Мыңдаған адам қатысты

Таза Қазақстан

«Таза Қазақстан» республикалық экологиялық акциясы аясында облыста елді мекендерді санитарлық тазарту бойынша іс-шаралар басталды.

Облыс әкімі Асхат Шахаров бизнес нысандарының иелерін, түрлі мекеме ұжымдарын, тұрғын үй алаптары мен көпқабатты үйлердің тұрғындарын елді мекендерді абаттандыруға өз үлестерін қосуға шақырды.

— Әрбір елдімекеннің таза болуы үшін мұндай іс-шаралар жеткіліксіз, ең алдымен,әр тұрғынның жыл бойы тазалықты сақтауы, балаларға қоқысты кез келген жерге тастамауға үйрету, өскелең ұрпаққа қоршаған ортаға ұқыпты қараудың жеке үлгісін көрсету маңызды,—деп атап өтті облыс басшысы.

Сенбі күні мемлекеттік қызметшілер, депутаттар, мекеме ұжымдары, үкіметтік емес ұйымдардың өкілдері, студент жастар аумақтарды тазалауға шықты. Қоғамдық орындарды тазарту бойынша көптеген жұмыс жүргізілді.

Елді мекендердің аумақтарын санитарлық күтіп ұстауға жауапты коммуналдық қызметтердің жұмысы едәуір күшейтілді. Тротуарлар, автобус аялдамалары, қоқыс контейнерлері, жол белгілері ретке келтірілуде. Көп қабатты үйлердің басқарушы компаниялары, кондоминиумдар тұрғындармен бірлесіп аула және үймаңындағы аумақтарды қоқыстан тазарту жұмыстарын жүргізді.

Ақтөбе облысында «Таза Қазақстан» экологиялық акциясы аясында басталған сенбіліктер екі айға созылады. Осы уақыт ішінде Ақтөбе қаласының қатты-тұрмыстық қалдықтар полигоны қала тұрғындарынан жиналған барлық қоқысты тегін қабылдайтын болады.

Сонымен қатар Ақтөбенің орталық алаңдарында 100 түп қылқан жапырақты ағаш, қарағай, тау күлі көшеттері отырғызылды. Көктемгі ағаш егу науқаны алдағы уақытта да жалғасын табады.

А.МӘЛІКҚЫЗЫ.