Ақтөбедегі мұнай ұрлығына қатысты Ішкі істер министрлігінің лауазымды шендісі ұсталды
Ақтөбедегі мұнай ұрлығына қатысты тұтқындаулар енді Астанада жалғасып жатыр. Бұл жолы Ішкі істер министрлігінің лауазымды тұлғасының қолына кісен салынды. Криминалдық полиция департаменті бастығының орынбасары Рахат Ахановты тергеуге алу үшін Ақтөбеге жеткізген. Оған Ақтөбеде қара алтын ұрлаумен айналысқан топқа қолдау көрсеткен деген айып тағылып отыр.
Рахат Аханов 5 жыл бойы Ақтөбеде облыстық ішкі істер департаменті бастығының орынбасары болған. Жаздағы лаңкестік оқиғадан соң ол қызметін ауыстырып, Астанаға кеткен. Мәліметтерге қарағанда, Аханов Ақтөбедегі қара алтын ұрлаған мафияның әрекетіне көз жұмғанымен қоймай, мұнайды өткізуге көмек беріпті. Осы қылмыстық топты «Ағайынды төртеудегі» Еркін Ізбасар басқарған. Арбаға таңылған ол қазір сыбайластарымен бірге қамауда отыр. Қылмыстық топ құрамында болған 16 адамның арасында салафиттер мен құқық қорғау органдарының өкілдері бар.
www.ktk.kz
