісінен оқып, теледидардан көріп отыр. Мен айтқанмен де, қазір оны құратындай біздің қолымызда тиісті құжаттар жоқ.
Тұрғындар сенімінен шығу үшін жұмыс жасаймыз
Дүрия Темірғалиева, Ақтөбе қаласының Батыс-2 ауданындағы Ораз Тәтеұлы, 8-үйдің меншік иелері бірлестігінің жетекшісі:
— Қазір өзім жетекшілік ететін үйдің меншік иелері бірлестігіне өту жолы өте қиын болды. Тұрып жатқан пәтерімді былтыр мамырда сатып алдым. 180 пәтерлі үй өте жақсы жерде орналасқан, ауласы үлкен. Бұл үйде «Бәйтерек» компаниясы арқылы жалдамалы пәтерде тұратын 62 отбасы бар. Сол сияқты, «Отбасы банкі» арқылы пәтерді ипотекаға сатып алған тұрғындар бар. Тұрғындардың көпшілігі — бюджеттік салада қызмет жасайды.
Біз тұратын үй 2017 жылы пайдалануға берілген. Содан бері бұл үйге астаналық «ФМ Менеджмент» компаниясы басқарушылық етуді өз құзыреттілігіне алған. Ол үшін олар Ақтөбедегі бір сервистік компанияны жалдаған. Қазір мен бұл үйдің құжаттарын таба алмай отырмын. Құжаттарды сұрап, астаналық компанияға хат жолдасам, ондағылар сервистік мекемеге сілтейді. Ал сервистік компания өкілдері құжаттың басқа біреуде екенін айтып отыр. Бұл жерде айта кететін бір жайт, біз тұратын үйдегі 62 жалдамалы пәтер тұрғындарын «ФМ Менеджмент» компаниясының өкілі сенімгерлік жолмен басқарады. Аталған компания да, сервистік мекеме де осы күнге дейін тұрғындарға бірде-бір есеп бермеген. Сондықтан бұл үйдің техникалық паспортын, мемлекеттік тіркеуде тұрғаны туралы актісін қолыма тигізе алмай отырмын. Қазіргі күні осы үйдің құжаттарын қалайда қолыма түсіру үшін жан-жаққа хат жолдап жатырмын.
Былтыр жаңа үйге қоныс аударғаннан кейін, үйді басқаратын компанияның жұмысқа салғырт екенін байқадым. Себебі, үйдің жағдайы қараусыз қалғаны білініп тұрды. Тек тұрғындардан коммуналдық төлемақы жинаумен ғана айналысқан.
Бұрын мен Сәңкібай батыр даңғылы, 48 «а» мекенжайындағы үйде кондоминиум жетекшісі болдым. Кезінде бұл үйдің де барлық құжаттарын өзім қайта қалпына келтіріп, қолымда ұстадым.
Қазір тұрғындардың сайлауымен, осы үйге жетекшілік етуді өз жауапкершілігіме алдым. Осы мақсатта мен қызмет еткен сервистік компанияға «бұған дейін бұл үйге атқарған қызметіңіздің заңдылығын маған көрсетіп, таныстырыңыз» деген сипатта хат жазғанымда, оған жауап болмады.
2019 жылы осындағы сервистік компания мен «ФМ Менеджмент»
фирмасының өкілін шақыртып, тұрғындардың басын қосып кездесу өткізгенімізде, ешқандай нәтиже шықпады. Содан тұрғындар болып, басқару органын құру туралы шешімге келдік. Тұрғындардың басым көпшілігі сауалнамаға қатысты. Бірлестікті басқару үшін екі адам сайлауға түстік. Нәтижесінде мен көп дауыс жинап, бұл үйге жетекшілік ететін болдым. Алайда біз тұратын үйдегі 62 жалдамалы пәтер иелерінің сауалнамаға қол қоюға құқығы болмады. Олар үшін сенімді өкіл қол қоюға тиіс еді. Алайда ол бұл істен қашқақтап, соның салдарынан уақыт өтіп, сауалнамамыз жарақсыз боп қалды. Өйткені бір айдың ішінде оның қорытындысы шығып, басқарушы орган жетекшісі сайлануы керек еді.
Былтыр тамызда осы мәселені тұрғындар боп тағы көтердік. Себебі үйіміз күннен-күнге қараусыз тұрғасын жағдайы кете бастады, подъезде күтім болмады. Бұл мәселеге байланысты біз құзырлы органдарға хат жолдағанмен, олар бұл істі өзімізге қарай ысырды. Екінші рет жүргізген сауалнамамыз да аяқсыз қалды. Сөйтіп, енді бұл іске шындап кірісуімізге тура келді. Тұрғындар арасынан 18 адамнан құрылған бастамашыл топ шығып, жиын өткіздік. Олар тұрғындарға бұрынғыдай пәтер иелері кооперативі немесе кондоминиум құрудың уақыты өткенін түсіндіріп, меншік иелері бірлестігін құру, оның негізгі талаптары мен шарттарын айтып, бастама көтердік. Осылайша арамыздан сауалнама жүргізетін комиссия құрдық. Сөйтіп, 180 пәтер иесінің 137-сі меншік иелері бірлестігінің құрылып, оған менің жетекшілік етуімді қолдап, өз келісімдерін берді. Үй кеңесі, ревизиялық комиссия мүшелері де сайланды. Үй кеңесі мүшелерінің шешімімен тариф бекітілді. Осылайша біздің бірлестік әділет басқармасынан тіркеуден өтті. Алайда мен әлі күнге дейін үйдің негізгі құжаттарын әлгі компаниялардан ала алмай отырмын. Міне, екі айдан бері өзіміз бұл мақсатта жұмыс жасап жатырмыз. Тұрғындарға екі айдың есебін де бердім. Ол үшін арнайы чат ашып, сонда барлық мәселе өзара талқыланады.
Біз меншік иелері бірлестігіне өткеннен кейін, екі есепшот Қазпошта бөлімшесі арқылы ашылды. Оның бірі — ағымдағы, екіншісі — жинақ есепшоты. Қазіргі күні тұрғындар пәтерінің әр шаршы метрі үшін 30 теңгеден жарнаны ағымдағы есепшотқа аударып отыр. Бұл қаржыны біз үй күтіміне қажетті заттар алып, штаттағы адамдардың еңбекақысын төлеуге жұмсаймыз.
Бүгінде ағымдағы есепшотқа ай сайын 280 мың теңге қаражат жиналады. Ал үйге алдағы уақытта күрделі жөндеу жұмыстарын жүрізу үшін ашылған жинақтаушы есепшотқа ай сайын 136 мың теңге аударылуға тиіс.
Ай сайын ағымдағы есепшотқа жиналған қаражаттың 30 пайызы бірлестік штатындағыларға еңбекақы ретінде төленсе, ал қалған бөлігі үй күтімі үшін жұмсалады.
Тұрғындар үйдің, ауланың таза болғанын, жұмыстың уақтылы жүргізілгенін қалайды. Қазір біз осы мақсатта тұрғындардың сенімінен шығу үшін жұмыс жасап жатырмыз.
P.S «Бір үй — бір бірлестік — бір есепшот» қағидаты қаржы жұмсау мен қолданудың ашықтығын қамтамасыз етеді. Өйткені оған тұрғындар бақылау жүргізіп, мониторинг жасайды.
**
Бүгінгі күні ел аймақтары бойынша әділет органында 539 меншік иелері бірлестігі және 593 жай серіктестік тіркелген. Алматы, Нұр-Сұлтан қалалары мен Маңғыстау, Қостанай, Атырау облыстары бұл орайда көш бастап тұр.
Арайлым НҰРБАЕВА.
