Бір мектептегі екі учаске
Ақтөбе қаласындағы 11 шағын ауданда орналасқан №35 орта мектепте екі сайлау учаскесі бар. №28 және №110 сайлау учаскелеріне 4600-ге жуық сайлаушы тіркелген.
— 11 шағын ауданда халық көп тұрады. Сол себепті де мұнда сайлаушылар көп. Бұл аудандағы 4 мектептің 4-еуінде де сайлау учаскелері ашылған. Осы маңдағы №9 мектеп-гимназия, №32 мектеп-гимназия, №37 мектепте бір-бірден сайлау учаскесі болса, біздің мектепте екі сайлау учаскесі жұмыс жасап жатыр. Олар — №28 және 110 сайлау учаскелері.
Таңғы сағат 7.00-8.00-дің арасында негізінен үлкен кісілер келді. Дегенмен бұл уақытта сайлаушылар көп бола қойған жоқ. Сағат 11.00-15.00-тің кезінде сайлаушылар белсенділік танытты. Ұйымдасқан түрде отбасыларымен келіп, өз таңдауларын жасаған сайлаушылар да болды. Халықтың көңіл күйі көтеріңкі. «Сайлау әділ өтсін» деп тілектерін айтып кетіп жатыр, — дейді №28 сайлау учаскесінің төрағасы Бақытбек Ержан.
Аталған учаскеде 1818 сайлаушы тіркелген. Сайлау барысын әр саяси партиядан келген бір-бір байқаушы бақылауда.
№35 мектептегі екі сайлау учаскесінде де санитарлық талаптар қатаң сақталған.
Гүлжан БАЗЫЛҚЫЗЫ.