НАҚТЫ ШАРАЛАР МЕН СЕНІМДІ ҚОЛДАУ

Раиса БАЙЛИЕВА, Ақтөбе қалалық мәслихатының депутаты:

— Елдегі қазіргі қалыптасқан жағдай кім-кімге де оңай болып тұрған жоқ. Президентіміз Қасым-Жомарт Тоқаев су тасқынына байланысты халыққа үндеу жариялады. Тасқын судың зардабын облыс жұртшылығы да тартты. Табиғи апатқа қатысты Мемлекет басшысы: «Мұндай ахуал ұзақ жылдан бері болмаған. Бұл көлемі жағынан соңғы 80 жылдан бергі ең ірі табиғи апат деуге болады. Жағдай өте күрделі болса да, біз қиындықты міндетті түрде еңсереміз, барлығын қалпына келтіреміз. Ең бастысы — азаматтардың амандығы», — деді.
Президентіміз үндеуде су тасқынына байланысты еліміздің он аймағында төтенше жағдай жарияланғанын атады. Әрине, оның ішінде Ақтөбе облысы да айтылды.
Қазіргі таңда күрделі жағдайға байланысты аймақта жергілікті атқарушы органдар мен бірлескен құрылымдардың арқасында нақты іс-шаралар атқарылып жатыр. Халық қалаулысы ретінде біз де өз тарапымыздан үйлерін, аулаларын су басқан сайлаушыларымызға шама-шарқымызша көмектесіп жатырмыз. Ақтөбе қаласындағы №6 сайлау округі бойынша екі сайжай учаскесі су астында қалды. Осы үйлердің тұрғындарына азық-түліктей, заттай көмек беріліп жатыр.
Қасым-Жомарт Тоқаев өз үндеуінде тасқын судан зардап шеккен бірде-бір адамның ескерусіз қалмайтынын айтты. Бұл — осындай жағдайға тап болған әрбір тұрғын үшін дәл қазіргі сәтте алдағы күнге деген үлкен сенім мен мемлекеттің шарапатын сезінудегі мықты қолдау деп білемін.