Баба рухына тағзым

Ақтөбе қаласы полиция басқармасы ювеналды полиция бөлімшесінің қызметкерлері мен колледж оқушылары Алға ауданы Бестамақ ауылындағы Есет батыр Көкіұлы кесенесіне барып, баба рухына Құран оқыды.
Ең алдымен діни рәсімдерді атқарушы қызметкер Сәкен Мейірманов студенттерге Есет Көкіұлы атындағы мемориалды кешеніне шолу жасап, батыр бабамыз туралы тарихи деректерді айтып берді.

Ақтөбе қаласы полиция басқармасы ювеналды полиция бөлімшесінің бастығы, полиция майоры Ботакөз Жалекешованың айтуынша, рухани-патриоттық іс-шара екі күнге созылады:

— Есет батыр — қазақ тарихында ерекше орны бар, бүкіл өмірін халқының азаттығына арнаған тұлға. Жастар, өскелең ұрпақ өздерінің ата-бабалары, олардың батырлығы мен ерліктерін білуі керек. Осылайша біз жастарды патриоттық рухта тәрбиелеп, ұлттық сана-сезімін қалыптастыра аламыз. Патриоттық іс-шара екі күнге созылып, 100-ден астам студент Есет батыр Көкіұлы кесенесіне келіп, зиярат етеді, — дейді ол.

Іс-шараға қатысушылардың бірі көпсалалы «Болашақ» колледжінің оқушысы Мейрамбек Орынғали бала кезінен батыр бабаларымыз туралы тарихи деректерді оқып өскендігін айтады:

— Біз ювеналды полиция бөлімшесімен бірге көптеген іс-шаралар ұйымдастырдық. Солардың бірі — полиция басқармасының мұрындық болуымен өткізілген жасөспірімдер арасындағы қалалық спартакиада ойындары. Осы сайыста студенттер арасында сынға түсіп, жүлдегер атандым. Алдағы уақытта салауатты өмір салтын қалыптастыру мақсатында ұйымдастырылатын іс-шаралардан тысқары қалмауға тырысамын, — дейді ол.

Ақмарал МҰҚАШЕВА.