Ана мен бала денсаулығы

Конференция

М.Оспанов атындағы Батыс Қазақстан медицина университетінде акушер-гинекологтердің облыстық конференциясы өтті. Оған университеттің оқытушылары мен профессорлық құрамы, сондай-ақ тәжірибелі дәрігерлер, акушер-гинекологтер қатысты.

Облысымызда 928161 мыңнан астам адам тұрса, соның 473074-і әйелдер. Оның ішінде 16-49 жастағы әйелдер саны —207017.

— Облысымызда 170 акушер-гинеколог жұмыс істейді. Өткен жылдың қорытынды есебі бойынша 4860 сәби өмірге келді. Осы жолғы конференцияда оннан астам баяндама тыңдалып, ана мен бала өлімінің себептері талқыланды. Дәрігерлер үшін бұл іс-шараның маңызы зор. Олар осы семинардан алған білімін күнделікті клиникалық тәжірибеде қолдана отырып, ана мен баланың денсаулығына жауапты болады. Сәбидің өмірге сау келуі ата-анасына тікелей байланысты, — дейді   облыстық денсаулық сақтау басқармасы басшысының акушерлік және балалар ісі жөніндегі орынбасары Бақытжан Түлкібаева.

Жыл сайын акушер-гинекологтердің біліктілігін арттыру мақсатында семинарлар жиі ұйымдастырылатын болады. Шағын елді мекендердегі мамандардың тапшылығын болдырмау үшін жас мамандар жұмыспен қамтылуда.

— Сәби сүю үшін оны 3-4 ай бұрын жоспарлау керек. Ол үшін салауатты өмір салтын ұстанып, гинеколог дәрігерге уақтылы қаралу керек. Алған білімімізді ана мен бала денсаулығын жақсартуға арнаймыз, — дейді №3 қалалық емханасының акушер-гинекологі Эленора Қыдырбаева.

№1 акушерлік және гинекология кафедрасының меңгерушісі Светлана Шиканова жасөспірімдер арасында жасанды түсіктің көптігі алаңдатып отырғанын айтады.

— Облыс бойынша әйелдердің түсік жасатуы 12,9 пайыз шамасында. Соның ішінде жасөспірімдер  арасында жасанды түсікке баратындар азаймай тұр, — дейді ол.

 Ақмарал МҰҚАШЕВА.