Облыс жылыту маусымына дайын

Бұл туралы өңірлік коммуникациялар қызметінде өткен онлайн-брифинг барысында облыстық энергетика және тұрғын үй-коммуналдық шаруашылығы басқармасының басшысы Айбек Қайыр мәлімдеді.

Оның айтуынша, облыстың жылыту маусымына дайындығы — 100 пайыз.

— Қазіргі уақытта бюджеттік ұйымдар үшін алдағы жылыту маусымына қажетті 34 486,6 тонна көмір мен 2 011,2 тонна дизель отыны 100% тасымалданды. Алдағы жылыту маусымына халық қажеттілігі үшін 35 420 тонна көмір қажет. Бүгінгі күнге 261 вагон, яғни 18 300 тонна көмір жеткізілді. Теміржол тұйықтарында 4 280 тонна көмір отыны жатыр. Қатты отынның құны тоннасына 15 600-16 500 теңгені құрайды, — деді басқарма басшысы.

Баспасөз мәслихаты барысында белгілі болғандай, биыл облыс аумағында 589 қазандыққа, 266,5 шақырым жылу желілеріне, 136,5 шақырым сумен жабдықтау және су бұру желілеріне, 146,6 шақырым электр желілеріне, 1 439 әлеуметтік нысандарға, 2 486 көппәтерлі тұрғын үйлерге жөндеу жұмыстары жүргізілген. Бүгінгі таңда күрделі жұмыстардың барлығы дерлік аяқталыпты. Ал ұсақ-түйек жұмыстар 1 қазанға дейін толығымен бітетін болады. Сөйтіп, жылдағы дәстүр бойынша 1 қазаннан бастап барлық әлеуметтік мекемелерге, ал 15 қазаннан бастап көп қабатты тұрғын үйлерге жылу беріледі.

Айта кетейік, алдағы жылыту маусымына дайындық барысы облыс әкімдігінің тұрақты бақылауында.

Ақерке САТЫБАЛДЫ.