Іш ауырса…
Биыл өңірімізде жіті ішек инфекциясының 493 жағдайы тіркелді. Өткен жылмен салыстырғанда аурушаңдық көрсеткіші айтарлықтай өскен. Ақтөбе қалалық санитариялық-эпидемиологиялық бақылау басқармасының дерегінше, аурушаңдық балалар арасында жиі тіркеліп отыр.
Жаз маусымының басталуымен аурудың деңгейі жоғарылайды. Оның басты себебі — тағамның сақталу ережелерінің бұзылуы, сапасыз суды пайдалану, жеке бас тазалығының сақталмауы.
Жіті ішек инфекциясы — микроорганизмдер (бактериялар мен вирустар) тудыратын жұқпалы аурулар тобы, ас қорыту бұзылыстарымен, дегидратация белгілерімен және жалпы интоксикация түрінде көрінеді.
Инфекция қоздырғышы ішке түскен сәттен бастап аурудың алғашқы белгілері пайда болғанға дейін 6 сағаттан 7 күнге дейін созылады. Іштің ауыруы, жүрек айну, құсу күніне 3 рет немесе одан да көп қайталанады. Бойыңызда жоғарыда айтылған клиникалық белгілер пайда болғанда жағдайда дереу дәрігерге қаралыңыз.
Жіті ішек инфекциясын болдырмау үшін мына ережелерді сақтау қажет:
— Жеке бас гигиенасын сақтап, қолды сабындап жуыңыз;
— Балаларға тек таза, залалсыздандырылған бөтелкеден су ішкізіңіз;
— Жеміс-жидектерді және көкөністерді асқа қолданар алдында әбден сумен жуыңыз;
— Тез бұзылатын өнімдерді және дайын тамақты сақтау мерзіміне қарай 2-6 С температурасында сақтаңыз;
— Тез бұзылатын азық-түліктерді тоңазытқыштарда сақтаңыз;
— Тамақ өнімдерін, соның ішінде сүт, ет өнімдерін сатып алу кезінде сапасын куәландыратын құжаттарды талап етіңіз.
Нұрлыгүл ҚАЛИЕВА,
Ақтөбе қалалық санитариялық-эпидемиологиялық бақылау басқармасының бас маманы