Оқушылар сап түзеді

Жас сарбаз

8 мамыр күні Ақтөбе қаласындағы «Қазақ халқына мың алғыс» стеласының алдында қала мектептеріндегі әскери-патриоттық клубтары мүшелерінің салтанатты саптық қойылымы өтті.

Бұл іс-шара Қазақстан Республикасы Қарулы Күштерінің 31 жылдығына арналды.Оған қаладағы әскери-патриоттық клубтардың 560 тәрбиеленушісі мен ата-аналары, ауған соғысының ардагерлері, отставкадағы әскери қызметкерлер, Чернобыль апатын жоюға қатысушылар және жергілікті әскери басқару органдарының өкілдері шақырылды.

Саптық қойылымға 20-дан астам қала мектептерінің әскери-патриоттық клубтары қатысты.

— Олардың әрқайсысының өз атауы бар. Клубтар Кеңес Одағы батырларының немесе халық батырларының есімімен аталады. Онда мектеп оқушылары аптасына 3-4 рет жүйелі түрде оқиды. Балалар әскери және денешынықтыру даярлығынан өтеді.Кейбір мектептерде кәсіптік оқыту бар. Болашақ электриктерді, дәнекерлеушілерді, автоэлектриктерді даярлайды. Қала мектептерінде 78 әскери-патриоттық клуб бар. Біз бұл бағытта 2005 жылдан бері жұмыс істеп келеміз. Барлық үйірме «Жас сарбаз» балалар-жасөспірімдер әскери-патриоттық қозғалысы» қоғамдық бірлестігінің қарамағында,— дейді қалалық білім бөлімінің әдіскері, запастағы капитан Серік Сраж.

Салтанатты әскери саптық қойылымда Сазды орта мектебінің «ЖасҰлан» балалар үрлемелі аспаптар оркестрі өнер көрсетті.

№55 мектеп-гимназия мен №74 орта мектептің әскери-патриоттық үйірмелерінің мүшелері қоян-қолтық ұрыс тәсілдерін және атыс қаруын қолданудағы шеберлігін көрсетті.

—Мұндай іс-шаралармаңызды әрі қажет. Кеңес заманында оқу-ағарту жұмыстары жоғары деңгейде жүргізілді. Қазір де болашақ қорғаушыларымызды жастайынан даярлап, оларды отансүйгіштікке баулуымыз керек,—деді ҚР Қарулы Күштері ардагерлері қоғамдық бірлестігінің Ақтөбе қалалық филиалының төрағасы Қажымұхан Сәтенов.

Өз тілшіміз.