Қытайдан 24 мың экспресс-тест келді

Ақтөбеге Қытайдан 24 мың экспресс-тест келді. Қазіргі таңда қауіпті топқа жататын азаматтарды коронавирусқа тексеру үшін дайындық жұмыстары жүргізіліп жатыр.

Облыстық денсаулық сақтау басқармасының басшысы Әсет Қалиевтің айтуынша, бұл тест көлемі бірінші кезең бойынша жеткілікті.

— Қазір экспресс–тесттер емханаларға таратылып жатыр. Қауіпті топқа жататын қызметкерлер ақысыз тексеріледі. Оның ішінде коронавируспен күресіп жатқан мекеме мен әкімшілік қызметкерлері, жедел респираторлық вирустық инфекция белгілері бар науқастар, блок-бекет арқылы шетелден және өзге аймақтардан оралған азаматтар бар. Ал ақылы түрдегі бағасының қанша болатыны әзірге анықталған жоқ. Қазір бағаны бекіту жұмыстары жүріп жатыр. Жалпы экспресс-тест емханаларда жасалады. Бұл жерде кімдердің тексерілетіні, яғни қауіпті топқа жататыны тіркеліп тұрады. Сондықтан тұрғындар тестті сұрап, іздеп барудың қажеті жоқ. Емхана мамандары өздері шақырады, —дейді басқарма басшысы.

Кәмшат ҚОПАЕВА.