10 сәби дүниеге келді

Отбасы күні

Отбасы күні мерекесі қарсаңында  облыстық перинаталды орталықта 10 нәресте дүниеге келді. Ақтөбе қаласы Астана ауданының әкімі Баянбек Қырықбаев аналарды арнайы келіп құттықтап, сыйлық тарту етті.

— Отбасы — махаббат пен мейірімнің, құрмет пен сыйластықтың ошағы. Мемлекеттің дамуында, қоғамның қалыптасуында отбасының, ұрпақ тәрбиесінің маңызы зор. Сондықтан бұл күннің де ерекшелігі осында, — деген Баянбек Қырықбаев жас босанған аналарға гүл шоғын ұсынып, сыйлық тарту етті.

Тосын сыйды күтпеген аналар қуанышы мен толқынысын жасыра алмады. Көпбалалы Ару Могзимова 5-ші перзентін өмірге әкелгенін айтып,  құттықтаған жандарға алғысын білдірді.

— Отбасы күнінде біздің жеке қуанышымызды бөлісіп, қуантып келгендеріңіз үшін рақмет. Марқайып қалдық. Перинаталды орталықтың акушер-дәрігер, мейірбике, санитарлық қызмет саласының жұмысшыларына өте ризамыз. Бізге аса қолайлы жағдай жасап,бәріміз де  аман-есен босандық, — деді ол.

Дүниеге келген 10 сәбидің  3-еуі — ұл, 7-еуі — қыз бала.

Кәмшат ҚОПАЕВА.