Балалар дүкені сапалы киімдер ұсынады

Ақтөбелік Гүлнұр Мұстафина мемлекеттік бағдарлама арқылы несие алып, Батыс-2 ауданынан «Alyakosh style» балаларға арналған киім дүкенін ашты.

Гүлнұр 2007 жылы Темір ауданындағы Шұбарқұдық елді мекенінен шағын азық-түлік дүкенін ашып, табыстың алғашқы капиталын жинады. Кейін 2 азық-түлік супермаркеті мен кондитерлік дүкен салып, 150 адамды жұмыспен қамтыды.

Бұл ретте ол мемлекеттік бағдарламалар арқылы несие алып, жұмысын жандандырғанын айтады.

— Осыдан үш жыл бұрын Ақтөбе қаласындағы бірқатар сауда орталықтарынан балаларға арналған киім дүкенін аштық. Бұл жолы кәсібімізді кеңейтіп, Батыс-2 ауданынан екі қабатты 300 шаршы метр ғимаратты алып отырмыз. Әзірге 15 адам тұрақты жұмысқа тұрды. 

Біздің мақсатымыз — сапалы балалар киімдерін қолжетімді бағада сату. Алдағы уақытта еліміздің басқа да қалаларынан ашқымыз келеді.

«Еңбек» және  «Бизнестің жол картасы-2025» мемлекеттік бағдарламалары арқылы кәсібімді кеңейттім. Жолдасым да менің әр бастамама қолдау көрсетіп келеді. Бүгінде еңбек еткен адамға мүмкіндік мол, — дейді Гүлнұр Мұстафина.

Шара соңында кәсіпкер көпбалалы ана Гүлзия Дабысованың үйіне барып, балалар киімдерін тарту етті.

Ақбота ҚАЛДЫБЕК.