Онкүндік өтеді
Брифинг
1 желтоқсан — Дүниежүзілік ЖИТС-ке қарсы күрес күні. Осы күнге орай облыста кешенді іс-шаралар кампаниясы ұйымдастырылады. Бұл туралы Instagram және фейсбук желілеріндегі aqtobe_press парақшасында «Дүниежүзілік ЖИТС-ке қарсы күрес күні» тақырыбында өткен тікелей эфирде айтылды.
Облыстық ЖИТС-тің алдын алу және оған қарсы күрес жөніндегі орталықтың алдын алу бөлімінің меңгерушісі Айжан Жайлаубаеваның айтуынша, облыс көлемінде «Өмірің өз қолыңда!» атты ЖИТС-ке қарсы күрес кампаниясы басталды.
— Облыста 1989 жылдан бері 516 адамнан АИТВ инфекциясы табылған. Содан бері осы аурумен күресіп келе жатқан адамдар бар. Осыған орай «Теңсіздікті болдырмау» тақырыбында іс-шара ұйымдастырылады. Теңсіздікті болдырмау — жаһандық міндет. Ауру неғұрлым ерте анықталса, соғұрлым инфекцияның күшін қайтару да жеңіл болады. Биылғы өткен он ай ішінде 47 адамнан АИТВ анықталып отыр. Оның 34-і — ерлер, 13-і — әйелдер. Жалпы, еліміз бойынша осы вирустың таралуы жөнінен біздің облыс 14 орында тұр. Негізінен, аталған инфекция қан арқылы, жыныстық қатынас арқылы, сондай-ақ жүктілік кезінде анасынан балаға жұғады, — дейді Айжан Жайлаубаева.
Облыстық ЖИТС-тің алдын алу және оған қарсы күрес жөніндегі орталықтың бас дәрігерінің орынбасары Анна Каспирова
облыс көлемінде 15 қарашадан 25 қарашаға дейін «АИТВ: әр адамды түсіну» тақырыбында кешенді шараларға толы онкүндік өткізілетінін айтты. Сондай-ақ ол қаламыздағы барлық емханаларда өз мәртебеңді анықтау үшін анонимді түрде тест тапсыруға мүмкіндік барын, тек жеке куәлігіңмен барып, иммунды ферментті қан талдауын тапсыру қажет екендігін жеткізді.
Айнұр ІЛИЯСҚЫЗЫ.