Өнегелі өмір өрнегі
Марат Оспановтың туғанына — 75 жыл
М.Оспанов атындағы Батыс Қазақстан медицина университетінде Парламент Мәжілісінің тұңғыш төрағасы, экономика ғылымдарының докторы, академик Марат Оспановтың туғанына 75 жылтолуына арналған «Жаhандық тенденциялар: ғылым, экономика және әлеуметтану» атты халықаралық ғылыми конференциясы өтті.
Іс-шараға жиналған қауым алдымен М.Оспановтың бюстіне гүл шоқтарын қойды. Сондай-ақ келушілер саясаткер еңбектеріне ғылыми шолу жасалған «Өнегелі өмір өрнегі» атты кітап көрмесі мен өмір жолы мен қоғамдық-саяси қызметінен сыр шертетін фотогалереяны тамашалады. «Кодекс сердца Марата Оспанова» деректі фильмі көрсетілді.
Конференцияда аталған оқу орнының ректоры міндетін атқарушы Надияр Мусин ғалым есімін иеленген университеттің еліміздің денсаулық сақтау саласында алар орны ерекше екенін айтты. Экономика ғылымдарының кандидаты, ҚР еңбегі сіңген қайраткері Мәди Артығалиев ғалым туралы естелікпен бөлісті.
—Марат өте алғыр, білгір,білімі терең азамат болатын. Әттең,ғұмыры қысқа болды. Мәскеуде университет бітірді. Тарих, саясаттану, қоғамтану—қай салада да мықты маман еді, — деді.
Жиында философия ғылымдарының докторы, профессор Алтай Тайжанов Марат Оспанов туралы естеліктерімен бөлісіп, мазмұнды баяндама жасады.
Конференция соңында М.Оспанов атындағы қоғамдық қордың төрағасы, ғалымның жары Бақыт Оспанова қатысушылар мен ұйымдастырушыларға ризашылығын білдірді.
— Мен Маратпен 25 жыл бірге өмір сүрдім. Оның өмірден өткеніне де 25 жыл болыпты. Бірақ өмірден озса да оның тау тұлғасы, мол мұрасы өшкен жоқ. Медицина институтында көптеген шәкірт тәрбиеледі, жастарға қолдау көрсетті. Саясатта жүрген кезінде де ғылымды тастаған жоқ. Марат туралы көп нәрсе айтуға болады. Оның еңбегі ескерусіз қалған жоқ, университетке есімі берілді. Мәжілісте бірнеше рет конференция ұйымдастырылып, кітаптары шықты, — деді Бақыт Оспанова.
Сондай-ақ ғылым апталығы аясында ұйымдастырылған студенттердің республикалық эссе-байқауы және қаламыздағы жоғары оқу орындары арасында шағын футболдан М.Оспановтың кубогына арналған турнир жеңімпаздары мен ғалым атындағы шәкіртақы иелері марапатталды.
Кәмшат ҚОПАЕВА.
