Аналар бас қосқан игі шара
Отбасы
«Анаға тағзым» рухани-адамгершілік тәрбие беру орталығында «Әйел-ана — отбасының ұйытқысы» атты дөңгелек үстел өткізілді. Іс-шараға өнегелі, көпбалалы және жалғызбасты аналар қатысты.
Шарада Астана ауданы әкімінің орынбасары Жақсат Сәндібайұлы, медиатор Бибігүл Әбдішүкірқызы сөз сөйлеп, отбасылық құндылықтар туралы ойларымен бөлісті.
— Мәдениетті, өмірлік мақсаты айқын аналар қоғамға керек. Ажырасудың басты себебі — ауызбіршіліктің, өзара түсіністіктің жоқтығында. Ата-енесімен бірге тұрғысы келмеу себебінен ажырасу көбейіп кетті. Болмашы қиындыққа төтеп бере алмай, некені бұзу дұрыс емес деп есептеймін. Отбасындағы түйткілді мәселелердің шешілуіне оң көзбен қарап, сабырлылық танытса, ажырасу болмайды, — деді Бибігүл Әбдішүкірқызы.
Отбасы тәрбиесінің мән-маңызы мен ұлттық салт-дәстүрді насихаттауға бағытталған іс-шаралар алдағы уақытта да жалғасын табады.
— Адамның ең басты шаттығы — отбасы. Отбасының бірлігін сақтау, ажырасудың алдын алу қазіргі таңдағы өзекті мәселелердің бірі. Татулықты берік ұстанатын отбасылар қатары көбейе берсін, — деді шара қатысушысы, көпбалалы ана Гүлмереке Құдайбергенқызы.
Ақмарал МҰҚАШЕВА.