Жинақтау сабағы

«Тұрғын үй құрылыс жинақ банкі» Ақтөбе облыстық филиалының мамандары Мәртөк ауданының мектеп оқушылары арасында ойын түрінде арнайы шара өткізді.

№4 мектептің оқушылары қатысқан шара «Жинақтау сабағы» деп аталды. Ойын ережесіне сай, балалар «Тұтынушы» және «Жинақтау» атты 2 топқа бөлінді. Әр топқа 1 000 000 теңгенің сертификаты беріліп, сол қаражатқа той жасау міндеті қойылды. «Тұтынушы» тобы өз қаражатының үстіне екінші деңгейлі банктен 2 000 000 теңге несие алып, 3 жыл бойы 75 000 теңгеден қарызын қайтаратын болды, ал «Жинақтаушы» тобы тойын 1 000 000 теңгеге өткізіп, алдағы 3 жыл бойы ай сайын 75 000 теңгеден «Тұрғын үй құрылыс жинақ банкінде» жинақтады.

Нәтижесінде «Тұтынушы» тобы артық төлем жасап, қарыздан 3 жылдан соң құтылды, ал «Жинақтаушы» тобы 3 жылда қомақты қаражат жинап, «Нұрлы жер» бағдарламасымен баспаналы болды.

Екі топ шыққан шығындарын есептеп, ақшаны үнемдеу керек екенін және депозит ашып, «Тұрғын үй құрылыс жинақ банкінде» ақша жинақтаған тиімді деген шешімге келді.

— Сабақ барысында ұлттық валюта және банк туралы сұрақтар қойылды. Сонымен қатар мектеп ішінде «идеялар қобдишасы» қойылды. Бір апта көлемінде мектеп оқушылары ақшаны қалай тиімді жинақтауға болатыны туралы өз ойларын сол қобдишаға салулары керек. Ең қызықты жазылған 3 ұсынысқа банк тарапынан естелік сыйлық тағайындалған. Бұл шара Дүниежүзілік жинақ күніне орай ұйымдастырылды, — дейді  «Тұрғын үй құрылыс жинақ банкі» Ақтөбе облыстық филиалының өкілі Мақсат Заитов.

Мейрамгүл РАХАТҚЫЗЫ.