Чемпионат басталды
Worldskills Aqtobe-2024
Ақтөбе индустриалды-кәсіптік колледжінде «Worldskills Aqtobe-2024» аймақтық чемпионатының ашылуы салтанатты түрде өтті.
Іс-шараға облыстық білім басқармасының басшысы, облыстық кәсіпкерлер палатасының директоры, қазақстандық салалық білім және ғылым қызметкерлері кәсіптік одағының облыстық ұйымының төрағасы, ардагер ұстаздар, бұқаралық ақпарат құралдарының өкілдері, әлеуметтік серіктестер, өңірдегі ірі кәсіпорындардың басшылары, колледждердің директорлары қатысты.
Жиынды облыстық білім басқармасының басшысы Жайық Сұлтан ашып, бақ сынаушыларға ақ тілек, жылы лебізін жеткізді.
Чемпионаттың мақсаты — еңбек адамының мәртебесін дәріптеу және жұмысшы мамандықтарының беделін арттыру, жастардың шеберлік дағдыларын дамыту.
Биылғы чемпионатта 82 құзыреттілік бойынша 21 жасқа дейінгі 400-ден астам колледж студенттері бақ сынауда.
Іс-шара барысында «WorldSkills Kazakhstan 2023» республикалық чемпионатының алтын жүлдегерлері, Ақтөбе техника-технологиялық колледжінің студентіА.Балбердинов сөз алып,биылғы қатысушыларға сәттілік тіледі. Ал Ақтөбе автожол колледжінің студенті Р.Мифтахетдинов Ақтөбе Жоғары политехникалық колледжінің студенті Т.Абуға жеңіс туын табыстады.
Байқаудаәлеуметтік әріптес кәсіпорындардың жетекші мамандары сарапшылық етеді. Сондай-ақ Маңғыстау облысының өкілдері тәуелсіз сарапшылық етуде.
«WorldSkills Kazakhstan-2023» республикалық чемпионатында Ақтөбе облысы 2 алтын, 1 күміс, 3 қола және 8 медальон жеңіп алып, еліміз бойынша7-орын иеленді.
Айта кету керек, біздіңөңірде «WorldSkills Kazakhstan» халықаралық қозғалысы 2015 жылы басталды. Биыл аймақтық чемпионат тоғызыншы рет өткізіліп отыр.
Іңкәр АЛТАЙ.
