Жаңа техниканың көмегі

Тазалық

Ақтөбе қаласының әкімдігі қыста жолды күтіп ұстауға арналған арнайы техникалардың қатарын толықтырып жатыр. Жаңа жыл қарсаңында  қар тазалайтын тиегіш көлікке арналған канадалық аспалы жабдық, яғни шнекоротордың  үшеуі сатып алынды.  Жаңа жабдық  «АТК қызмет» ЖШС балансына берілді.

Тиегіш көліктің  алдына салып қолданатын үш дана арнайы техниканың тиімділігі өте көп. Біріншіден уақытты үнемдесе, екіншіден, жұмысты оңтайландырады.  Мәселен, бұрын қар тиегенде  25 тонналық «Шахман» жүк көліктерін 30-40 минутта толтыратын болса, жаңа канадалық техниканың көмегімен 3-4 минутта толтырып тастайды.

Бұл техниканың тағы бір ерекшелігі, қарды  кесек-кесек етіп емес, ұнтақтап барып тиейді. Бұл қар қалың түскен кезде қала ішінен тез шығаруға көмегін тигізеді. Қалалық әкімдіктің мәліметінше, қазір көшелер осы техниканың көмегімен тазартылып жатыр.

К.ҚОПАЕВА.