Қала нысандары — бақылауда
Облыс әкімі Оңдасын Оразалин Ақтөбе қаласындағы бірқатар нысандарды аралады.
Ол ең алдымен Қарғалы тұрғын алабындағы орталық жылу бекетін қайта қалыпқа келтіру және «Нұр Ақтөбе» шағын ауданындағы жылу қазандығын кеңейту бойынша жұмыстармен танысты.
Жұмыс сапары барысында облыс басшысы құрылысы баяу жүріп жатқан нысанның ахуалын қатаң сынға алып, «Құрылыс Проект» ЖШС-ның басшысына аталған нысандарды жыл аяғына дейін пайдалануға беруді тапсырды.
Содан кейін облыс әкімі Қарғалы тұрғын алабындағы «Восточная» қосалқы электрмен жабдықтау станциясының құрылысы жұмыстарымен танысып, мердігер компанияға бірқатар нақты тапсырмаларды берді. Осы жерде қала әкімі Мавр Абдуллинге құрылыс жұмыстарын күнделікті қатаң бақылауға алып, қыс түскенше тез арада аяқтауын қадағалауды міндеттеді.
Облыс басшысы «Нұр Ақтөбе» тұрғын алабындағы 900 орындық мектептің құрылысымен танысып, мердігер компания басшыларына мектепті жыл аяғына дейін пайдалануға беруді жүктеді. Компания басшылығы мектепті электрмен қамту, жылыту, су, кәріз жүйесі, монтаждау жұмыстарын аяқтап, ішкі әрлеу жұмыстары мен ауласын абаттандыруды бастап кеткен.
Облыс әкімі №3 «Нұр Ақтөбе» тұрғын алабындағы 9 қабатты екі панельді №35 «А, Б» тұрғын үй құрылысының жұмыстарымен танысты. Немістің алдыңғы қатарлы технологиясымен жабдықталған «Ақтөбе-Сәулет» ЖШС үй комбинатының қуаттылығы жылына 50 мың шаршы метрді құрайды. Облыс басшысы үйдің жылдам әрі сапалы құрастырылатынына көңіл бөліп, арендалық үйлерді салуға пайдалануға болатындығын атап өтті.
Жұмыс сапары барысында облыс әкімі №3 Ақтөбе қаласының ұлттық спорт түрлерінен балалар-жасөспірімдер спорт мектебінің жұмысымен танысып шықты.
Келесі нысанда Ақтөбеде балық өсірумен айналысатын «Мұрагер 22» ЖШС-ның негізін қалаушысы Гайк Тертерян аймақ басшысына зауыттың жұмысын кеңінен таныстырып, алдағы жоспарларымен бөлісті. 42 адамды жұмыспен қамтып отырған бұл зауыт жылына 1560 тонна балық өндіреді.
Облыс әкімі «А-Полиграфия» ЖШС ғимаратын аралап, ұжым басшылығының жұмысын көріп, алдағы жоспарларымен танысты.
Жұмыс сапарын қорытындылаған облыс әкімі Оңдасын Оразалин шаһар басшысына қала көлемінде жүргізіліп жатқан барлық әлеуметтік нысандар мен тұрғын үй құрылысы жұмыстарына күнделікті бақылау жүргізіп отыруды тапсырды.
Сонымен қатар мемлекеттік мекемелердің және мердігер компаниялардың басшыларына аталған жұмыстар бойынша шараларды уақтылы әрі сапалы орындауды жүктеп, бірқатар нақты тапсырмалар берді.
Облыс әкімінің баспасөз қызметі.
