Маңызды саланың мәселелері

Құрылыс

Облыс әкімі Ералы Тоғжанов бизнес-қауымдастық өкілдерімен кездесіп, құрылыс саласы мәселелерін талқылады. Кездесуге құрылыс компаниялары, жобалау ұйымдарының басшылары, құрылыс материалдарын өндірушілер қатысты.
— Үкіметтің кеңейтілген отырысында Президент Қасым-Жомарт Тоқаев: «Мемлекет пен бизнес — сенімді серіктестер. Шағын және орта бизнестің дамуына заңсыз кедергі келтіретіндердің бәрі заңға сәйкес қатаң жауапқа тартылады», — деп атап өтті. Шағын және орта бизнес — елдің әлеуметтік-экономикалық дамуына әсер ететін негізгі салалардың бірі.
2022 жылы ақтөбелік кәсіпкерлердің 4,5 мыңнан астам жобасына қолдау көрсетілді, осы көрсеткіш бойынша біз өңірлер бөлінісінде көшбасшы болып отырмыз. 3000-нан астам жаңа жұмыс орны құрылды, 8000-ға жуық жұмыс орны сақталды, шығарылатын өнім көлемі 478,9 миллиард теңгеге жетті.
Облыста жұмысы қарқынды шағын және орта бизнес субъектілерінің саны 87,8 мың бірлікке жетті, оның ішінде 3 830-ы — құрылыс саласында. Бүгінгі кездесу осы саланың дамуына кедергі келтіретін барлық мәселені шұғыл шешу үшін ұйымдастырылды, — деп атап өтті өңір басшысы.
Кездесу барысында құрылыс компаниялары алдында тұрған жүйелі проблемалар көтерілді. Олардың қатарында «ҚазТрансГазАймақ» ЖШС және «Энергосистема» ЖШС салып жатқан нысандарға жер учаскелерін, техникалық шарттарды алу кезіндегі қиындықтар, салынған жаңа көппәтерлі тұрғын үйлерге баратын жолдардың болмауы, құрылыс объектілерін салу кезінде егжей-тегжейлі жоспардың сақталмауы секілді мәселелер бар.
Батыс-3 ауданында көппәтерлі тұрғын үйлердің, әлеуметтік нысандардың құрылысын жүзеге асыратын кәсіпкерлер инженерлік-коммуникациялық желілердің жоқтығына байланысты проблемаларға тап болуда.
Құрылыс компаниялары қала құрылысы кеңесінің жұмысын қайта жандандыру туралы бастама көтерді. Олардың пікірінше, кеңес қала құрылысы саясатын іске асыру кезінде шешімдер қабылдаудың тиімділігін арттырып, шаһардың тұрақты дамуын қамтамасыз етеді, жоспар жобасын бұзу, үлестік құрылыс мәселелерін шешеді.
— Құрылыс саласы — аймақ үшін маңызды салалардың бірі. Біз бүгін талқылаған барлық мәселе бойынша егжей-тегжейлі талдау жүргізу қажет. Мәселелерді кезең-кезеңімен шешеміз, — деп, өңір басшысы салалық басқармаларға нақты тапсырмалар берді.

А.ІЛИЯСҚЫЗЫ.