Еңбек құқығы бұзылуының алдын алу жұмыстарын күшейтуді тапсырды
Облыс әкімі Оңдасын Оразалиннің төрағалығымен облыстық үш жақты комиссияның әлеуметтік әріптестік және әлеуметтік-еңбек қатынастарын реттеу бойынша отырысы өтті.
— Мемлекет басшысы Қазақстан халқына Жолдауында атап өткендей, қазіргі күні біздің алдымызда тұрған басты міндет — әлеуметтік-экономикалық тұрақтылықты қамтамасыз ету, жұмыс орындарын құру және халықтың табысын арттыру. Осы бағыттағы жұмыстар барынша тиімді болуға тиіс, — деді облыс әкімі.
Биылғы жылдың алты айында облыстық еңбек инспекциясы жөніндегі басқармаға жұмысшылардың еңбек құқықтары бұзылуының әртүрлі деректері бойынша 650-ден астам шағым түскен. Мемлекеттік инспекторлар 176 тексеру жүргізіп, еңбек заңнамасының 233 рет бұзылғаны анықталған.
— Анықталған заңбұзушылықтардың нәтижесінде кәсіпорын басшыларына 108 ұйғарым берілді және 10,3 миллион теңгеге 54 әкімшілік айыппұл салынды,— деді басқарма басшысы Абдухат Мырзалин.
Отырыс соңында облыс әкімі еңбекақыны уақтылы төлеу мәселесін басты назарда ұстап, халықтың табысын көтеру шараларын жүзеге асыруды жандандыруды тапсырды. Айта кетейік, былтыр облыстағы 900-ден аса жұмысшының айлығы орташа алғанда 10%-дан 50%-ға дейін көтеріліп, нәтижесінде 30 мыңға жуық ақтөбеліктің табысы артты.
Биыл жыл басынан бері облыстағы 445 кәсіпорын еңбекақыны көтерген. Сондай-ақ жұмысшылардың еңбек құқықтарын қорғау мақсатында 3600-ден аса меморандум мен 280 ұжымдық келісімшартқа қол қойылды. Бұл бағыттағы жұмыстар жалғасуда.
Облыс әкімінің баспасөз қызметі.