Абайға арналды

Облыстық тарихи-өлкетану музейінде «Рухани жаңғыру» бағдарламасының 5 жылдығына және Қазақстан халқының бірлігі күніне арналған «Абай мұралары — ұлттың рухани жаңғыруы мен бірлігінің бастауы» атты дөңгелек үстел өтті.

Дөңгелек үстелге музей қызметкерлері, зиялы қауым өкілдері қатысты. Шарада белгілі ғалым, мемлекет және қоғам қайраткері Амангелді Айталы, философия ғылымдарының кандидаты Үмбетқан Сәрсембин, облыстың бас имамы Серікжан Еншібайұлы ұлы ақынның рухани мұрасы туралы мазмұнды әңгіме өрбітті. Күйші Талап Хамзин Абайдың «Торы жорға», Қазанғаптың «Өттің, дүние» күйлерін нақышына келтіріп орындады.

Дөңгелек үстел соңында музей директоры Мейрам Дүйсенғали сөз сөйлеп, қатысушыларға «Қазақстанның киелі жерлерінің географиясы» жобасы аясында жуырда жарық көрген монографияларды табыстады.

Шараға орай «Асыл сөзді іздесең, Абайды оқы, ерінбе!» тақырыбында кітап көрмесі де ұйымдастырылды.

Сағымбек  ҰЛЫҚПАНОВ.